រដ្ឋាភិបាលថៃសម្រេចពន្យាបំរាមគោចរចំនួន ៣យប់បន្ថែមទៀត នៅបាងកក និងខេត្តចំនួន ២៣
នៅថ្ងៃពុធ ទី១៩ ឧសភានេះ កងទ័ពបានបើកប្រតិបត្តិការវាយបំបែកជំរំរបស់ពួកអាវក្រហមនៅក្នុង សង្កាត់ Rachaprosong។ ជំរំដែលពួកគេបានកាន់កាប់អស់រយៈពេលជាច្រើនសប្តាហ៍មកហើយ។ ខណៈនេះ ប្រតិបត្តិការបានបញ្ចប់ហើយ ដោយកងទ័ពបានចូលកាន់កាប់ជំរំនោះទំាងស្រុង។ ចំណែកឯក្រុមមេអាវក្រហមវិញ មានអ្នកខ្លះបានប្រគល់ខ្លួនឲ្យប៉ូលិស និងអ្នកខ្លះទៀតបានរត់ផាសក្រញំា។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គួច គន្ធារ៉ា
ប្រតិបត្តិការរបស់កងទ័ពបានចាប់ផ្តើមនៅម៉ោង ៦ស្រាងៗព្រឹកមិញ ម៉ោងក្នុងទីក្រុងបាងកក។ ប្រតិបត្តិការដំបូងបង្អស់ គឺកងរថក្រោះបានបរចូលទៅកំទេចរបំាងឫស្សី កង់ឡាន និងខ្សែលួសដែលពួកអាវក្រហមបានដាក់ព័ទ្ធជុំវិញជំរំរបស់ពួកគេ។ ទន្ទឹមគ្នានោះ ទ័ពថ្មើរជើងក៏បានផ្តើមរំកិលខ្លួនបន្តិចម្តងៗ ជាមួយនឹងការបាញ់កំាភ្លើងឡើងលើបង្ហើរត្រឹមកំពស់មនុស្សដើម្បីជាការសម្លុត គំរាម បំបាក់ស្មារតី។ ពេលនោះនៅក្នុងជំរំ គេកត់សម្គាល់ឃើញមានបាតុករប្រមាណតែពី ២០០០ ទៅ ៣០០០នាក់ប៉ុណ្ណោះ ដែលកំពុងស្ថិតនៅទីនោះ ហើយដែលភាគច្រើន ជាស្រ្តី និងកូនក្មេង។ ដំបូងឡើយ ពួកអាវក្រហមដៃដល់ជាច្រើននាក់ក៏បានត្រៀមខ្លួនដើម្បីតទល់វិញដែរ ដោយប្រើដបសំាង និងមានទំាងគ្រាប់បែបមែនទែនផង។ ចំណែកឯអ្នកផ្សេង ពិសេសស្ត្រីៗបាននំាគ្នាស្រែកច្រៀងចម្រៀងតស៊ូដើម្បីជួយលើកទឹកចិត្តដល់គ្នីគ្នាគេ កុំឲ្យតក់ស្លុត បាក់ស្មារតី ជាមួយនឹងបដាសរសេរថា « ឈប់សម្លាប់ប្រជាជនស្លូតត្រង់ទៅ »។
បន្ទាប់ពីបានប្រឈមមុខដាក់គ្នាអស់មួយព្រឹកធំមក ស្រាប់តែក្រុមមេអាវក្រហមបានប្រកាសសុំទម្លាក់អាវុធ និងប្រកាសបិទបញ្ចប់ក្បួនបាតុកម្ម។ ការប្រកាសសុំចាញ់បានធ្វើឡើងនៅប្រហែលម៉ោង ១រសៀល ម៉ោងក្នុងទីក្រុងបាងកក។ ជាមួយគ្នានេះ មានមេអាវក្រហមខ្លះ បានប្រគល់ខ្លួនឲ្យរដ្ឋអំណាច និងខ្លះទៀតបានរត់ផាសក្រញំាបាត់។ ទូរទស្សន៍ជាតិក្នុងស្រុកថែមទំាងបានបង្ហាញមុខមេអាវក្រហម៤នាក់ដែលកំពុងស្ថិតនៅប៉ុស្តិ៍ប៉ូលិស។
គួរជម្រាបជូនថា ទន្ទឹមគ្នានឹងម៉ោងបើកប្រតិបត្តិយោធាលើជំរំពួកអាវក្រហម រដ្ឋាភិបាលក៏បានដាក់ពង្រាយកម្លំាងបាញ់ស៊ីបមួយក្រុមដែលមានគ្នាចំនួន ១០០០នាក់។ ក្រុមកម្លំាងបាញ់ស៊ីបបានទទួលបញ្ជាពីរដ្ឋាភិបាល ឲ្យបាញ់ទៅលើជនណាដែលកំពុងដុតបំផ្លាញ ឬមួយក៏កំពុងបះបោរឲ្យមានការឆក់ប្លន់នៅតាមហាងទំនិញនានានៅតាមដងផ្លូវក្នុងទីក្រុងបាងកក។ និយាយពីចំនួនមនុស្សស្លាប់ និងរងរបួសវិញ តួលេខបណ្តោះអាសន្នចុងក្រោយ គឺមានមនុស្សស្លាប់ ៦នាក់ ក្នុងនោះ មានម្នាក់ជាអ្នកកាសែតជនជាតិអ៊ីតាលី។ មានអ្នករងរបួសចំនួន ៥៨នាក់ ក្នុងនោះមានរបួសស្រាលអ្នកកាសែតជនជាតិហូឡង់ម្នាក់។
បំរាមគោចរត្រូវបានពន្យាចំនួន ៣យប់បន្ថែមទៀត នៅទីក្រុងបាងកក និងខេត្តចំនួន ២៣
ស្ថានការណ៍បានវិវឌ្ឍន៍ទៅយ៉ាងឆាប់រហ័ស ពិសេសចាប់ពីថ្ងៃរសៀលតែម្តង។ ក្រោយពីមេអាវក្រហមបានប្រកាសបិទបញ្ចប់ក្បួនបាតុកម្ម និងមានមួយក្រុមតូចបានប្រគល់ខ្លួនឲ្យរដ្ឋាភិបាលមក កងទ័ពក៏បានប្រកាសបិទបញ្ចប់ប្រតិបត្តិការរបស់ខ្លួនដែរ។ ខណៈនេះ ជំរំរបស់ពួកអាវក្រហមទំាងមូលក៏បានស្ថិតនៅក្រោមការកាន់កាប់របស់កម្លំាងទាហាន។ ចំណែកឯពួកបាតុករវិញ ក៏បានផ្តើមចាកចេញពីទីនោះជាបណ្តើរៗ ដោយរដ្ឋាភិបាលបានរៀបចំឡានក្រុងសម្រាប់ដឹកពួកគេ។ មួយវិញទៀត កម្លំាងបោសសំអាត ជាមួយម៉ាស៊ីនចូកក៏បានផ្តើមប្រមូលកង់ឡាន ឫស្សី និងសំរាមចេញពីជំរំជាបណ្តើរៗដែរ។ ប៉ុន្តែទន្ទឹមគ្នានេះ គេកត់សម្គាល់ឃើញមានការផ្ទុះអំពើហិង្សានៅកន្លែងផ្សេងទៀតដែលស្ថិតជុំវិញជំរំនោះ ពិសេសនៅប៉ែកខាងជើង។ នៅក្នុងទីក្រុងបាងកក មានការដុតអាគារប្រមាណជា ២០ ក្នុងនោះមានស្ថានីយ៍ទូរទស្សន៍មួយ និងមជ្ឈមណ្ឌលពាណិជ្ជកម្មជាច្រើនកន្លែងទៀត។ យ៉ាងណាក៏ដោយ រដ្ឋាភិបាលបានដាក់បំរាមគោចរក្នុងទីក្រុងបាងកកចាប់ពីម៉ោង ៨យប់ថ្ងៃទី ១៩ ឧសភា រហូតដល់ម៉ោង ៦ព្រឹកថ្ងៃព្រហស្បតិ៍ ទី ២០ ឧសភា។ លោករដ្ឋមន្រ្តីក្រសួងការពារជាតិបានប្រកាសថា បន្ទាប់ពីអ្នកធ្វើការ និងអ្នករកស៊ីបានត្រឡប់ទៅផ្ទះអស់ហើយ កម្លំាងទ័ព និងប៉ូលិសផ្តើមចាត់ការនឹងក្រុមជ្រុលនិយម និងក្រុមឆ្លៀតឱកាសនិយម។
មេអាវក្រហម៖ ចុះចាញ់មកពីមិនចង់ឃើញមនុស្សស្លាប់ថែមទៀត
នៅមិនទាន់មានព័ត៌មានច្បាស់ការណាមួយដែលបញ្ជាក់ពីភាពបរាជ័យរបស់ពួកអាវក្រហមទេ។ ប៉ុន្តែមេអាវក្រហមខ្លួនឯងបានលើកយកហេតុផលថា សុំចុះចាញ់ មកពីមិនចង់ឃើញមានការបាត់បង់ជីវិតមនុស្សបន្ថែមទៀត។ ចំពោះចំណាប់អារម្មណ៍របស់ក្រុមបាតុករវិញ មានអ្នកខ្លះក៏បានយល់ព្រមតាមមេរបស់គេ តែមានអ្នកខ្លះទៀតផ្តើមស្រក់ទឹកភ្នែក មិនយល់ស្របទេ។ បើយើងពិនិត្យមើលជារួមទៅ អាចមានហេតុផលមួយចំនួនដែលបញ្ជាក់ពីភាពបរាជ័យរបស់ពួកអាវក្រហម ទីមួយ៖ មកពីកម្លំាងរបស់ពួកអាវក្រហមបានចុះខ្សោយស្រាប់ផង ពិសេស តំាងពីកងទ័ពបានបិទខ្ទប់ច្រក ចេញចូលជំរំរបស់ពួកគេជិតមួយសប្តាហ៍កន្លងទៅនេះ។ បិទខ្ទប់កុំឲ្យមនុស្សនិងស្បៀងអាហារចូលផង កាត់ផ្តាច់ទឹក និងចរន្តអគ្គិសនីផង។ គឺតំាងពីពេលនោះមក ចំនួនបាតុករនៅក្នុងជំរំមានការថយចុះតិចទៅៗ ពីចំនួន ១ម៉ឺននាក់ ធ្លាក់ដល់ ៥ពាន់នាក់ ២ពាន់នាក់ និងនៅសល់ប្រមាណជាជាង ១០០០នាក់ នៅពេលកងទ័ពបើកការវាយប្រហារ។ ហេតុផលទីពីរ យុទ្ធសាស្រ្តរបស់កងទ័ពបានរៀបដូចយុទ្ធសាស្រ្តសង្គ្រាម ដែលធ្វើឲ្យពួកអាវក្រហមមិនអាចទ្រំាទ្របាន។
គួររម្លឹកជូនថា តំាងពីមានផ្ទុះអំពើហិង្សាកាលពីថ្ងៃទី ១៣ ឧសភាមក មានមនុស្សស្លាប់ ៣៩នាក់ និងរបួស ៣០០នាក់។ បើគិតតំាងពីថ្ងៃផ្តើមមានវិបត្តិកាលពីពាក់កណ្តាលខែមិនា ឆ្នំា ២០១០មក មានមនុស្សស្លាប់ ៦៨នាក់ និងរបួសប្រមាណ ១៧០០នាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ