ប្រជាជនភូមាមួយក្រុមធ្វើបាតុកម្មប្រឆាំងវិសោធនកម្មរដ្ឋធម្មនុញ្ញ
កាលពីរសៀលថ្ងៃអាទិត្យទី ២៨កុម្ភៈនៅទីក្រុងរ៉ង់ហ្គូន មានប្រជាជនភូមាមួយក្រុមមានគ្នាជាច្រើនរយនាក់បានធ្វើបាតុកម្មតវ៉ាប្រឆាំងនឹងគម្រោងធ្វើវិសោធនកម្មលើមាត្រា៥៩នៃរដ្ឋធម្មនុញ្ញភូមា។មាត្រានេះហាមមិនឲ្យអ្នកដែលមានឪពុករឺម្តាយជាជនជាតិបរទេសឡើងកាន់មុខដំណែងជាប្រធានាធិបតីភូមាទេ។ក្រុមបាតុករបានទាមទារថាប្រធានាធិបតីភូមាគឺត្រូវតែមានឈាមកំណើតជាភូមាសុទ្ធសាធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
នេះជាលើកទីមួយហើយ ដែលមានបាតុកម្មនៅទីក្រុងរ៉ង់ហ្គូន ដែលប្រឆាំងតវ៉ា និងគម្រោងធ្វើវិសោធនកម្ម លើមាត្រា៥៩ នៃរដ្ឋធម្មនុញ្ញភូមា។ ក្រុមបាតុករ ដែលមានពាក់អាវយឺត មានសរសេរអក្សរពីលើថា ហាមប៉ះពាល់មាត្រា ៥៩។ សូមបញ្ជាក់ថា មាត្រា៥៩ នៃរដ្ឋធម្មនុញ្ញភូមា មានចែងលក្ខខណ្ឌជាច្រើនចំណុច ចំពោះបេក្ខជន ដែលអាចក្លាយជាប្រធានាធិបតីភូមា។
មាត្រា ៥៩-B និង ៥៩-F ៖
មាត្រា៥៩-Bចែងថា អាចក្លាយជាប្រធានាធិបតីភូមាបាន ជននោះត្រូវតែជាជនជាតិភូមាពីកំណើត ហើយដែលមានឪពុក និងម្តាយ ទាំងពីរនាក់ជាជនជាតិភូមាពីកំណើតដែរ។ រីឯមាត្រា ៥៩-F កំណត់ថា អាចធ្វើប្រធានាធិបតីបាន គឺជននោះមិនត្រូវមានប្តី រឺប្រពន្ធជាជនបរទេស រឺមិនត្រូវមានកូនដែលមានសញ្ជាតិបរទេសឡើយ។ គឺត្រង់មាត្រា ៥៩-F នេះហើយ ដែលធ្វើឲ្យលោកស្រីអ៊ុងសាន ស៊ូជី មិនអាចឡើងកាន់មុខដំណែងប្រធានាធិបតីបាន ព្រោះស្វាមី និងកូនៗលោកស្រីមានសញ្ជាតិអង់គ្លេស។
ក្រុមអ្នកតវ៉ា បានបរិយាយថា ពួកគេគ្មានចេតនាហាមឃាត់លោកស្រីអ៊ុងសាន ស៊ូជីមិនឲ្យក្លាយជាប្រធានាធិបតីនោះទេ។ ពួកគេគ្រាន់តែចង់ការពារប្រទេសភូមា មិនឲ្យជនបរទេសណាផ្សេង ក្រៅពីជនជាតិភូមាពិតប្រាកដពីកំណើត មកដឹកនាំតែប៉ុណ្ណោះ។ មេក្រុមបាតុករបានថ្លែងប្រាប់អ្នកកាសែតថា ជនបរទេសមិនដែលស្រលាញ់ជាតិភូមា រឺធ្វើល្អលើភូមា ដូចជនជាតិភូមាខ្លួនឯងឡើយ។ បាតុករម្នាក់ទៀតថា បើគេលប់មាត្រា៥៩នេះចោល គឺមានន័យថាថ្ងៃក្រោយទៅ មនុស្សម្នាក់ដែលមានដើមកំណើតអ៊ីស្លាម នឹងអាចក្លាយជាប្រធានាធិបតីភូមាបានហើយ។ នេះជារឿងដែលគេមិនអាចទទួលយកបានទេ។
យ៉ាងណាក៏ដោយ បើស្តាប់ហេតុផលទាំងអស់នេះ វាសបង្ហាញពីគំនិត រើសអើងប្រកាន់ពូជសាសន៍របស់ហ្វូងបាតុករ ជាពិសេសគឺទៅលើក្រុមសហគមន៍ជនជាតិភូមា ដែលកាន់សាសនាអ៊ីស្លាម ដូចជាប្រជាជនរ៉ូហ៊ីងយ៉ាស និងជនជាតិភាគតិចឯទៀតជាដើម។ មួយវិញទៀត ហេតុផលទាំងអស់នេះ គ្រាន់តែជាលេស ដើម្បីហាមមិនឲ្យគេប៉ះពាល់មាត្រា៥៩ទាំងស្រុងតែប៉ុណ្ណោះ ដើម្បីរារាំងមិនឲ្យលោកស្រីអ៊ុងសាន ស៊ូជី ក្លាយជាប្រធានាធិបតី។ តាមពិត បើគ្រាន់តែធ្វើវិសោធនកម្ម លប់ចោលចំណុច F នៃមាត្រា៥៩ គឺវានឹងអាចអនុញ្ញាតិឲ្យលោកស្រីអ៊ុងសាន សូជី ក្លាយជាប្រធានាធិបតី ដោយរក្សាលក្ខខណ្ឌដើមកំណើតឪពុកម្តាយជាភូមា ឲ្យនៅដដែលបាន។
មិនចង់ធ្វើឲ្យក្រុមយោធាមួរម៉ៅ៖
ខាងគណបក្សលោកស្រី អ៊ុងសាន ស៊ូជី នៅមិនទាន់មានការតវ៉ាយ៉ាងណា ចំពោះបញ្ហាវិសោធនកម្មនេះនៅឡើយទេ។ គេអាចយល់បានថា លោកស្រីនៅមិនចង់ទាមទារអ្វីឲ្យច្រើនហួស ដែលអាចបង្កការក្តៅក្រហាយដល់ក្រុមយោធាទេ ព្រោះសម្រាប់ដំណាក់កាលនេះ ដែលក្រុមយោធាបានទទួលស្គាល់ ឲ្យគណបក្សលោកស្រីបានចូលកាន់កាប់សម្លេងភាគច្រើនក្នុងសភា វាគឺជាជោគជ័យមួយធំណាស់ទៅហើយ។ ការពិតទៅ នរណាក៏ដឹងដែរថា មាត្រា៥៩ នៃរដ្ឋធម្មនុញ្ញភូមា ដែលបានតាក់តែងឡើងដោយក្រុមយោធាផ្តាច់ការ នៅឆ្នាំ២០០៨ គឺធ្វើឡើងក្នុងគោលបំណងតែមួយគត់ គឺរារាំងមិនឲ្យលោកស្រីអ៊ុងសាន ស៊ូជី បានក្លាយជាប្រធានាធិបតី ក្នុងករណីដែលលោកស្រីឈ្នះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ