ភេរវកម្មទៅលើរថភ្លើង មានស្លាប់យ៉ាងតិច៧០នាក់
មានស្លាប់យ៉ាងតិច៧០នាក់ និងរបួសជាង១០០នាក់ ដោយហេតុតែអំពើភេរវកម្មមួយ ដែលបានបណ្តាលឲ្យរទេះភ្លើងពីរខ្សែបើកបុកគ្នា។ គ្រោះថ្នាក់បង្កដោយភេរវកម្មនេះបានកើតឡើង នៅថ្ងៃសុក្រទី២៨ឧសភា នៅលើផ្លូវដែកដែលតភ្ជាប់ទីក្រុងកាលគូតា (Calcuta) និងទីក្រុងបូមបៃ(Bombay)។ ពួកប្រដាប់អាវុធមួយក្រុម ដែលស្និទ្ធនឹងពួកទ័ពព្រៃម៉ៅនិយមទើបតែបានអះអាងថា ជាអ្នកនៅពីក្រោយភេរវកម្មនេះ។
ចុះផ្សាយនៅថ្ងៃ៖
សេចក្តីរាយការណ៍របស់តាន់ ហ្សង់-ហ្រ្វង់ស័រ
នៅម៉ោង១ភ្លឺលើសបន្តិចបន្តួច រថភ្លើងល្លឿនខ្លាំងមួយគ្រឿងដែលតភ្ជាប់កាលគូតា និងបូមបៃ បានភ្លូកក្រឡាប់ ប្រហែលមកពីមានគ្រាប់បែកផ្ទុះ។
ទូរទេះភ្លើងជាងដប់ពេញព្រៀបទៅដោយអ្នកដំណើរដែលកំពុងដេក បានក្រឡាប់ទៅលើផ្លូវដែក ហើយត្រូវរថភ្លើងមួយខ្សែផ្សេងដែលបើកបញ្ច្រាស់ទិសគ្នាកិនពីលើ។ គ្រោះថ្នាក់បានកើតឡើង នៅក្នុងតំបន់ដាច់ស្រយ៉ាលគ្មានថ្នល់ចូលទៅដល់ ជាហេតុធ្វើឲ្យប្រតិបត្តិការជួយសង្គ្រោះ ពិបាកនឹងប្រព្រឹត្តទៅបានឲ្យទាន់ពេលវេលា។
លោកស្រីរដ្ឋមន្រ្តីក្រសួងដឹកជញ្ជូនឥណ្ឌា ដែលបានទៅដល់ទីកន្លែងកើតហេតុ អះអាងថា គឺជាភេរវកម្មមួយដែលត្រូវបានបង្កឡើងដោយពួកទ័ពព្រៃម៉ៅនិយម។ គួរនិយាយថា គ្រោះថ្នាក់បានកើតឡើង នៅក្នុងស្រុកមួយក្នុងរដ្ឋបាំងហ្កាល់ខាងលិចដែលជាដែនអំណាចរបស់ពួកទ័ពព្រៃកុម្មុយនិស្ត។
ប៉ុន្មានខែចុងក្រោយនេះ ពួកទ័ពព្រៃម៉ៅនិយម បាននិងកំពុងបន្តបង្កើនការវាយប្រហារ ដើម្បីឆ្លើយតបវិញ ទៅនឹងប្រតិបត្តិការយោធាដ៏ធំធេងរបស់កងទ័ពឥណ្ឌា។ កាលពីជាងដប់ថ្ងៃមុន នៅក្នុងរដ្ឋជិតខាងមួយ ឡានដឹកអ្នកដំណើរមួយគ្រឿងបានបើកកិនគ្រាប់មីន ជាហេតុបានបណ្តាលឲ្យមានអ្នកស្លាប់៣៥នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ