ការរញ្ជួយដីដ៏ខ្លាំងនៅក្នុងខែត្រ ជិន ហៃ
ដីបានរញ្ជួយយប់មិញ នៃថ្ងៃអង្គារ ១៣ មេសា ឆ្លងមកថ្ងៃពុធ១៤មេសានេះ នៅប៉ែកពាយ័ព្យនៃប្រទេសចិន នៅក្នុងខែត្រជិនហៃជាប់ព្រំដែននឹងតំបន់ទីបេត៍។ ចំនួនអ្នករងគ្រោះដោយការរញ្ជួយដីកម្លាំង៦,៩អង្សា ស្របតាមមាត្រដ្ឋានរីស្ទែរ ចេះតែកើនឡើងពីមួយម៉ោងទៅមួយម៉ោងទៀត រីឯការខូចខាតផ្នែកសម្ភារៈវិញក៏ប្រហែលជានឹងមានចំនួនច្រើនដែរ។
ចុះផ្សាយនៅថ្ងៃ៖ កែប្រែថ្ងៃទី៖
Marc Lebeaupin អ្នកឆ្លើយឆ្លងព័ត៌មានរបស់វិទ្យុ RFI ប្រចាំទីក្រុង Pékin
ពីរឆ្នាំបន្ទាប់ពីគ្រោះមហន្តរាយ នៅ Sichuanមក នៅលើកនេះ ដីបានរញ្ជួយនៅខែត្រជិតខាង ជិនហៃ ប្រកបដោយកម្លាំង៦,៩អង្សា ស្របតាមមាត្រដ្ឋាន Richter នៅក្នុងខែត្រមួយ សម្បូណ៌ទៅដោយភ្នំ ជិតតំបន់ទីបេត៍។
ទីក្រុងធំ នៅជិតកន្លែងដែលមានការរញ្ជួយដីខ្លាំងជាងគេគឺទីក្រុងយូស៊ូ ( Yushu )ប្រកបដោយបណ្តាជនជាង១០ម៉ឺននាក់។សារព័ត៌មានចិនបានចុះរួចស្រេច ទៅហើយ នៅព្រឹកថ្ងៃពុធនេះ អំពីការស្រុតរលំផ្ទះសំបែងចំនួនរាប់រយជាហេតុបណ្តាលឱ្យស្លាប់ មនុស្សរាប់សិបនាក់ រីឯអ្នកដទៃទៀតស្ថិតនៅក្រោមគំនរកំទេចបាក់បែកនៅឡើយ។
គេនៅ មានព័ត៌មានតិចតួចនៅឡើយ អំពីតំបន់នៅជិតបង្កើយនឹងទីកន្លែងរញ្ជួយដី។ អាជ្ញាធរចិនខ្លាចបារម្ភតែបណ្តាជននៃតំបន់ឆ្ងាយដាច់ស្រយាលជាងគេ បាត់បង់ទីជម្រក នៅពេលដែលសីតុណ្ហភាពធ្លាក់ចុះក្រោមសូន្យអង្សា។ ក្រុមអ្នកជួយសង្គ្រោះប៉ះទង្គិចនឹងការពិបាក ដោយហេតុខ្វះសម្ភារៈសំរាប់រុករកគេ។ សក្ខីកម្មខ្លះនិយាយអំពីការបំផ្លិចបំផ្លាញមន្ទីរពេទ្យ។
តំបន់ ខ្ពង់រាប ទីបេត៍ ទទួល រងគ្រោះជារឿយៗដោយការរញ្ជួយដី។ មុនការរញ្ជួយដី នៅព្រឹកថ្ងៃពុធនេះ ការរញ្ជួយដីមួយទៀតពុំសូវសំខាន់បានកើតមានរួចស្រេចទៅហើយ នៅល្ងាចថ្ងៃអង្គារម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ