បក្សប្រជាធិបតេយ្យនៅប្រទេសថៃប្រហែលជាអាចនឹងត្រូវរំលាយ
នៅប្រទេសថៃ សេចក្តីសម្រេចចិត្តរបស់តុលាការប្រហែលជាអាចធ្វើឲ្យលោកនាយករដ្ឋមន្ត្រីអភិស៊ីតវ៉េចាជីវ៉ាស្គាល់ភាពឃ្លេងឃ្លោង។ ព្រះរាជអាជ្ញាថៃទើបនឹងទាមទារជាផ្លូវការនៅថ្ងៃអង្គារទី១៣កក្កដាឆ្នាំ២០១០ឲ្យរំលាយគណបក្សប្រជាធិបតេយ្យ។ពួកអាវក្រហមដែលជាក្រុមបាតុករប្រឆាំងនឹងរដ្ឋាភិបាលរបស់លោកអភិស៊ីតតែងស្រែកប្រកាសឲ្យដឹងថា មានតុលាការអយុត្តិធម៌នៅប្រទេសថៃ។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សៀក សារិន
ព្រះរាជអាជ្ញាថៃទើបនឹងទាមទារឲ្យរំលាយគណបក្សប្រជាធិបតេយ្យ មកពីតុលាការថៃរកឃើញថាគណបក្សប្រជាធិបតេយ្យរបស់លោកនាយករដ្ឋមន្រ្តីអភិស៊ីតវ៉េចាជីវ៉ាបានទទួលហិរញ្ញប្បទានខុសច្បាប់ ហើយការរំលាយគណបក្សប្រជាធិបតេយ្យនេះក៏បានត្រូវទាមទារជាយូរមកហើយដោយពួកអាវក្រហម។ ពួកអាវក្រហមដែលជាក្រុមបាតុករប្រឆាំងនឹងរដ្ឋាភិបាលរបស់លោកអភិស៊ីតតែងស្រែកប្រកាសឲ្យដឹងថា មានតុលាការអយុត្តិធម៌នៅប្រទេសថៃ។
បញ្ហាហិរញ្ញប្បទានខុសច្បាប់អាចបណ្តាលឲ្យគណបក្សប្រជាធិបតេយ្យដែលជាគណបក្សនយោបាយចាស់ជាងគេនៅប្រទេសថៃឈានទៅរកការបិទបញ្ចប់ជីវិតរបស់ខ្លូន។ បញ្ហាហិរញ្ញប្បទានខុសច្បាប់នេះបានកើតមាននៅឆ្នាំ២០០៥ ដែលកាលណោះ បក្សប្រជាធិបតេយ្យបានត្រូវគេចោទថា បានទទួលប្រាក់ហិរញ្ញប្បទានប្រមាណ២៥៨លានបាទ(ត្រូវជាជិត៦លានអឺរ៉ូ)ពីក្រុមហ៊ុនឧស្សាហកម្មផលិតស៊ីម៉ង់តិ៍ ដែលជាបរិមាណច្រើនលើសលុបហួសពីការអនុញ្ញាតដោយច្បាប់ថៃក្នុងការផ្តល់ហិរញ្ញប្បទានឲ្យគណបក្សនយោបាយ។
អនុលោមតាមអនុសាសន៍របស់គណៈកម្មការបោះឆ្នោត ព្រះរាជអាជ្ញាថៃបានទាមទារជាផ្លូវការនៅថ្ងៃអង្គារទី១៣កក្កដាឆ្នាំ២០១០ឲ្យរំលាយគណបក្សប្រជាធិបតេយ្យ។ ព្រះរាជអាជ្ញាបានបញ្ជូនសំណុំរឿងនេះទៅតុលាការធម្មនុញ្ញដែលត្រូវធ្វើការវិនិច្ឆ័យចុងក្រោយនៅប៉ុន្មានខែខាងមុខនេះ។
នៅពេលនេះអ្វីៗក៏នៅពុំទាន់សម្រេចរួចរាល់នៅឡើយ ក៏ប៉ុន្តែបើប្រសិនជាគណបក្សប្រជាធិបតេយ្យបានត្រូវគេរកឃើញថាបានប្រព្រឹត្តអំពើខុសច្បាប់មែននោះ សមាជិកប្រមាណ៤០នាក់នៃបក្សប្រជាធិបតេយ្យដែលបានកាន់កាប់តំណែងនៅរវាងឆ្នាំ២០០៤និងឆ្នាំ២០០៥នឹងត្រូវបណ្តេញចេញពីជីវិតនយោបាយថៃសម្រាប់រយៈកាល៥ឆ្នាំ ហើយក្នុងចំណោមនោះក៏មានឈ្មោះលោកនាយករដ្ឋមន្ត្រីថៃអភិស៊ីតវ៉េចាជីវ៉ាផងដែរ។
អ្វីដែលគួរឲ្យអស្ចារ្យគឺ គណបក្សប្រជាធិបតេយ្យរបស់លោកនាយករដ្ឋមន្ត្រីថៃអភិស៊ីតវ៉េចាជីវ៉ាដែលបានឡើងមកកាន់អំណាចនៅចុងឆ្នាំ២០០៨ ក៏ដោយសារតែមានសេចក្តីសម្រេចចិត្តរបស់តុលាការថៃ ក្រោយពីមានការរំលាយគណបក្សដែលជាសម្ពន្ធមិត្តរបស់លោកថាក់ស៊ីន។ ដូច្នេះហើយបានជាពួកបាតុករអាវក្រហមដែលប្រឆាំងនឹងរដ្ឋាភិបាលរបស់លោកអភិស៊ីតបាននាំគ្នាធ្វើការទាមទារឲ្យតុលាការថៃធ្វើការវិនិច្ឆ័យទៅលើគណបក្សប្រជាធិបតេយ្យដូចគ្នាដែលខ្លួនបានកាត់ក្តីឲ្យរំលាយគណបក្សដែលជាសម្ពន្ធមិត្តរបស់លោកថាក់ស៊ីន។
ក៏ប៉ុន្តែគណបក្សប្រជាធិបតេយ្យបានប្រុងប្រៀបរៀបចំឲ្យមានជាស្រេចនូវគណបក្សនយោបាយថ្មីមួយសម្រាប់ចូលរួមធ្វើការបោះឆ្នោតដែលគ្រោងរៀបធ្វើនៅឆ្នាំក្រោយ នៅករណីដែលតុលាការថៃសម្រេចឲ្យគណបក្សប្រជាធិបតេយ្យរំលាយខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ