ស៊ី ជីនពីង និងដូណាល់ ត្រាំ អះអាងថា ជួបគ្នាលើកទីមួយ ល្អូកល្អឺនដល់កំរិត
ឆ្លើយតបទៅនឹងការអញ្ជើញរបស់លោក ប្រធានធិបតីអាមេរិក លោកប្រធានធិបតីចិន ស៊ី ជិនពីង បានអញ្ជើញទៅជួប លោក ដូណាល់ ត្រាំ ដល់និវេសនដ្ឋានប្រណិតរបស់លោកត្រាំនៅរដ្ឋហ្វ្លរីដា កាលពីថ្ងៃសុក្រទី ៧មេសា។ ក្រោយជំនួប មេដឹកនាំនៃមហាអំណាចទាំងពីរនេះ បានអះអាងព្រមគ្នាថា ទំនាក់ទំនងរវាងអាមេរិក និងចិន កំពុងឈានទៅរកកម្រិតល្អប្រសើរ ដើម្បីប្រយោជន៍រួមគ្នា។ យើងនៅចាំមិនទាន់ភ្លេចនៅឡើយ ពីសំដីរបស់លោកដូណាល់ ត្រាំ ដែលបានស្រែកក្តែងៗ រិះគន់ រដ្ឋាភិបាលចិន ក្នុងកំឡុងពេលឃោសនាបោះឆ្នោត។ តែពេលនេះ លោកដូណាល់ ត្រាំ បានអះអាងថាលោកនិងលោក ស៊ី ជីនពីង និយាយត្រូវរូវគ្នាខ្លាំងណាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ស្របពេលដែលគ្រប់គ្នាកំពុងតែផ្អើលឆោឡោ នឹងការបាញ់គ្រាប់មីស៊ីលរបស់អាមេរិក ទៅកំទេចបន្ទាយទ័ពអាកាសរបស់ស៊ីរី ជំនួបមួយទល់នឹងមួយរវាងលោកប្រធានាធិបតីដូណាល់ ត្រាំ និងលោកស៊ី ជីនពីង កាលពីថ្ងៃសុក្រម្សិលមិញ ហាក់ពុំសូវមានគេចាប់អារម្មណ៍ឡើយ។
នៅចំពោះមុខអ្នកកាសែត មេដឹកនាំនៃមហាអំណាចទាំងពីរ បានអះអាងព្រមគ្នា ប្រកបដោយសុទិដ្ឋិនិយមថា ចិន និងអាមេរិក បានសន្យាចាប់ដៃគ្នា ស្វែងយល់ពីគ្នាទៅវិញទៅមក ដើម្បីផលប្រយោជន៍រួម។
បើបានស្តាប់សម្តី និងឃើញរូបភាពល្អូកល្អឺននេះ គឺវាសឹងតែធ្វើឲ្យគេភ្លេចថា កាលពីប៉ុន្មានខែមុននេះ ចិនគឺជាកម្មវត្ថុរិះគន់ធំបំផុតរបស់លោកដូណាល់ ត្រាំ ដើម្បីទាក់ទាញសម្លេងគាំទ្រក្នុងកំឡុងពេលឃោសនាបោះឆ្នោត។ លោកត្រាំ ហាក់បានបំភ្លេចសំដីខ្លួន ដែលបានសន្យាថានឹងរឹតបន្តឹងការនាំចូលផលិតផលចិន តាមរយៈការដាក់ពន្ធនាំចូលប្រមាណជា៤០% ហើយពេលនេះ បែរមកប្រកាសថា លោក និងលោកប្រធានធិបតីចិន បាននិយាយគ្នា ត្រូវដងត្រូវផ្លែសំបើមណាស់។
តែយ៉ាងណា យើងមានតែអបអរសាទរទរ ដែលប្រទេសមហាអំណាចសេដ្ឋកិច្ចពីរនេះ ព្រមបន្ទន់ចិត្តរៀងខ្លួន មកចាប់ដៃធ្វើការជាមួយគ្នា ជាជាងការតំឡើងសំឡេង រិះគន់គ្នា។ តាមការគ្រោងទុក រដ្ឋាភិបាលអាមេរិក និងចិន បានព្រមព្រៀងគ្នា កំណត់រយៈពេល១០០ថ្ងៃ ដើម្បីឲ្យក្រុមការងារផ្នែកពាណិជ្ជកម្ម ជួបប្រជុំគ្នា កំណត់ទិសដៅថ្មី ធ្វើយ៉ាងណាឲ្យវិស័យពាណិជកម្មនាំចេញនាំចូលរវាងប្រទេសទាំងពីរ មានតុល្យភាព។
ដោយឡែក លោក Rex Tillerson រដ្ឋមន្ត្រីក្រសួងការបរទេសអាមេរិក បានបញ្ជាក់ថា ឆ្លងកាត់ជំនួបនេះ លោកស៊ី ជីនពីង បានសន្យាថានឹងប្រឹងប្រែងឲ្យអស់ពីសមត្ថភាព ដើម្បីរកដំណោះស្រាយក្នុងសំណុំរឿងកូរ៉េខាងជើង ដែលកាន់តែកញ្ជ្រោកគំរាមសន្តិសុខតំបន់។ លោករដ្ឋមន្ត្រីការបរទេសអាមេរិក បានលើកឡើងថា ភាគីអាមេរិក បាននិយាយត្រង់ទៅត្រង់មកជាមួយចិន ទាក់ទងនឹងបញ្ហានេះ ហើយពន្យល់ឲ្យចិនយល់អំពីការដាក់តាំងប្រព័ន្ធការពារគ្រាប់មីស៊ីល របស់ខ្លួននៅលើដីកូរ៉េខាងត្បូង។
ជាការពិត ជាមួយនឹងចរិកក្តៅឆេវឆាវ ពិបាកស្មានមុន របស់លោកដូណាល់ ត្រាំ និងជាពិសេស ក្រោយការសម្រេចភ្លាមៗ បាញ់មីស៊ីលលើស៊ីរី ព្រមទាំងការគម្រាមថា អាមេរិក អាចប្រើកំលាំងលើកូរ៉េខាងជើងផងនោះ លោកប្រធានាធិបតីចិន ប្រហែលជា គ្មានជំរើសអ្វីផ្សេងទេ បើមិនចង់ឃើញគ្រាប់មីស៊ីលរបស់លោកដូណាល់ ត្រាំ ហោះទៅបំផ្ទុះ នៅក្បែរផ្ទះរបស់ខ្លួនទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ