ក្រុមប្រឹក្សាសន្តិសុខ អ.ស.ប អំពាវនាវកូរ៉េទំាងពីរឲ្យបិទបញ្ចប់កាយវិការនំាឲ្យផ្ទុះសង្រ្គាម
កាលពីថ្ងៃច័ន្ទទី១៤ មិថុនា ឆ្នំា ២០១០ កូរ៉េខាងត្បូង និងកូរ៉េខាងជើងបានលើកយកភស្តុតាងជាច្រើនទៅបង្ហាញក្រុមប្រឹក្សាសន្តិសុខអង្គការសហប្រជាជាតិ ស្តីពីព្រឹត្តិការណ៍លិចនាវាចម្បំាងកូរ៉េខាងត្បូងកាលពីថ្ងៃទី ២៦ មីនាកន្លងទៅ ដែលបានបណ្តាលឲ្យបាត់បង់ជីវិតទាហានកូរ៉េខាងត្បូងចំនួន ៤៦នាក់។ ដូចដែលបានព្រាងទុក ទីក្រុងសេអ៊ូបានបង្ហាញភស្តុតាងជាច្រើនដែលបញ្ជាក់ពីការទទួលខុស ត្រូវរបស់ទីក្រុងព្យុងយ៉ាង។ តែទីក្រុងព្យុងយ៉ាងបានបដិសេធយ៉ាងដាច់ណាត់។ អ្វីជាការកត់សម្គាល់ ទឡ្ហីករណ៍របស់កូរ៉េខាងត្បូងហាក់ដូចជាច្បាស់ជាងទឡ្ហីករណ៍ដែលលើក ឡើងដោយកូរ៉េខាងជើង។ យ៉ាងណាក៏ដោយ ក្រុមប្រឹក្សាសន្តិសុខអង្គការសហប្រជាជាតិមិនទាន់បានសម្រេចអ្វីទេ តែបានអំពាវនាវកូរ៉េទំាងពីរឲ្យ បិទបញ្ចប់កាយវិការនំាឲ្យផ្ទុះសង្រ្គាមជាថ្មីរវាងគ្នា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ គួច គន្ធារ៉ា
បើយោងតាមក្រុមអ្នកការទូត ការជជែកតទល់គ្នារវាងកូរ៉េខាងត្បូង និងកូរ៉េខាងជើងនៅចំពោះក្រុមប្រឹក្សាសន្តិសុខអង្គការសហប្រជាជាតិ បានធ្វើឲ្យកូរ៉េខាងត្បូងមានប្រៀបជាងកូរ៉េខាងជើង។ មានប្រៀបជាងនៅត្រង់ថា គ្រប់ភស្តុតាងជាខ្សែអាត់វីដេអូក្តី ឬមួយជាសាក្សីរបស់ក្រុមអ្នកឯកទេសបរទេសក្តី សុទ្ធតែបានបង្ហាញពីការទទួលខុសត្រូវរបស់កូរ៉េខាងជើង ថាជាអ្នកដែលបានបាញ់ពន្លិចនាវាចម្បំាងកូរ៉េខាងត្បូងកាលពីថ្ងៃទី ២៦ មីនាកន្លងទៅ។ ចំពោះប្រទេសបារំាងដែលមានវត្តមាននៅក្នុងកិច្ចប្រជុំនោះបានអះអាងថា បើយោងតាមភស្តុតាងដែលបង្ហាញដោយភាគីកូរ៉េខាងត្បូង កូរ៉េខាងជើងពិតជាអ្នកបានបាញ់ពន្លិចនាវាចំបំាងកូរ៉េខាងត្បូង ដោយគ្មានអ្វីគួរមន្ទិលសង្ស័យទៀតទេ។
ក្រឡេកទៅមើលការអះអាងរបស់កូរ៉េខាងជើងវិញម្តង ភស្តុតាងដែលបានបង្ហាញដោយលោក Sin Son-ho ឯកអគ្គរដ្ឋទូតកូរ៉េខាងជើងប្រចំានៅអង្គការសហប្រជាជាតិ ហាក់ដូចជាមិនបានធ្វើគេជឿទុកចិត្តបានឡើយ។ លោក Sin Son-ho មិនបានឆ្លើយទៅនឹងសំណួររបស់ក្រុមប្រឹក្សាសន្តិសុខអង្គការសហប្រជាជាតិទេ តែបែរជាបាននិយាយច្រំដែលៗថា កូរ៉េខាងជើងមិនមែនជាអ្នកបាញ់ពន្លិចនាវាចម្បំាងកូរ៉េខាងត្បូងនោះទេ។ សម្រាប់លោក Sin Son-ho កូរ៉េខាងជើងជាអ្នករងគ្រោះនៅក្នុងឧប្បត្តិហេតុនោះទៅវិញ។
យ៉ាងណាក៏ដោយ សហគមន៍អន្តរជាតិបានស្នើឲ្យក្រុមប្រឹក្សាសន្តិសុខអង្គការសហប្រជាជាតិចាត់វិធានការតឹងរ៉ឹងមួយនៅក្នុងសំណុំរឿងនេះ។ តែដូចជាសព្វមួយដង ប្រទេសចិនបានចេញមុខការពារកូរ៉េខាងជើងដែលជាសម្ព័ន្ធមិត្តរបស់ខ្លួន។ ក្នុងខណៈនេះ ក្រុមប្រឹក្សាសន្តិសុខអង្គការសហប្រជាជាតិមិនទាន់បានសម្រេចអ្វីទេ តែបានអំពាវនាវកូរ៉េទំាងពីរឲ្យបិទបញ្ចប់កាយវិការដែលឈានដល់ការផ្ទុះសង្រ្គាមជាថ្មីរវាងគ្នា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ