អំពើភេរវកម្មអត្តឃាត ២កន្លែង នៅទីក្រុង Lahore
ប៉ាគីស្តង់បានទទួលរងអំពើភេរវកម្មអត្តឃាត២កន្លែង នៅថ្ងៃព្រហស្បតិ៍១កក្កដាម្សិលមិញ។គឺមតិចេតិយនៃសន្តបុគ្គលអ៊ីស្លាម ដែលជាទីដៅនៃការវាយប្រហារ នៅលើកនេះ។នៅទីក្រុងLahore ខាងកើតប្រទេស អត្តឃាតជនពីរនាក់បានធ្វើឱ្យផ្ទុះគ្រាប់បែកដាក់ជាប់នឹងខ្លួន នៅក្នុងពហុដ្ឋានមួយដែលជាផ្នូររបស់សន្តបុគ្គលData Ganj Bakhsh។ ជាអំពើភេរវកម្មឃោរឃៅ និងសម្លាប់រង្គាល គឺបណ្តាលឲ្យស្លាប់ជន ៤២នាក់ និងរបួសយ៉ាងតិច ១៧០នាក់។ អំពើភេរវកម្មនេះ ពុំត្រូវបានចលនាណាមួយប្រកាសទទួលស្គាល់ជាស្នាដៃរបស់ខ្លួនទេ ប៉ុន្តែ ទីក្រុងLahoreបានទទួលរងតាំងពីច្រើនខែមកហើយ នូវអំពើភេរវកម្មជាបន្តបន្ទាប់គ្នាធ្វើដោយពួកតាលីបង់ ដែលមានទំនាក់ទំនងទៅនឹងបណ្តាញភេរវនិយមអាល់កៃដា។
ចុះផ្សាយនៅថ្ងៃ៖ កែប្រែថ្ងៃទី៖
ការរាយការណ៍របស់Benoît Bringerពីទីក្រុងIslamabad ប្រែសម្រួលដោយវីនស្តុន រតនា
ជនរាប់ពាន់នាក់បានប្រមូលផ្តុំគ្នា ដូចជារាល់ល្ងាចថ្ងៃព្រហស្បតិ៍អ៊ីចឹង នៅក្នុងមតចេតិយដ៏ធំធេងនៃមជ្ឈមណ្ឌលជាប្រវត្តិសាស្រ្តនៃទីក្រុង Lahore ស្រាប់តែអត្តឃាតជនពីរនាក់បានធ្វើឲ្យផ្ទុះគ្រាប់បែកដាក់ជាប់នឹងខ្លួន ជាបឋមនៅក្នុងទីធ្លា បន្ទាប់មកនៅក្រោមដី ជាទីដែលដូចរាល់សប្តាហ៍អ៊ីចឹង ជនដែលមានជំនឿស៊ប់ក្នុងសាសនាអ៊ីស្លាម រាប់រយនាក់ដោយភាវនាបណ្តើរ ដោយស្តាប់ភ្លេងSoufiបណ្តើរ។
ការផ្ទុះមានលក្ខណៈខ្លាំងណាស់ ជាហេតុបណ្តាលឲ្យមានអ្នករបួសច្រើន ពីព្រោះដូចតាមទំលាប់របស់ខ្លួន ពួកអត្តឃាតជនបានដុតបញ្ឆេះគ្រឿងផ្ទុះដែលពោរពេញទៅដោយគ្រាប់ឃ្លី ធ្វើពីដែកថែប និងដែកគោល។
មតចេតិយនេះដែលជាផ្នូររបស់អ្នកកាន់សាសនាអ៊ីស្លាមម្នាក់ ជាទីគោរពសក្ការៈបូជា របស់ពួក Soufi ជាចលនាអ៊ីស្លាម ដែលត្រូវពួកតាលីបង់ចាត់ទុកថា ផ្ទុយនឹងសាសនាអ៊ីស្លាម។
ប្រសិនបើនៅខណៈនេះ ពួក Soufiពុំបានប្រកាសថា អំពើភេរវកម្មនេះ ជាស្នាដៃរបស់ខ្លួននោះទេ នោះពួកគេ កាលចុងខែឧសភាមុន នៅទីក្រុង Lahoreដដែល បានវាយប្រហារទៅលើវិហារសាសនាឥស្លាម នៃនិកាយសាសនាភាគតិច គឺពួក Ahmadis ដែលបានបណ្តាលឲ្យស្លាប់ជន ៨០នាក់។
ការវាយប្រហារនេះធ្វើនៅចំថ្ងៃដែលអាជ្ញាធរមានក្តីសោមនស្សរីករាយក្នុងចិត្ត ពីព្រោះនៅខែមិថុនាជាខែទីមួយ ចាប់តាំងពី២ឆ្នាំមកហើយដែលគ្មានអំពើភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ