ការចោទប្រកាន់ថ្មីប្រឆាំងនឹងសកម្មភាពក្រុមហ៊ុនតូតាល់នៅភូមា
អង្គការក្រៅរដ្ឋាភិបាលអាមេរិកមួយ ទទួលបន្ទុកសិទ្ធិមនុស្សនៅភូមា EarthRight International បានចេញសេចក្តីថ្លែងការណ៍ចោទប្រកាន់ក្រុមហ៊ុនប្រេងចំនួនបួន ដែលរកស៊ីផលិតឧស្ម័ននៅក្នុងប្រទេសភូមា ក្នុងនោះមានក្រុមហ៊ុនបារាំង តូតាល់ និងក្រុមហ៊ុនអាមេរិក Chevron ថា បានជួយរបបសឹកភូមាឲ្យសម្រេចមហិច្ឆតានុយក្លេអ៊ែរ តាមរយៈប្រាក់ចំណូលនៃឧស្ម័នធម្មជាតិ។ ក្រុមហ៊ុនទាំងនោះសុទ្ធសឹងតែជាប់ពាក់ព័ន្ធនឹងអំពើឧក្រិដ្ឋ រំលោភសិទ្ធិមនុស្ស និងការប្រើកម្លាំងពលកម្មដោយបង្ខំ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍ របស់ អៀង សុខម៉ិញ
រំលោភសិទ្ធិមនុស្ស ធ្វើការដោយបង្ខំ ដៅកម្ចាត់អ្នកភូមិ ជួយឧបត្តម្ភហិរញ្ញវត្ថុដល់របបសឹក និងជួយជំរុញឲ្យមានមហិច្ឆតានុយក្លេអ៊ែរ ទាំងនេះសុទ្ធសឹងជាការចោទប្រកាន់របស់អង្គការសិទ្ធិមនុស្សអាមេរិក EarthRight International នៅក្នុងរបាយការណ៍ចុងក្រោយរបស់ខ្លួន បន្ទាប់ពីបានសិក្សាស្រាវជ្រាវអស់រយៈពេលពីរឆ្នាំមក។
ពីឆ្នាំ ១៩៩៨ ដល់ឆ្នាំ ២០០៩ ប្រាក់ចំណូលដែលបានមកពីការផលិតឧស្ម័ន នៅមជ្ឈមណ្ឌល “យ៉ាដាណា” ភាគខាងត្បូងប្រទេសភូមា មានតម្លែប្រមាណជាង៩ពាន់លានដុល្លារ។ ភាគផលជាងពាក់កណ្តាលនៃប្រាក់ចំណូលនេះ (៤៥០០លាន) ត្រូវបានទៅរបបសឹក តាមទ្រង់ទ្រាយពីរយ៉ាង ៖ ម្យ៉ាងជាថាមពលហ្កាសសម្រាប់បម្រើការក្នុងស្រុក ដែលមានតម្លែជាទឹកប្រាក់ ៩១៥លានដុល្លារអាមេរិក និង ៣៦៨៤លាន ជាលុយសុទ្ធ។ ហេតុដូច្នេះហើយបានជារបបផ្តាច់ការភូមាអាចបន្តសាបព្រោះអំពើ ផ្តាច់ការ រំលោភសិទ្ធិមនុស្ស និងចំណាយទៅកម្មវិធីនុយក្លេអ៊ែរដោយខុសច្បាប់។ នេះបើយោងតាមរបាយការណ៍របស់អង្គការ EarthRight International ដដែល។
“យ៉ាដាណា” ជាអណ្តូងឧស្ម័ន និងជាសម្បត្តិធម្មជាតិដ៏មហាសាលរបស់ភូមា ដែលមានក្រុមហ៊ុនចំនួនបួនកំពុងកាន់កាប់ គឺក្រុមហ៊ុនប្រេងតូតាល់បារាំង ៣១% ក្រុមហ៊ុនChevron អាមេរិក២៨% ក្រុមហ៊ុនប្រេង PTTEPថៃ ២៥% និងក្រុមហ៊ុនភូមា MOGE ១៥%។
ប្រឈមនឹងចេតនាចង់បង្កើតកម្មវិធីនុយក្លេអ៊ែរ អាវុធបរមាណូ និងការជួញដូរអាវុធខុសច្បាប់របស់របបសឹកភូមា អង្គការ EarthRight International ទាមទារឲ្យសហគមន៍អន្តរជាតិចាប់អារម្មណ៍នឹងប្រាក់ចំណូលដែលបានមកពីធនធានហ្កាសនេះ ព្រោះវាអាចជាមធ្យោបាយសំខាន់មួយក្នុងការដាក់គំនាបលើរបបយោធាភូមា។
អង្គការក៏បានចោទប្រកាន់ជាថ្មីក្រុមហ៊ុនបារាំងនិងអាមេរិក ថាកំពុងតែបង្កគ្រោះថ្នាក់ តាមរយៈការប្រើប្រាស់កម្លាំងពលកម្មក្នុងស្រុកដោយបង្ខំ និងកំពុងតែប្រឈមនឹងបទឧក្រិដ្ឋព្រហ្មទណ្ឌមួយចំនួនទៀត។ ក្នុងន័យនេះអង្គការមិនប្រាថ្នាឲ្យក្រុមហ៊ុនបរទេសទាំងបីដកខ្លួនថយចេញពីប្រទេសភូមាទេ តែទាមទាររកយុត្តិធម៌ដល់អ្នកដែលត្រូវគេរំលោភសិទ្ធិ និងសូមឲ្យប្រាក់ចំណូលពីធនធានធម្មជាតិបានចែកចាយដល់បណ្តាជនភូមាផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ