ស្ត្រីថៃដែលស៊ីឈ្នួលពរពោះបង្កើតកូនឲ្យគេ៦នាក់ប្តឹងប្រឆាំងរដ្ឋដើម្បីទាមទារយកកូនរបស់គេមកវិញ
រឿងអាស្រូវស្រ្តីថៃស៊ីឈ្នួលពរពោះបង្កើតកូនឲ្យគេដែលត្រូវបានប៉ូលិសរកឃើញកាលពីដើមខែសីហាឆ្នាំទៅមិញនៅមិនទាន់ចប់នៅឡើយទេ។ ឥឡូវនេះ មាតាដែលពរផ្ទៃពោះចំនួន៦នាក់ បានដាក់ពាក្យប្តឹងប្រឆាំងរដ្ឋ ដើម្បីទាមទារយកកូនៗរបស់ពួកគេមកវិញ។ កូនៗដែលមានឪពុកតែមួយរួមគ្នាជនជាតិជប៉ុន ត្រូវបាន រដ្ឋថៃ ប្រគល់ឲ្យសេវ៉ាសង្គមកិច្ចជាអ្នកគ្រប់គ្រង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
នាយិការនៃការិយាល័យទទួលបន្ទុកគ្រប់គ្រងការពារយុវវ័យនៃក្រសួងអភិវឌ្ឍន៍សង្គមបានថ្លែងប្រាប់ដល់ទីភ្នាក់ងារព័ត៌មានបារាំង AFP ថា “ស្ត្រីពរផ្ទៃពោះ៦រូប បានដាក់ពាក្យប្តឹងប្រឆាំងរដ្ឋ ដើម្បីទាមទារយកកូនៗរបស់គេវិញ”។
ប៉ុន្តែបញ្ហានេះត្រូវឆ្លងកាត់និតិវិធីរបស់ក្រសួងដោយមានការបើកស៊ើបអង្កេតនានា នៅជុំវិញក្រុមគ្រួសារនៃស្រ្តីជាមាតា ដែលបានពរពោះឲ្យគេ។ គោលដៅនៃការស៊ើបអង្គេត គឺដើម្បីចង់ដឹងថាតើស្រ្តីពរពោះទាំងនោះ អាចមានសមត្ថភាពដែរឬទេក្នុងការទទួលខុសត្រូវ ចិញ្ចឹមបីបាច់ថែរក្សាកូនៗរបស់ពួកគេ”-នេះជាការគូសបញ្ជាក់របស់នាយិការនៃការិយាល័យគ្រប់គ្រងយុវវ័យនៃក្រសួងអភិវឌ្ឈន៍សង្គម។
សូមបញ្ជាក់ថា “មាតាទាំង៦នាក់ មានសិទ្ធិចូលមកមើលកូនៗរបស៉គេទំាង៩នាក់ដែលក្នុងចំណោមនោះមានកូនភ្លោះ៣គូ។ ទារកទំាងអស់ត្រូវគេដាក់នៅក្នុងមជ្ឈមណ្ឌលកុមារកំពា្រមួយ។ ស្រ្តីពរពោះឲ្យគេទាំង៦នាក់ បានដាក់ពាក្យប្តឹងសេវ៉ាសង្គមរបស់រដ្ឋ ដោយពួកគេអះអាងថា ពុំបានយកចិត្តទុកដាក់និងថែទាំកូនៗរបស់គេឲ្យបានត្រឹមត្រូវនោះទេ-ក៏ប៉ុន្តែសេវ៉ាសង្គម បានឆ្លើយបដិសេធពុំទទួលខុសត្រូវឡើយ។
សូមបញ្ជាក់ថា កាលពីដើមខែសីហាឆ្នាំមុន ប៉ូលិសថៃ បានរកឃើញទារក ៩នាក់រស់នៅជាមួយមាតារបស់គេ ក្នុងផ្ទះល្វែងមួយខ្នងនៅក្រុងបាងកកដែលជួលដោយអ្នកមានម្នាក់សញ្ជាតិជប៉ុន។ ជនជាតិជប៉ុនដែលជាប់ពាក់ព័ន្ធក្នុងរឿងអាស្រូវនេះ ពុំបានវិលមកកាន់ប្រទេសថៃវិញទេ ដើម្បីឆ្លើយបំភ្លឺបញ្ហាអាស្រូវនេះ នៅចំពោះមុខក្រុមអ្នកស៊ើបអង្កេត។
ក្រោយពីផ្ទុះរឿងអាស្រូវ មាតាស៊ីឈ្នួលពរពោះនេះ រដ្ឋាភិបាល បានដាក់ពាក្យស្នើគម្រោងច្បាប់មួយទៅរដ្ឋសភា ក្នុងគោលដៅដើម្បីទប់ស្កាត់និងផ្តន្ទាទោសលើជនណាដែលចូលរួមក្នុងសកម្មភាពពរពោះឲ្យគេនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ