អាមេរិកប្រាប់ពលរដ្ឋខ្លួននៅក្រុងប៉េកាំង ឲ្យប្រុងប្រយ័ត្នក្រែងមានភេរវកម្មក្នុងពេលបុណ្យណូអែល
ស្ថានទូតសហរដ្ឋអាមេរិក ប្រចាំនៅរដ្ឋធានីប៉េកាំងប្រទេសចិន ទើបបានចេញសេចក្តីប្រកាសព័ត៌មានមួយ នៅថ្ងៃព្រហស្បតិ៍នេះ ប្រាប់ឲ្យជនជាតិអាមេរិក ដែលកំពុងតែស្នាក់នៅ ក្នុងទីក្រុងនេះទាំងអស់ ឲ្យមានការប្រុងប្រយ័ត្ន ចំពោះហេតុការណ៍ភេរវកម្ម ដែលអាចនឹងកើតមានឡើង នៅក្នុងពេលបុណ្យណូអែល ឬគ្រិស្តស្មាក់ និងបុណ្យចូលឆ្នាំសកលថ្មីនេះ។ នេះជាការប្រកាស ឲ្យធ្វើការប្រុងប្រយ័ត្ន ដ៏កម្រមួយ ដែលធ្វើឡើងនៅក្រុងប៉េកាំង ព្រោះថាជាធម្មតា នរណាក៏ទទួលស្គាល់ដែរថា រដ្ឋាភិបាលចិនមាននយោបាយការពារសន្តិសុខ យ៉ាងតឹងតែងជាទីបំផុត។
ចុះផ្សាយនៅថ្ងៃ៖
ស្តាប់ - ០២:៣៣
ស្ថានទូតសហរដ្ឋអាមេរិក បានផ្ញើរលិខិត ទៅឲ្យគ្រប់ប្រជាពលរដ្ឋខ្លួន ដែលកំពុងតែស្នាក់នៅ ក្នុងរដ្ឋធានីប៉េកាំង ប្រទេសចិន ព្រមទាំងបានផ្សាយសេចក្តីប្រកាសព័ត៌មានទូទៅមួយ នៅលើគេហទំព័ររបស់ស្ថានទូត ដែលមានខ្លឹមសារ សុំឲ្យពលរដ្ឋអាមេរិកទាំងអស់ មានការប្រុងប្រយ័ត្ន ជៀសវាងទីកន្លែងប្រជុំជនធំៗ ដែលសំបូរជនបរទេសច្រើន ព្រោះវាអាចជាចំណុចវាយប្រហារភេរវកម្ម នៅចំពេលបុណ្យ ណូអែល រឺ បុណ្យគ្រិស្តម៉ាក់ និងបុណ្យឆ្លងឆ្នាំសកល។
បើទោះជាមិនបានបញ្ជាក់ ឲ្យបានល្អិតល្អន់ ពីប្រភេទនៃការវាយប្រហារភេរវកម្មក៏ដោយ ស្ថានទូតអាមេរិក គ្រាន់តែបានបញ្ជាក់ នៅក្នុងសេចក្តីប្រកាសថា ស្ថានទូតបានទទួលព័ត៌មានមួយចំនួន ស្តីអំពីគម្រោងវាយប្រហារភេរវកម្ម ប្រឆាំងជនបរទេស នៅក្នុងសង្កាត់ សានលីទូន ក្នុងទីក្រុងប៉េកាំង។ សូមបញ្ជាក់ថា សង្កាត់សានលីទូននេះ ជាសង្កាត់សំបូរទៅដោយស្ថានទូតបរទេស និងហាងទំនិញទំនើបៗ ព្រមទាំងភោជនីយដ្ឋាន បារ រង្គសាល ដែលមានភ្ញៀវភាគច្រើន គឺជាជនបរទេសតែម្តង។ ស្ថានទូតអង់គ្លេស និងបារាំង ប្រចាំនៅក្រុងប៉េកាំង ក៏បានទទួលដំណឹងនេះ ពីស្ថានទូតអាមេរិកដែរ ហើយក៏បានធ្វើការប្រកាស ក្នុងន័យស្រដៀងគ្នានេះឲ្យ ប្រជាពលរដ្ឋខ្លួន ធ្វើការប្រុងប្រយ័ត្ន ផងដែរ។
យ៉ាងណាក៏ដោយ គេមិនទាន់បានទទួលការបំភ្លឺពីសំណាក់អាជ្ញាធរចិនក្រុងប៉េកាំងទេ ព្រោះថានេះជារឿងកម្រណាស់ ដែលស្ថានទូតបរទេស ធ្វើការប្រកាស ឲ្យពលរដ្ឋខ្លួនមានការប្រុងប្រយ័ត្នបែបនេះ។ គ្រប់គ្នាដឹងយ៉ាងច្បាស់ថា ការយាមកាមសន្តិសុខនៅក្រុងប៉េកាំង ត្រូវបានអាជ្ញាធរចិន ធ្វើការយ៉ាងស្វិតស្វាញ ស្ទើរតែជ្រុលហួសហេតុផង ព្រោះទីកន្លែងណាក៏ដោយ សឹងតែគ្រប់ផ្លូវ គឺមានទាហាន ឬប៉ូលីសយាមជានិច្ច។ យ៉ាងណាមិញព្រហស្បតិ៍នេះ គេសង្កេតឃើញ មានការរិតបន្តឹងសនិ្តសុខ នៅជុំវិញស្ថានទូតអាមេរិក និងនៅម្តុំហាងទំនិញ កណ្តាលសង្កាត់ សានលីទូន ដោយមានរថយន្តប៉ូលីសជាច្រើនគ្រឿង។ ទោះបីជាយ៉ាងណា អាជ្ញាធរចិន បានកំណត់ដាក់ សន្តិសុខក្នុងកំរិតពណ៌លឿង ដែលនៅក្រោមកំរឹតធ្ងន់បំផុត បីកំរឹតនៅឡើយ។
សូមរំលឹកថា ករណីភេរវកម្ម នៅក្រុងប៉េកាំង គឺមិនសូវធ្លាប់កើតមានឡើងទេ។ ករណីវាយប្រហារចុងក្រោយគេ គឺនៅខែតុលា ឆ្នាំ២០១៣ ដោយជនជាតិអ៊ុយហ្គួរ៣នាក់ បានបើករថយន្តមួយទៅបុកបំផ្ទុះ នៅខាងមុខទីលានធានអានមិន ចំច្រកទា្វរ ដែលមានរូបគំនូរដ៏ធំរបស់ លោកសេនាប្រមុខម៉ៅសេទុង បិតាជាតិកុម្មុយនីស្តចិន។ ហេតុការណ៍នេះ បានបង្ករឲ្យស្លាប់ អ្នកទេសចរ៥នាក់ និងរបួស៣៨នាក់។ អាជ្ញាធរចិនបានសន្និដ្ឋានទាំងស្រុងថា ជាស្នាដៃរបស់ក្រុមសកម្មជនបះបោរអ៊ុយហ្គួរ នៅខេត្តស៊ីនជាំង។ ជនជាតិអ៊ុយហ្គួរនៅខេត្តស៊ីនជាំង ដែលមានដើមកំណើតតួកគី និងដែលកាន់សាសនាអ៊ីស្លាម ត្រូវបានអាជ្ញាធរចិនធ្វើទុកបុកម្នេញ បំបិទសេរីភាព។ បើតាមការសង្ស័យ ក្រុមសកម្មជនអ៊ុយហ្គួរ មួយចំនួន កំពុងត្រូវបានក្រុមជីហាដ អង្គការរដ្ឋអ៊ីស្លាម អូសទាញ បំពាក់បំប៉ន ដើម្បីវិលមកធ្វើភេរវកម្មនៅក្នុងទឹកដីចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ