ចិនកាន់ទុក្ខឲ្យប្រជាជនទីបេដែលរងគ្រោះដោយការរញ្ជួយដី
នៅថ្ងៃនេះ ទង់ជាតិចិនត្រូវបង្ហូតមកនៅពាក់កណ្តាលដង សារព័ត៌មានធំៗក្នុងស្រុកទាំងអស់បានបោះពុម្ពជាពណ៌សខ្មៅ ទាំងនេះជាកាយវិការកាន់ទុក្ខរបស់ចិនសម្រាប់ជនរងគ្រោះដោយ ការរញ្ជួយដី កាលពីសប្តាហ៍មុនក្នុងខេត្តជិនហៃ។ ការសំដែងការឈឺឆ្អាលដល់សុខទុក្ខរបស់ជនរងគ្រោះ ជាពិសេសប្រជាជនទីបេ ពីសំណាក់ថ្នាក់ដឹកនាំចិន ជារឿងមួយដែលគេមិនធ្លាប់ឃើញមានពីមុនមក។
ចុះផ្សាយនៅថ្ងៃ៖
សេចក្តីរាយការណ៍របស់ឈាង បុប្ផា
នៅម៉ោង១០ ព្រឹកមិញ(ថ្ងៃ ពុធ ២១ មេសា ២០១០)នេះ នៅកន្លែងរញ្ជួយដី ក្រុមជួយសង្គ្រោះបានផ្អាកការរុករករបស់ខ្លួនមួយភ្លែត និងឈរស្មឹងស្មាធិ៍ក្រោមព្រិល។ នៅថ្ងៃនេះ ប្រជាជនចិននៅទូទាំងប្រទេសបានស្ថិតក្នុងភាពស្ងៀមស្ងាត់ ៣នាទីដើម្បីគោរពដល់វិញ្ញាណក្ខន្ធរបស់ជនរងគ្រោះដែលស្លាប់ក្នុង គ្រោះរញ្ជួយដី កាលពីសប្តាហ៍មុន។ សំលេងស៊ីរ៉ែនបានបន្លឺនៅគ្រប់ទីកន្លែងសាធារណៈរបស់ចិន ចំណែកទូរទស្សន៍ជាតិបានបង្ហាញពីរូបភាព ថ្នាក់ដឹកនាំកំពូលៗរបស់ចិនទាំង ៨រូប ដែលរួមមានទាំងលោកប្រធានាធិបតី ហូ ជិនតាវ។ លោកហូ ជិនតាវក្នុងសំលៀកបំពាក់សខ្មៅបានធ្វើសុន្ទរកថា ទៅកាន់ប្រជាជនឲ្យកាន់ទុក្ខឲ្យជនរងគ្រោះដោយការរញ្ជួយដីYushu។
កាយវិការ កាន់ទុក្ខដ៏គួរឲ្យកត់សំគាល់មួយទៀតគឺ រាល់ទង់ជាតិនៅស្ថានទូតចិននៅបរទេសទាំងអស់ ក៏ត្រូវបង្ហូតមកនៅពាក់កណ្តាលដង ចំណែកកម្មវិធី កំសាន្តសប្បាយ នៅគ្រប់កន្លែង និងនៅតាមទូរទស្សន៍ត្រូវគេហាមឃាត់។ ការកេណ្ឌគ្នាធ្វើការកាន់ទុក្ខថ្នាក់ជាតិដូច្នេះហាក់ចង់បង្ហាញពី ការឈឺឆ្អាលរបស់ប្រជាជនចិនទាំងមូលចំពោះសុខទុក្ខរបស់ប្រជាជនខេត្ត ជិនហៃ។
សារ សំខាន់មួយដែលរដ្ឋាភិបាលចិនចង់និយាយទៅកាន់ប្រជាជនខេត្តជិនហៃដែល ភាគច្រើនជាជនជាតិទីបេ គឺបក្សកុម្មុយនិស្តចិនជាអ្នកជួយសង្គ្រោះពួកគេ តែមិនមែនសម្តេចសង្ឃដាឡៃ ឡាម៉ាទេ។ សម្តេចសង្ឃដែលបានរត់គេចពីការតាមចាប់របស់បក្សកុម្មុយនិស្តចិន ក្នុងឆ្នាំ ១៩៥៩ កំពុងរស់និរទេសខ្លួននៅបរទេស។ កាលពីពេលថ្មីៗនេះ ព្រះអង្គដាឡៃ ឡាម៉ាធ្លាប់បានបង្ហាញចេតនាចង់ត្រលប់មកទឹកដីកំណើតរបស់ព្រះអង្គ ដើម្បីជួយរំលែកទុក្ខជាមួយប្រជាជនទីបេ។
គួកត់សំគាល់ថា គេមិនបានឃើញការយកចិត្តទុកដាក់បែបនេះ របស់ថ្នាក់ដឹកនាំចិន នៅក្នុងគ្រោះថ្នាក់រញ្ជួយដីនៅខេត្តស៊ីឈាន់ឆ្នាំ ២០០៨ ទេ។ គ្រោះរញ្ជួយដីដែលបានសម្លាប់ប្រជាជន៩ម៉ឺននាក់។ ហើយកាលណោះ អាជ្ញាធរចិនបានទទួលរងការរិះគន់យ៉ាងសម្បើមក្នុងរឿងសំណង់អគារមិន រឹងមាំ។ អគារសាលារៀនផុយស្រួយបានសម្លាប់កូនសិស្សជាច្រើនពាន់នាក់។
ប៉ុន្តែ នៅពេលនេះ រដ្ឋាភិបាលចិនបានគ្រប់គ្រងស្ថានភាពមិនឲ្យដូចមុន។ ប្រព័ន្ធផ្សព្វផ្សាយត្រូវបានគ្រប់គ្រងយ៉ាងតឹងតែងពីសំណាក់អាជ្ញាធរ។ យោងតាមកាសែត South China Morning Post និពន្ធនាយកសារព័ត៌មានជាច្រើនបានទទួលសំបុត្រផ្លូវការពីរដ្ឋាភិបាល ក្នុងការកោះហៅអ្នកយកព័ត៌មានរបស់ខ្លួនឲ្យត្រលប់ចូលការិយាល័យ។ គេបានពន្យល់ថា នឹងអាចមានគ្រោះរញ្ជួយដីជាថ្មីនៅខេត្តជិនហៃ។
ជាទូទៅ ព័ត៌មានស្តីពីលក្ខខណ្ឌជីវិតលំបាករបស់ប្រជាជនរងគ្រោះត្រូវគេបិទ ទាំងស្រុង។ ផ្ទុយទៅវិញ នៅតាមទូរទស្សន៍ គេឃើញតែរូបភាពថ្នាក់ដឹកនាំចិនចុះសួរសុខទុក្ខប្រជាជនរងគ្រោះ។ នេះជារូបភាពតែមួយគត់ដែលថ្នាក់ដឹកនាំចិនចង់ឲ្យគេឃើញ។ គេវាយតំលៃថា ថ្នាក់ដឹកនាំចិន មិនប្រាថ្នាឲ្យមានការបះបោររបស់ប្រជាជន ចង់ការពារមុខមាត់របស់ខ្លួន និង ជាពិសេសក្នុងពេលប្រទេសចិនត្រូវទទួលបើកពិពណ៌ពិភពលោកក្នុងទីក្រុង សៀងហៃ ដែលនឹងត្រូវរៀបចំ នៅថ្ងៃ ទី ១ឧសភានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ