អាជ្ញាធរថៃដាក់សម្ពាធកាន់តែខ្លាំងឡើងទៅលើបាតុករអាវក្រហម
នៅថ្ងៃព្រហស្បតិ៍នេះ អាជ្ញាធរថៃបានសម្រេចដាក់សម្ពាធកាន់តែខ្លាំងឡើងទៅលើបាតុករអាវក្រហម ប្រឆាំងរដ្ឋាភិបាលដែលបានបោះជំរំធ្វើឲ្យគាំងស្ទះសង្កាត់ពាណិជ្ជកម្មនៅចំកណ្តាលទីក្រុងបាងកក។ ការបោះឆ្នោតសភាមុនចប់អាណត្តិគ្រោងរៀបចំធ្វើនៅថ្ងៃទី១៤វិច្ឆិកា ដែលសន្យាដោយលោកអភិស៊ីទនឹងត្រូវលុបចេញ ដោយហេតុតែបាតុករអាវក្រហមពុំព្រមចាកចេញពីសង្កាត់ពាណិជ្ជកម្មនៅ កណ្តាលទីក្រុងបាងកក។
ចុះផ្សាយនៅថ្ងៃ៖ កែប្រែថ្ងៃទី៖
យោធាថៃគ្រោងដាក់ពង្រាយរថក្រោះនៅតាមគ្រប់ចំណុចនិងច្រកត្រួតពិនិត្យដែលមាននៅជុំវិញតំបន់កាន់កាប់ដោយពួកបាតុករអាវក្រហម ដើម្បីខាឃាំងកុំឲ្យបាតុករថ្មីទៀតអាចមកចូលរួបរួម។
សេចក្តីរាយការណ៍របស់ សៀក សារិន
“នៅក្នុងក្របខ័ណ្ឌនៃបេសកកម្មដែលធ្វើឡើងដើម្បីដាក់សម្ពាធកាន់តែខ្លាំងឡើងទៅលើបាតុករអាវក្រហម យើងត្រូវតែដាក់ពង្រាយរថក្រោះដើម្បីការពារទាហានរបស់យើងដែលឋិតនៅក្នុងចំណោមហ្វូងបាតុករ។ ហើយវិថីនានាដែលនាំទៅកាន់សង្កាត់កាន់កាប់ដោយបាតុករនឹងត្រូវបិទនៅថ្ងៃព្រហស្បតិ៍នេះចាប់ពីម៉ោង១៨ទៅ”។ នេះជាពាក្យសំដីរបស់អ្នកនាំពាក្យនៃកងកម្លាំងយោធាថៃ។
គួរកត់សម្គាល់ថា បាតុករអាវក្រហមដែលគាំទ្រលោកអតីតនាយករដ្ឋមន្ត្រីថាក់ស៊ីននៅមានប្រមាណ១០ ០០០នាក់នៅឡើយនៅបន្តធ្វើបាតុកម្ម ដោយពុំរវល់នឹងឳសានវាទរបស់រដ្ឋាភិបាលអភិស៊ីទដែលបានដាក់កំហិតឲ្យបាតុករអាវក្រហមចាកចេញពីសង្កាត់ពាណិជ្ជកម្មមុនម៉ោង១២យប់នេះ។ បាតុកម្មដែលពួកអាវក្រហមបានធ្វើអស់រយៈពេលពីរខែមកហើយ។
ចំណែកឯមេដឹកនាំអាវក្រហមដែលបានទាមទារឲ្យនាយករដ្ឋមន្ត្រីអភិស៊ីទចុះចេញពីមុខតំណែង ហើយនិងទាមទារឲ្យមានការបោះឆ្នោតសភាមុនចប់អាណត្តិវិញ ក៏បានអំពាវនាវឲ្យសកម្មជនរបស់ខ្លួនមកចូលរួបរួមឲ្យបានច្រើននៅជំរំកាន់កាប់របស់ខ្លួននៅសង្កាត់ពាណិជ្ជកម្មនៅកណ្តាលទីក្រុងបាងកក។
ក្នុងខណៈដែលវិបត្តិនយោបាយថៃធ្លាក់កាន់តែរ៉ាំរ៉ៃទៅៗ ការបែកបាក់គ្នាក៏លេចចេញកាន់តែច្បាស់ឡើងៗរវាងក្រុមអាវក្រហមដែលជាអតីតកម្មុយនិស្តហើយនិងក្រុមអាវក្រហមដែលពុំមាននិន្នាការជ្រុលនិយម។
រីឯរដ្ឋាភិបាលវិញបានប្រកាសឲ្យដឹងថា ការបោះឆ្នោតសភាមុនចប់អាណត្តិគ្រោងរៀបចំធ្វើនៅថ្ងៃទី១៤វិច្ឆិកាដែលសន្យាដោយលោកនាយករដ្ឋមន្ត្រីអភិស៊ីទនឹងត្រូវលុបចេញ ដោយហេតុតែបាតុករអាវក្រហមពុំព្រមចាកចេញពីសង្កាត់ពាណិជ្ជកម្មនៅកណ្តាលទីក្រុងបាងកក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ