ប្រជាជនអាហ្វហ្កានីស្តង់បញ្ចេញកំហឹងប្រឆំាងនឹងកំហុសឆ្គងរបស់កម្លំាងអូតង់
កាលពីថ្ងៃសៅរ៍ ទី១០ កក្កដាម្សិលមិញ មានប្រជាជនអាហ្វហ្កានីស្តង់រាប់រយនាក់បាននំាគ្នាចុះផ្លូវធ្វើ បាតុកម្មក្នុងស្រុក Mazar-i-Sharif ស្ថិតនៅប៉ែកខាងជើងប្រទេស ដើម្បីប្រឆំាងនឹងកំហុសឆ្គងថ្មីចំនួនពីរទៀតរបស់កម្លំាងអូតង់។ កំហុសឆ្គងទំាងពីរដែលបណ្តាលឲ្យស្លាប់ជនស៊ីវិលចំនួន ១០ នាក់ និងទាហានអាហ្វហ្កានីស្តង់ចំនួន ៦នាក់នៅក្នុងការទម្លាក់គ្រាប់បែកច្រឡំកន្លែង។ ឧប្បត្តិហេតុថ្មីទំាងពីរបានកើតមានឡើង តែប៉ុន្មានថ្ងៃប៉ុណ្ណោះ ក្រោយពីការចូលកាន់តំណែងរបស់លោកឧត្តមសេនីយ David Petraeus ក្នុងនាមជាមេបញ្ជាការ ថ្មីរបស់កម្លំាងអូតង់ប្រចំាប្រទេសអាហ្វហ្កានីស្តង់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ គួច គន្ធារ៉ា
មេបញ្ជាការរបស់កម្លំាងអូតង់ប្រចំាប្រទេសអាហ្វហ្កានីស្តង់ត្រូវបានផ្លាស់ប្តូរជាហូហែរ តែមិនបានធ្វើឲ្យកំហឹងរបស់ប្រជាជនចុះថយទេ។ វាជារឿងមួយកម្រកើតមានណាស់នៅក្នុងប្រទេសអាហ្វហ្កានីស្តង់ ដែលប្រជាជននំាគ្នាធ្វើបាតុកម្ម។ ក៏ប៉ុន្តែ គឺកំហុសឆ្គងម្តងហើយ ម្តងទៀតរបស់កម្លំាងអូតង់ដែលបណ្តាលឲ្យស្លាប់ជនស៊ីវិលនាប៉ុន្មានថ្ងៃចុងក្រោយនេះហើយ ដែលបានជម្រុញពួកគេឲ្យចុះផ្លូវធ្វើបាតុកម្មប្រឆំាង មិនអាចទប់កំហឹងបាន។
បើសិនជាកម្លំាងអូតង់នៅតែបន្តប្រព្រឹត្តខុសរបៀបនេះតទៅទៀតនោះ គឺយុទ្ធសាស្រ្តរបស់កម្លំាងអូតង់តែម្តង ដែលកំពុងចោទជាបញ្ហា។ កន្លងមក ជាមួយលោកអតីតមេបញ្ជាការអូតង់ McChrystal លោកធ្លាប់បានសន្យាច្រើនលើក ច្រើនសាថា នឹងព្យាយាមធ្វើយ៉ាងណាកុំឲ្យមានការបាត់បង់ជីវិតជនស៊ីវិល នាឱកាសយុទ្ធនាការវាយប្រហារទៅលើពួកឧទ្ទាមតាលីបង់។ អ្វីដែលលោក McChrystal ចង់បាន គឺចង់ឲ្យមានសហការរបស់ប្រជាជនក្នុងការប្រឆំាងនឹងពួកបះបោរ។ តែទីបំផុត យុទ្ធសាស្រ្តរបស់លោក McChrystal នៅតែមិនអាចជៀសពីការបាត់បង់ជីវិតជនស៊ីវិលស្លូតត្រង់។ ទង្វើនេះ ត្រូវបានលោកប្រធានាធិបតីអាហ្វហ្កានីស្តង់Hamid Karzaï បញ្ចេញប្រតិកម្មប្រឆំាងយ៉ាងខ្លំាងក្លា។
គឺនៅត្រង់ចំណុចនេះហើយដែលកាលពីដើមខែកក្កដានេះ លោក McChrystal ត្រូវបានលោកប្រធានាធិបតីអាមេរិក Barack Obama ដកចេញ ដោយដាក់ជំនួសលោកឧត្តមសេនីយ David Petraeus។ ក៏ប៉ុន្តែចូលកាន់តំណែងមិនបានប៉ុន្មានថ្ងៃផង ស្រាប់តែរឿងច្រំដែលចាប់ផ្តើមកើតជាថ្មីទៀត។ ជាថ្មីម្តងទៀត និងឲ្យតែមានស្លាប់ជនស៊ីវិលក្រោមគ្រាប់បែករបស់កម្លំាងអូតង់ម្តងៗ លោកប្រធានាធិបតីអាហ្វហ្កានីស្តង់Hamid Karzaï មិនញញើតនឹងប្រើពាក្យធ្ងន់ៗស្ដីបន្ទោសទេ។ តែបញ្ហានៅត្រង់ថា លោក Hamid Karzaï និងមេបញ្ជាការថ្មីរបស់កម្លំាងអូតង់គ្មានជម្រើសអ្វី ក្រៅពីរួមសហការគ្នាដើម្បីធ្វើយ៉ាងណា រកច្រកចេញពីវិបត្តិដែលកំពុងផុងកាន់តែជ្រៅទៅៗ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ