នាយករដ្ឋមន្ត្រីជប៉ុនចេញដំណើរនៅថ្ងៃសុក្រនេះដើម្បីទៅបំពេញទស្សនកិច្ចនៅតំបន់មជ្ឈិមបូព៌ា
លោកស៊ីនហ្សូ អាបេ នាយករដ្ឋមន្ត្រីជប៉ុនបានចាកចេញពីក្រុងតូក្យូនៅថ្ងៃសុក្រនេះដើម្បីទៅបំពេញទស្សនកិច្ចនៅប្រទេសមួយចំនួនក្នុងតំបន់មជ្ឈិមបូព៌ា។ គោលដៅនៃដំណើរទស្សនកិច្ចគឺដើម្បីពង្រឹងតួនាទីជប៉ុននៅលើវិស័យសេដ្ឋកិច្ចនៅក្នុងតំបន់យុទ្ធសាស្រ្តមួយនេះ។
ចុះផ្សាយនៅថ្ងៃ៖
ស្តាប់ - ០២:១០
នៅមុនពេលចាកចេញពីទីក្រុងតូក្យូ លោកស៊ីនហ្សូ-អាបេ បានថ្លែងប្រាប់អ្នកកាសែត អំពីជំហរ ត្រៀមខ្លួនរបស់ជប៉ុន ដើម្បីការគាំទ្រមួយចំពោះតំបន់មជ្ឈិមបូព៌ានៅក្នុងវិស័យសេដ្ឋកិច្ចនិងការរួមវិភាគទាននៅលើការកសាងសន្តិភាពនិងស្ថិរភាពនៅក្នុងតំបន់។
ដំណើរទស្សនកិច្ចនេះ ត្រូវបានប្រព្រឹត្តទៅក្រោយបន្ទាប់ពីមានអំពើភេរវកម្មដ៏ព្រៃផ្សៃនៅកណ្តាលទីក្រុងប៉ារីសដែលបង្កឡើងដោយពួកអ៊ីស្លាមជ្រុលនិយម។ ឆ្លៀតឱកាសនោះ លោក អាបេ បានសង្កត់ទៀតថា «សាសនាអ៊ីស្លាមនិងពួកអ៊ីស្លាមជ្រុលនិយម ជារឿងពីរដាច់ស្រឡះដោយឡែកពីគ្នា ហើយជប៉ុនចង់រួមចំណែកជាមួយបណ្តាប្រទេសនៅតំបន់មជ្ឈិមបូព៌ាដើម្បី កសាងសង្គមមួយដែលមានការអត់ឧនគ្នាជាពិសេសខាងផ្លូវសាសនា។
អមដំណើរដោយគណប្រតិភូដ៏សំខាន់មួយដែលមានគ្នាសុទ្ធសឹងជាក្រុមអ្នកជំនួញធំៗ ដំណើរទស្សនកិច្ចរបស់លោកអាបេ ក៏មានគោលដៅដ៏សំខាន់មួយដែរគឺការពង្រឹងទំនាក់ទំនងនៅលើវិស័យសេដ្ឋកិច្ចជាមួយបណ្តាប្រទេសមួយចំនួននៅក្នុងតំបន់និងក៏ដើម្បីបង្កើនការនាំផលិតផលជប៉ុនចេញទៅក្រៅប្រទេសឲ្យបានកាន់តែខ្លាំងឡើងថែមទៀត-នេះជាការថ្លែងបញ្ជាក់របស់លោក Yoshihide Suga អ្នកនាំពាក្យរបស់រដ្ឋាភិបាលជប៉ុន។
នៅថ្ងៃសៅរ៍ស្អែកលោកអាបេនឹងចាប់ផ្តើមជួបប្រាស្រ័យជាមួយប្រធានាធិបតីអេហ្ស៊ីបលោក Abdel Fattah al-Sissi។ នៅថ្ងៃអាទិត្យនាយករដ្ឋមន្ត្រីជប៉ុន នឹងអញ្ជើញទៅកាន់ហ្ស៊កដានី ដើម្បីពិភាក្សាជាមួយព្រះចៅ Abdallahទី ២ និងជូនដំណឹងអំពីការគាំទ្ររបស់ជប៉ុនចំពោះប្រទេសនេះដែលកំពុងប្រឈមមុខនឹងចំនួនជនភៀសខ្លួនស៊ីរីដ៏សម្បើមអស្ចារ្យដែលបានរត់ភៀសខ្លួនចេញពីសង្រ្គាមនៅក្នុងប្រទេសខ្លួន។
នៅទីបញ្ចប់លោកអាបេនឹងត្រូវជួបប្រាស្រ័យជាមួយនាយករដ្ឋមន្ត្រីអ៊ីស្រាអែលលោក Benjamin Netanyahu និងបន្ទាប់មកនឹងជួបជាមួយលោកប្រធានរដ្ឋអំណាចប៉ាឡេស្ទីនម៉ាម៊ូដអាបាស។ គួររំលឹកថានាយករដ្ឋមន្ត្រីជប៉ុនដែលជាអ្នកគាំទ្រចំពោះដំណោះស្រាយឲ្យមានរដ្ឋពីរ គឺរដ្ឋអ៊ីស្រាអែលនិងរដ្ឋប៉ាឡេស្ទីននោះ ប្រហែលជានឹងធ្វើការក្រើនរំលឹកដល់ភាគីទាំងពីរឲ្យចាប់ផ្តើមកិច្ចចរចាសន្តិភាពជាមួយគ្នាឡើងវិញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ