កូរ៉េខាងត្បូងទាត់ចោលការចរចាជាមួយទីក្រុងផ្យុងយ៉ាងពាក់ព័ន្ធនឹងការបាញ់ពន្លិចនាវាចម្បាំង
នៅថ្ងៃព្រហស្បតិ៍នេះប្រទេសកូរ៉េខាងត្បូងបានទាត់ចោលការចរចាយោធាដោយផ្ទាល់ជាមួយប្រទេសកូរ៉េខាងជើង។ កិច្ចចរចាដែលស្នើដោយទីក្រុងផ្យុងយ៉ាងដើម្បីធ្វើការបំភ្លឺទៅលើ សភាពការណ៍នៃការលិចនាវាចម្បាំងកូរ៉េខាងត្បូងនៅចុងខែមីនាកន្លងទៅ នេះ ដែលទីក្រុងសេអ៊ូលបានចោទទីក្រុងផ្យុងយ៉ាងថាអ្នកបានបាញ់ពន្លិច។
ចុះផ្សាយនៅថ្ងៃ៖
សេចក្តីរាយការណ៍របស់ សៀក សារិន
នៅក្នុងលិខិតមួយដែលទីក្រុងផ្យុងយ៉ាងផ្ញើទៅជូនអ្នកការទូតនៃប្រទេសម៉ិចស៊ិកដែលត្រូវឡើងមកធ្វើជាប្រធានក្រុមប្រឹក្សាសន្តិសុខនៃអង្គការសហប្រជាជាតិនៅខែមិថុនា បានស្នើឲ្យមានកិច្ចចរចាយោធាដោយផ្ទាល់ជាមួយទីក្រុងសេអ៊ូល ពាក់ព័ន្ធនឹងការលិចនាវាចម្បាំងកូរ៉េខាងត្បូងនៅចុងខែមីនាកន្លងទៅនេះ ដែលទីក្រុងសេអ៊ូលបានចោទទីក្រុងផ្យុងយ៉ាងថាអ្នកបានបាញ់ពន្លិច។
ការអង្កេតអន្តរជាតិមួយនៅចុងខែឧសភាកន្លងទៅបានសន្និដ្ឋានថាកូរ៉េខាងជើងជាអ្នកបានបាញ់ពន្លិចនាវាចម្បាំងកូរ៉េខាងត្បូង។ ក៏ប៉ុន្តែកូរ៉េខាងជើងបានបដិសេធទាំងស្រុងការទទួលខុសត្រូវទៅលើការលិចនាវាកូរ៉េខាងត្បូងដែលបានបណ្តាលឲ្យនាវិកកូរ៉េខាងត្បូង៤៦នាក់ស្លាប់។
ប្រទេសកូរ៉េខាងត្បូងក៏បានប្តឹងទៅក្រុមប្រឹក្សាសន្តិសុខនៃអង្គការសហជាជាតិ ហើយទាមទារឲ្យអ ស ប ដាក់ទណ្ឌកម្មទៅលើទីក្រុងផ្យុងយ៉ាង។ ប៉ុន្តែទីក្រុងប៉េកាំងដែលតែងជាអ្នកគាំទ្រប្រទេសកូរ៉េខាងជើង ពុំចង់ឃើញឡើយមានទណ្ឌកម្មដាក់ទៅលើទីក្រុងផ្យុងយ៉ាងដោយអ ស ប ។ សូមគូសបញ្ជាក់ថា ឯកអគ្គរដ្ឋទូតនៃប្រទេសកូរ៉េខាងជើងធ្លាប់បានព្រមានកាលពីថ្ងៃទី១៥មិថុនាកន្លងទៅថា ទីក្រុងផ្យុងយ៉ាងនឹងបញ្ចេញប្រតិកម្មយោធាបើប្រសិនជាមានការថ្កោលទោសពី ក្រុមប្រឹក្សាសន្តិសុខនៃអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ