អានុភាពខ្លាំងក្លារបស់ចិនធ្វើឲ្យសាធារណៈមតិពិភពលោកបារម្ភ
ការលេចឡើងនូវអានុភាពខ្លាំងក្លា របស់ប្រទេសចិនក្នុងវិស័យយោធានិងវិស័យសេដ្ឋកិច្ចបានធ្វើឲ្យ សាធារណមតិនៃប្រទេសលោកខាងលិចកើតមានក្តីបារម្ភ។ ជាពិសេសនៅប្រទេសបារាំងនិងនៅប្រទេសអាល្លឺម៉ង់។ នេះបើយោងតាមការស្ទាបស្ទង់មតិដែលបានផ្សព្វផ្សាយឲ្យដឹងនៅថ្ងៃ ព្រហស្បតិ៍នេះនៅសហរដ្ឋអាមេរិកដោយវិជ្ជាស្ថានPew Research Centre។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
អានុភាពកាន់តែខ្លាំងក្លាឡើងរបស់ប្រទេសចិនក្នុងវិស័យយោធាគឺជាការមួយពុំល្អសោះឡើយសម្រាប់ប្រជាជនជប៉ុន៨៨% ហើយនិង៨៦%សម្រាប់ប្រជាជនកូរ៉េដែលជាប្រទេសជិតខាងរបស់ប្រទេសចិន។ សម្រាប់ប្រទេសលោកខាងលិចដូចជាប្រជាជនបារាំងវិញ មាន៨៧%យល់ថាជាការពុំល្អ ទល់នឹង៧៩%សម្រាប់ប្រជាជនអាមេរិកហើយនិង៧២%សម្រាប់ប្រជាជនអាល្លឺម៉ង់។
ចំណែកឯប្រជាជនបារាំងវិញ គេមានការបារម្ភខ្លាំងនឹងសន្ទុះកំណើនសេដ្ឋកិច្ចដ៏ខ្លាំងក្លារបស់ប្រទេសចិន ដោយសាធារណមតិបារាំងមានដល់ទៅ៦៧%ដែលយល់ថាជាការពុំល្អសម្រាប់ពួកគេ ទល់នឹង៥៨%សម្រាប់ប្រជាជនអាល្លឺម៉ង់ ៤៧%សម្រាប់ប្រជាជនអាមេរិក ហើយនិង៤២%សម្រាប់ប្រជាជនអង់គ្លេស។
ផ្ទុយទៅវិញ ពាក់ព័ន្ធនឹងបញ្ហាសន្ទុះកំណើនសេដ្ឋកិច្ចចិននេះ ប្រជាជនជប៉ុនដែលបានធ្វើការបោះទុនវិនិយោគច្រើននៅប្រទេសចិនយល់ឃើញថា ជាការល្អប្រពៃមានដល់ទៅ៦១%ទល់នឹង២៩%ដែលយល់ឃើញខុសពីនេះ។
សាធារណមតិនៃប្រទេសអាហ្វ្រិកនៅចំពោះមុខជោគជ័យនៃសេដ្ឋកិច្ចចិនវិញ៖ ប្រជាជនKenyaនិងប្រជាជនNigeriaដល់ទៅ៩០%ឯណោះដែលយល់ថា ជាការល្អសម្រាប់ពួកគេ ដោយហេតុថានារយៈពេលប៉ុន្មានឆ្នាំចុងក្រោយនេះប្រទេសចិនបានទៅបោះទុនធ្វើវិនិយោគយ៉ាងក្រាស់ក្រែលនៅទ្វីបអាហ្វ្រិក។
នៅលើវិស័យភូមិសាស្ត្រនយោបាយវិញ ប្រទេសឥណ្ឌាជាអ្នកមានការប្រយ័ត្នប្រយែងជាងគេ។ ដោយហេតុថាមានប្រជាជនឥណ្ឌាដល់ទៅ៤៤%ឯណោះដែលយល់ថា ប្រទេសចិនជាសត្រូវរបស់ពួកគេ។ ផ្ទុយទៅវិញ ប្រជាជនប៉ាគីស្តង់ដែលមាននិន្នាការលំអៀងទៅរកប្រទេសចិនយល់ថា ប្រទេសចិនជាដៃគូរបស់ពួកគេដល់ទៅ៨៤%។ ដូចគ្នាអ៊ីចឹងដែរសម្រាប់ប្រជាជនKenyaនៅទ្វីបអាហ្វ្រិក។
រីឯនៅសហរដ្ឋអាមេរិកវិញ មានប្រជាជនអាមេរិកាំងប្រមាណ២៥%យល់ថាប្រទេសចិនជាដៃគូរបស់ខ្លួន ហើយមានប្រជាជនអាមេរិកាំងប្រមាណ១៧%ដែលយល់ថា ប្រទេសចិនជាសត្រូវរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ