ប៉េកាំង និងម៉ូស្គូគ្រោងនឹងពិភាក្សាសំណុំរឿងនុយក្លេអ៊ែរអៀរ៉ង់
តាមដែលមជ្ឈដ្ឋានផ្លូវការចិនជូនជាដំណឹងកាលពីព្រឹកមិញការពិភាក្សា គ្នាជុំវិញសំណុំរឿងនុយក្លេអ៊ែរអៀរ៉ង់ នឹងប្រព្រឹត្តទៅ ចំពេលដែលលោកប្រធានាធិបតីចិន Hu Jintao នឹងធ្វើទស្សនកិច្ចក្នុងរដ្ឋធានីរុស្ស៊ី ថ្ងៃទី ៨ និង៩ ឧសភាខាងមុខ។ គឺដើម្បីចូលរួមក្នុងពិធីបុណ្យរម្លឹកខួប ទី ៦៥នៃការខ័ណ្ឌបញ្ចប់សង្គ្រាមលោកលើកទី ២ នៅទ្វីបអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពីទីក្រុងមូស្គូ ប្រទេសរុស្ស៊ី
ថ្លែងនៅថ្ងៃនេះទៅកាន់ពួកអ្នកកាសែត អនុរដ្ឋមន្ត្រីការបរទេសចិនលោក Cheng Guoping ប្រកាសឲ្យដឹងថា ពេលវត្តមាននៅម៉ូស្គូ លោកប្រធានាធិបតីចិន Hu Jintao នឹងជួបចរចាជាមួយសមភាគីរុស្ស៊ី គឺលោក Dmitri Medvedev និងលោកនាយករដ្ឋមន្ត្រីរុស្ស៊ី Vladimir Poutine ដើម្បីផ្លាស់ប្តូរទស្សនៈយល់ឃើញ ជុំវិញបញ្ហាអន្តជាតិ និងបញ្ហាតំបន់ណា ដែលជាផលប្រយោជន៍រួមរបស់គូភាគី ប្រាកដណាស់ បូកទាំងបញ្ហានុយក្លេអ៊ែរអៀរ៉ង់ផង។អ្នកការទូតចិនបន្ថែមថា“ ជុំវិញសំណុំរឿងអៀរ៉ង់ចិន និងរុស្ស៊ីប្រកាន់យកទស្សនៈយល់ឃើញដូចគ្នា “។
គួររម្លឹកថា កាលពីសប្តាហ៍មុន លោករដ្ឋមន្ត្រីកាបរទេសរុស្ស៊ី Serguei Lavrov បានសារភាពទទួលស្គាល់ថា អៀរ៉ង់ជាដៃគូពិបាកដែលទល់នឹងប្រទេសនេះ “ ប្រហែលជានឹងត្រូវដាក់ទណ្ឌកម្មចៀសមិនរួចទេ“។ ទាក់ទងនឹងទណ្ឌកម្មនេះមេដឹកនាំកំពូលរុស្ស៊ីលោក Medvedev តែងថ្លែងថា ទណ្ឌកម្មនោះឯង បើដាក់មែន គឺត្រូវដាក់ “ ដោយប្រើប្រាជ្ញា “ ដើម្បីកុំឲ្យរងគ្រោះដល់ប្រជាជនដែលគ្នាគ្មានទោសពៃអ្វីសោះ។ តាមសំដីប្រមុខការទូតរុស្ស៊ី លោក Lavrov ទីក្រុង Téhéran ពុំព្រមឆ្លើយឲ្យបានស្ថាបនាឡើយ តបនឹងសំណើម្តងហើយម្តងទៀត របស់ក្រុម ៦ប្រទេស ដែលទទួលបន្ទុកខាងសំណុំរឿងនុយក្លេអ៊ែរអៀរ៉ង់ក្នុងនោះមាន៥ ជាសមាជិកអចិន្ត្រៃយ៍របស់ក្រុមប្រឹក្សាសន្តិសុខ អ.ស.ប.ពោលគឺ ស.រ.អា. អង់គ្លេស បារាំង ចិន រុស្ស៊ី ដែលសុទ្ធតែបំពាក់ដោយសិទ្ធិ Veto និងប្រទេសអាឡឺម៉ង់ គ្រាន់នឹងជម្រុញដល់ការធ្វើសំវាទជាមួយទីភ្នាក់ងារអន្តរជាតិខាងថាមពលបរមាណូ ហៅកាត់ថា AIEA។
ខុសពីរុស្ស៊ី គោលជំហរប្រកាន់យកដោយចិន គឺនៅតែព្យាយាមឲ្យសហគមពិភពលោកបន្តធ្វើកិច្ចចរចាជាមួយអៀរ៉ង់តទៅទៀត។ រីឯក្រុមប្រឹក្សាសន្តិសុខអ.ស.ប. កំពុងធ្វើការផ្លាស់ប្តូរមតិគ្នាជុំវិញគម្រោងអាមេរិកាំងសំដៅដាក់ទណ្ឌកម្មថ្មីៗទៀតទល់នឹងអៀរ៉ង់ ក្រោយពីមានអនុម័តយកសេចក្តីសម្រេចចិត្តដាក់ទណ្ឌកម្ម៣លើកទៅហើយ ទល់នឹងប្រទេសនេះ គ្រាន់នឹងបង្ខំទីក្រុងTéhéran ឲ្យផ្អាកឈប់សកម្មភាពខាងចម្រើនធាតុ Uranium ប៉ុន្តែអៀរ៉ង់នៅតែធ្វើថ្លង់ធ្វើខ្វាក់ចំពោះសេចក្តីសម្រេចចិត្តទាំងនោះ។ មកពីមូលហេតុនេះបានជាបស្ចិមលោកសង្ស័យថាទីក្រុងTéhéran កំពុងឈ្មុសឈ្មុលផលិត ទាល់តែបានសម្រាប់ខ្លួន គឺអាវុធបរមាណូតែម្តង ដោយលាក់ខ្លួននៅពីក្រោយកម្មវិធីនុយក្លេអ៊ែរស៊ីវិលស្អីណា ទោះបីភាគីអៀរ៉ង់ផ្ទាល់រមែងថ្លែងបដិសេធក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ