លោកស្រីអ៊ុងសាន ស៊ូជី ប្រាថ្នាឲ្យជនជាតិភាគតិចមានសិទ្ធអំណាចច្រើន
នៅមិនទាន់បានមួយខែទេ ដែលគណបក្សសម្ព័ន្ធជាតិដើម្បីប្រជាធិបតេយ្យ របស់លោកស្រីអ៊ុងសាន សូជី បានឡើងកាន់អំណាចជាផ្លូវការ។ ថ្លែងនៅតាមកញ្ចក់ទូរទស្សន៍ ក្នុងឱកាសជូនពរឆ្នាំថ្មី លោកស្រីអ៊ុងសាន ស៊ូជី បានមានប្រសាសន៍ ថារដ្ឋាភិបាលថ្មីភូមា នឹងខិតខំកសាងសន្តិភាពទូទាំងភូមា។ ក្នុងន័យនេះលោកស្រី មានបំណងចង់ឲ្យតំបន់ជនជាតិភាគតិចទាំងអស់របស់ភូមា បានទទួលនូវសិទ្ធិអំណាច ម្ចាស់ការច្រើន ដើម្បីបញ្ចប់ការតវ៉ាបះបោរ និងអំពើហិង្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ភូមា គឺជាសាធារណរដ្ឋសហព័ន្ធ ដែលផ្គុំដោយរដ្ឋសមាជិកជាច្រើន។ អ្វីដែលជាការងារអាទិភាព នៃរដ្ឋាភិបាលថ្មីប្រជាធិបតេយ្យភូមា គឺការកសាងនូវការបង្រួបបង្រួមជាតិមួយ ឲ្យរឹងមាំ។ នេះគឺជាប្រសាសន៍របស់លោកស្រី អ៊ុងសាន ស៊ូជី ថ្លែងនៅតាមកញ្ចក់ទូរទស្សន៍ជាតិភូមា ក្នុងឱកាសបុណ្យចូលឆ្នាំថ្មី កាលពីថ្ងៃទី១៧មេសា។ ការកសាងសន្តិភាព បញ្ចប់អំពើហិង្សាបះបោរ នៅតាមរដ្ឋសមាជិក គឺជាវិធីតែមួយគត់ ដើម្បីស្ថាបនាភូមា។
បន្ទាប់ពីបានទទួលឯករាជ្យពីចក្រភពអង់គ្លេស ក្នុងឆ្នាំ១៩៤៨ ជនជាតិភាគតិចជាច្រើនក្រុម ដែលគ្រប់គ្រងដែនដីមួយភាគធំនៅភាគខាងជើង តែងតែធ្វើការរើបំរះទាមទារនូវអធិបតេយ្យភាព។ ជាមួយនឹងរបបផ្តាច់ការយោធាភូមា ដែលបានគ្រប់គ្រងប្រទេសអស់កន្លះសតវត្ស ចលនាតស៊ូរើបំរះរបស់ប្រជាជនជនជាតិភាគតិចមានកាន់តែខ្លាំង ដោយសារតែអំណាចរដ្ឋបាលទាំងស្រុង ត្រូវប្រមូលផ្តុំនៅលើដៃអំណាចកណ្តាលរបស់ពួកយោធាតែមួយ។ រដ្ឋធម្មនុញ្ញ ដែលក្រុមនេះបានតាក់តែងក្នុងឆ្នាំ២០០៨ សបញ្ជាក់ឲ្យកាន់តែច្បាស់ អំពីការរិតត្បិតសិទ្ធិសេរីភាពរបស់ប្រជាជនជនជាតិភាគតិច ដែលជាប្រជាជនម្ចាស់ស្រុក នៅតាមរដ្ឋភាគជើង។
គួររំលឹងផងដែរថា ជោគជ័យក្នុងការបោះឆ្នោតកាលពីខែវិច្ឆិកា កន្លងទៅរបស់គណបក្សលោកស្រីអ៊ុងសាន ស៊ូជី គឺបានមកមួយផ្នែក ក៏ដោយសារតែសម្លេងគាំទ្រនៅតាមរដ្ឋភាគខាងជើង ដែលមានជនជាតិភាគតិចរស់នៅច្រើន។ ពួកគេត្រូវការការផ្លាស់ប្តូរ ចាកចេញពីអំណាចយោធាផ្តាច់ការ ទើបពួកគេបោះឆ្នោតគាំទ្រ ក្រុមប្រជាធិបតេយ្យរបស់លោកស្រីអ៊ុងសាន ស៊ូជី។ ម្យ៉ាងវិញទៀត តំបន់ជនជាតិភាគតិត ដែលសំបូរទៅដោយសម្បត្តិរ៉ែមាស រ៉ែត្បូង និងឈើប្រណិត គឺជាចំនុចយុទ្ធសាស្រ្តផងដែរ សម្រាប់សេដ្ឋកិច្ចភូមា។
តាមរយៈសាររបស់លោកស្រីអ៊ុងសាន ស៊ូជី នាពេលនេះ លោកស្រីបានសន្យាថា នឹងធ្វើយ៉ាងណា ផ្តល់សិទ្ធិអំណាចឲ្យបានច្រើនដល់តំបន់ជនជាតិភាគតិច តាមរយៈការធ្វើវិសោធនកម្មរដ្ឋធម្មនុញ្ញបច្ចុប្បន្ន។ ក៏ប៉ុន្តែចំណុចនេះហើយដែលស្ថិតក្នុងការលំបាក ដោយសារតែក្រុមយោធាភូមា នៅតែមានសមាជិកសភារបស់ខ្លួន ចំនួន១ភាគ៤ នៃចំនួនតំណាងរាស្ត្រសរុប។ ការនេះ ធ្វើឲ្យការបោះឆ្នោតវិសោធនកម្មរដ្ឋធម្មនុញ្ញអាចបរាជ័យ ដោយសារតែគ្មានអ្នកយល់ព្រមគ្រប់គ្រាន់ ឲ្យបានលើសពី៧៥%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ