កំណើនសេដ្ឋកិច្ចចិនស្គាល់ការថយចុះនៅត្រីមាសទី២ឆ្នាំ២០១០
សេដ្ឋកិច្ចចិនដែលជាសេដ្ឋកិច្ច ជាប់ចំណាត់ថ្នាក់ទីបីក្នុងលោកបានស្គាល់ការថយស្រុតចុះនៅត្រីមាស ទី២ឆ្នាំ២០១០ នេះជាសេចក្តីប្រកាសឲ្យដឹងដោយរដ្ឋាភិបាលចិននៅថ្ងៃព្រហស្បតិ៍ទី១៥ កក្កដាឆ្នាំ២០១០។ រីឯវិធានការរបស់រដ្ឋាភិបាលសម្រាប់ទប់ទល់នឹងការឡើងកំដៅខ្លាំងនៃ ម៉ាស៊ីនសេដ្ឋកិច្ចក៏ហាក់ដូចជាទទួលបានលទ្ធផលល្អប្រសើរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
កំណើនផលិតផលដុលក្នុងប្រទេសចិនបានកើនឡើងប្រមាណ១០,៣%ពីខែមេសាដល់ខែមិថុនាឆ្នាំ២០១០ នេះជាការប្រកាសឲ្យដឹងដោយការិយាល័យជាតិខាងស្ថិតិ។
ទោះបីជាតួលេខនៃកំណើនសេដ្ឋកិច្ចចិននៃបីត្រីមាសបន្តបន្ទាប់គ្នាមានដល់ទៅពីរខ្ទង់ក្តី ក៏កំណើនសេដ្ឋកិច្ចចិននៅត្រីមាសទី២ឆ្នាំ២០១០ដែលអាចស្ទុះដល់១០,៣% នៅតែមានលក្ខណៈតិចទាបជាងត្រីមាសមុនៗ បើប្រៀបផ្ទឹមទៅនឹងត្រីមាសទី១ឆ្នាំ២០១០ដែលមាន១១,៩% ហើយនិង១០,៧%សម្រាប់ត្រីមាសទី៤ឆ្នាំ២០០៩។ ទាំងនេះក្រោយពីទីក្រុងប៉េកាំងបានចាត់វិធានការដើម្បីទប់ទល់នឹងការឡើងកំដៅខ្លាំងនៃម៉ាស៊ីនសេដ្ឋកិច្ច។
ទោះជាយ៉ាងណាក្តី រដ្ឋាភិបាលចិននៅតែបន្តអនុវត្តនយោបាយម៉ាក្រូ-សេដ្ឋកិច្ចរបស់ខ្លួន។ ជាសរុប ស្ថានភាពសេដ្ឋកិច្ចចិនមានលក្ខណៈល្អប្រសើរ។ ទោះជាបញ្ហាមួយចំនួនបានកើតមានខ្លះៗនៅខណៈដែលដំណើរសេដ្ឋកិច្ចចាប់មានសន្ទុះកើនឡើងក៏ដោយ។
គួរកត់សម្គាល់ថា ប្រទេសចិនដែលបានគេចចៀសផុតពីវិបត្តិសេដ្ឋកិច្ចក៏ដោយសារតែទីក្រុងប៉េកាំងមាន”ផែនការជម្រុញឲ្យមានសន្ទុះកំណើនសេដ្ឋកិច្ច”ដែលមានចំនួនទឹកប្រាក់ដល់ទៅ៤០០ម៉ឺនលានយ័នឬត្រូវជាជាង៤៦០ពាន់លានអឺរ៉ូសម្រាប់រយៈកាលពីរឆ្នាំ។ ហើយនិងការផ្តល់ប្រាក់កម្ចីដោយធនាគារដែលបានទ្វេមួយជាពីរ ពោលគឺមានដល់ទៅ៩៦០ម៉ឺនលានយ័ននៅឆ្នាំ២០០៩។
ចំណែកឯការប្រយុទ្ធប្រឆាំងនឹងបញ្ហាទំនិញឡើងថ្លៃវិញ វិធានការរបស់រដ្ឋាភិបាលចិនហាក់ដូចជាទទួលបានផ្លែផ្កាល្អប្រសើរ។ ដោយនៅខែមិថុនាកន្លងទៅ គេកត់សម្គាល់ឃើញអត្រានៃអតិផរណាបានកើនឡើងតែ២,៩%ក្នុងមួយឆ្នាំ ទល់នឹង៣,១%សម្រាប់ខែមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ