បណ្តាញរកស៊ីផ្លូវភេទក្នុងក្លឹបប្រណិតៗនៅប៉េកាំងត្រូវចាប់ខ្លួន
បណ្តាញរកស៊ីពេស្យាចារនៃក្លឹបម៉ាស្សា ការាអូខេដ៏ប្រណិតៗ ជាង ១១០០ នាក់ត្រូវប៉ូលិសប៉េកាំងចាប់ខ្លួននៅថ្ងៃសុក្រនេះ។ ការចាប់ខ្លួនបណ្តាញរកស៊ីផ្លូវភេទនេះធ្វើឡើងក្នុងក្របខណ្ឌនៃ ការប្រយុទ្ធប្រឆាំងអំពើពេស្យាចារ ជួញដូរមនុស្ស។ នេះបើយោងតាមសារព័ត៌មានផ្លូវការចិននៅថ្ងៃសុក្រនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
ក្នុងរយៈពេលមួយខែនៃយុទ្ធនាការប្រយុទ្ធប្រឆាំងនឹងអំពើពេស្យាចារ រង្គសាល ក្លឹបកំសាន្តរាត្រី ការ៉ាអូខេ និង កន្លែងកែសម្ផស្សកាត់សក់ ម៉ាស្សា ដ៏ប្រណិតៗបំផុត នៅទីក្រុងប៉េកាំង ត្រូវបិទទ្វារជាបន្តបន្ទាប់។
ក្លឹបកំសាន្តទាំងនោះ សុទ្ធសឹងជាទីកន្លែងដែលប្រមូលផ្តុំទៅដោយភ្ញៀវអ្នកមាន ចំណាយប្រាក់មិនញញើតដៃ ដើម្បីទទួលបានសេវាពិសេស (សេវាបំរើផ្លូវភេទ)។ តម្លែសេវាទាបបំផុតគឺ ២ម៉ឺនយ័ន (២៣០០អឺរ៉ូ)។ បើតាមប៉ូលិសក្រុងប៉េកាំង អ្នកចាត់ចែងដឹកនាំក្លឹបទាំងនោះ ភាគច្រើន ជាជនទុច្ចរិត និងជាឧក្រិដ្ឋជន។
គ្រាន់តែនៅក្នុងសង្កាត់ Chaoyong កណ្តាលទីក្រុងប៉េកាំងតែមួយ មានរង្គសាល ចំនួន ៣៥ សាឡុងកាត់សក់ចំនួន ២៦៥ត្រូវបិទទ្វារជាបណ្តោះអាសន្ន នៅក្នុងយុទ្ធនាការលើកនេះ។
សូមបញ្ជាក់ថា អំពើពេស្យាចារ ត្រូវបានបំបិទតាំងពីរបបកុម្មុយនិស្តចិនឡើងកាន់អំណាច នាឆ្នាំ ១៩៤៩មក។ ការរកស៊ីផ្លូវភេទបានរីកស្គុះស្គាយឡើងវិញ បន្ទាប់ពីសេដ្ឋកិច្ចបានកំរើកឡើងខ្លាំង ក្នុងរយៈពេល៣០ឆ្នាំចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ