Aquino ចង់ឆ្កឹះឆ្កៀលរឿងពុករលួយរបស់ប្រធានាធិបតីអស់អាណត្តិ
ភាពតានតឹងកំពុងកើតឡើងនៅទីក្រុងManilleប្រទេសហ្វីល្លីពីន។ មូលហេតុ គឺមកពីលោកAquino ដែលនឹងក្លាយជាប្រធានាធិបតីនាពេលខាងមុខនេះ បានប្រកាសថា លោកនឹងចេញបញ្ជាឲ្យធ្វើការស៊ើបអង្កេតមើល ថាតើរដ្ឋការរបស់លោកស្រីប្រធានាធិបតីអស់អាណត្តិ បានប្រព្រឹត្តអំពើពុករលួយឬអត់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ តាន់ ហ្សង់-ហ្វ្រង់ស្វ័រ
រដ្ឋការរបស់លោកស្រីប្រធានាធិបតីអស់អាណត្តិGloria Arroyo កំពុងកើតក្តីព្រួយបារម្ភ។ព្រួយបារម្ភពីព្រោះលោកAquino ដែលមិនទាន់ទាំងក្លាយជាប្រមុខរដ្ឋផ្លូវការផងនោះ បានប្រកាស ថានឹងបើកការស៊ើបអង្កេតមួយជុំវិញការលួចបន្លំសន្លឹកឆ្នោត កាលសម័យបោះឆ្នោតប្រធានាធិបតីឆ្នាំ២០០៤ និងជុំវិញអំពើពុករលួយក្រោមការគ្រប់គ្រងរដ្ឋរបស់លោកស្រីGloria Arroyo ក្នុងអំឡុងពេលប្រាំបួនឆ្នាំចុងក្រោយនេះ។
សេចក្តីប្រកាសបែបនេះរបស់លោកAquino មិនមែនចៃដន្យឡើយ។ លោកAquino បានសន្យានាពេលធ្វើយុទ្ធនាការឃោសនាបោះឆ្នោត ថារដ្ឋការរបស់លោកនឹងតាមកំចាត់អំពើពុករលួយ។
គួរនិយាយថា ប្រធានាធិបតីហ្វីល្លីពីនមានអំណាចធំណាស់ ជាពិសេស ក្នុងការជម្រុញឲ្យធ្វើការស៊ើបអង្កេតទៅលើរឿងអាស្រូវអ្វីមួយ។
យ៉ាងណាមិញ បក្សពួកលោកស្រីGloria Arroyo បានប្រកាសរួចហើយជាស្រេច ថាពួកគេមិនបារម្ភទេ ពីព្រោះពួកគេជាអ្នកស្អាតស្អំ។ ប៉ុន្តែ នៅក្នុងសប្តាហ៍នេះ លោកស្រីArroyo ដែលជាគោលការណ៍ ត្រូវប្រគល់អំណាចទៅឲ្យលោកAquino នៅថ្ងៃទី៣០មិថុនាខាងមុខ ស្រាប់តែបានតែងតាំងប្រធានថ្មីម្នាក់នៃតុលាការកំពូល។ គួរគូសបញ្ជាក់ថា គឺតុលាការកំពូលនេះហើយដែលនឹងត្រូវកាត់ក្តីជាយថាហេតុលោកស្រីArroyo បើសិនជាមានការដាក់ពាក្យបណ្តឹងប្រឆាំងនឹងលោកស្រី នាអនាគតខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ