សហរដ្ឋអាមេរិកថាបើចាំបាច់ គឺត្រូវចរចាមួយទល់នឹងមួយ ដោយផ្ទាល់ជាមួយកូរ៉េខាងជើង
សំណុំរឿងនុយក្លេអ៊ែររបស់កូរ៉េខាងជើង កំពុងធ្វើឲ្យសហគមអន្តរជាតិ សស្រាក់សស្រាំ ស្វែងរកដំណោះស្រាយ ដើម្បីបញ្ចៀសការប្រើប្រាស់កំលាំង តាមដែលសហរដ្ឋអាមេរិក ធ្លាប់បានព្រមាន។ កាលពីល្ងាចថ្ងៃសុក្រទី ២៨មេសាម្សិលមិញ លោករដ្ឋមន្ត្រីការបរទេសសហរដ្ឋអាមេរិក បានដឹកនាំកិច្ចប្រជុំពិសេសមួយ ក្នុងក្របខណ្ឌក្រុមប្រឹក្សាសន្តិសុខ ដើម្បីរួមគ្នាដាក់ទណ្ឌកម្មបន្ថែមលើរបបផ្តាច់ការព្យុងយ៉ាង។ នៅប៉ុន្មានម៉ោង មុនកិច្ចប្រជុំនេះ លោករដ្ឋមន្ត្រីអាមេរិក ថែមទាំងបាននិយាយថា បើចាំបាច់ អាមេរិក នឹងចរចាដោយផ្ទាល់ទ្វេរភាគីជាមួយកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
បន្ទាប់ពីបានគំរាមប្រើកំលាំង និងបានបញ្ជូននាវាចម្បាំងទៅកាន់ឧបទ្វីបកូរ៉េ កាលពីថ្ងៃសុក្រកន្លងទៅនេះ សហរដ្ឋអាមេរិក ហាក់បានបញ្ចេញយុទ្ធសាស្ត្រថ្មី តាមរយៈការផ្តល់អាទិភាពទៅលើការចរចា ដោយសន្តិវិធី ជាមួយកូរ៉េខាងជើង ជាជាងការប្រើកំលាំងវាយបក។ យ៉ាងណាមិញ លោកប្រធានាធិបតី ដូណាល់ ត្រាំ ក៏បានថ្លែងកាលពីថ្ងៃសុក្រដែរថា លោកអាចនឹងប្រើកំលាំងសង្រ្គប់កូរ៉េខាងជើង តែជាបឋម លោកចង់ផ្តល់អាទិភាព ដល់ការចរចាផ្លូវទូតជាមុនសិន។
មុនពេលចូលទៅដឹកនាំការប្រជុំពិសេស នៃរដ្ឋមន្ត្រីការបរទេសប្រទេសសមាជិកក្រុមប្រឹក្សាសន្តិសុខ នៅក្នុងបទសម្ភាសន៍តាមវិទ្យុ NPR លោក Rex Tillerson រដ្ឋមន្ត្រីការបរទេសអាមេរិក បាននិយាយថា បើចាំបាច់ សហរដ្ឋអាមេរិក ត្រៀមខ្លួនចរចា ដោយផ្ទាល់ មួយទល់នឹងមួយ ជាមួយនឹងកូរ៉េខាងជើង។ លោករដ្ឋមន្ត្រីរូបនេះ បានបញ្ជាក់ថា អ្វីដែលអាមេរិក ចង់បាន គឺតែមួយគត់ គឺបិទបញ្ចប់កម្មវិធីនុយក្លេអ៊ែររបស់កូរ៉េខាងជើងតែម្តង មិនត្រឹមតែផ្អាកមួយរយៈនោះទេ។ លោកបន្ថែមថា អាមេរិក បានដកអាវុធនុយក្លេអ៊ែរ ចេញពីតំបន់ឧបទ្វីបកូរ៉េ អស់រលីងហើយ។ ដូច្នេះ កូរ៉េខាងជើង ក៏ត្រូវតែលប់ចោលកម្មវិធីនុយក្លេអ៊ែររបស់ខ្លួនដែរ។
បន្ថែមពីនេះ លោក Rex Tillerson បាននិយាយថា កម្មវត្ថុរបស់អាមេរិក គឺមិនខុសពីចិនទេ។ អាមេរិក គ្មានចេតនាណាមួយ ទៅផ្តួលរំលំរបបដឹកនាំរបស់កូរ៉េខាងជើងទេ ហើយក៏មិនចង់ទៅជំរុញ ឲ្យកូរ៉េទាំងពីរ រួបរួមគ្នាជាប្រទេសតែមួយឡើងវិញដែរ។ អ្វីដែលអាមេរិកចង់បាន គឺកូរ៉េខាងជើងត្រូវតែគ្មានអាវុធនុយក្លេអ៊ែរ ហើយងៀកមកអភិវឌ្ឍន៍សេដ្ឋកិច្ច ដែលអាមេរិក ចាំត្រៀមខ្លួនជួយ។
ដោយឡែក នៅក្នុងអង្គប្រជុំក្រុមប្រឹក្សាសន្តិសុខ កាលពីថ្ងៃសុក្រ លោក Rex Tillerson បានបញ្ជាក់ជាថ្មីម្តងទៀតថា គ្រប់ជំរើសទាំងអស់ទាំងផ្លូវទូត ទាំងផ្លូវទ័ព ត្រូវយកមកដាក់លើតុ ព្រោះថាយើងមិនអាចប្រហែសជាមួយនឹងកូរ៉េខាងជើងបានឡើយ។ សមត្ថភាពរបស់កូរ៉េខាងជើង អាចវាយប្រហារជប៉ុន និងកូរ៉េខាងត្បូងបានយ៉ាងងាយ ហើយក្នុងពេលដ៏ឆាប់ខាងមុខ កូរ៉េខាងជើង ប្រាកដជាអាចផលិតអាវុធ ទៅវាយប្រហារដល់អាមេរិកផងក៏ថាបាន។
លោករដ្ឋមន្ត្រីអាមេរិក បានតំឡើងសំដីចំៗ នៅចំពោះមុខ លោក វ៉ាង យី រដ្ឋមន្ត្រីការបរទេសចិន ដែលមានមុខនៅក្នុងអង្គប្រជុំថា ចំណូលរបស់កូរ៉េខាងជើង បានមកពីពាណិជ្ជកម្មក្រៅប្រទេស ចំនួន៩០% គឺបានមកពីចិន ដូច្នេះ ចិនមានតួនាទីធំណាស់ ក្នុងការដាក់សំពាធទៅលើកូរ៉េខាងជើង។ លោករដ្ឋមន្ត្រីការបរទេសអាមេរិក ក៏នឹងត្រូវជួបមួយទល់នឹងមួយ ជាមួយលោករដ្ឋមន្ត្រីការបរទេសចិន ក្នុងពេលដ៏ឆាប់នេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ