ថៃ៖ របប​សិក​ថ្លែង​ការពារ ការ​ចំណាយ​លើ​កងទ័ព ដែល​ចេះ​តែ​កើនឡើង

ប្រទេសថៃដែលដឹកនាំដោយរបបយោធា ចាប់តាំងពីឆ្នាំ២០១៤មក កំពុងតែក្លាយជាប្រទេសអាស៊ានទីមួយ ដែលមានការចំណាយក្នុងផ្នែកកងទ័ពច្រើនជាងគេបង្អស់។ ឆ្នាំ២០១៩ សភាថៃ បានសម្រេចផ្តល់កញ្ចប់ថវិកា ចំនួន៧ពាន់​លាន​ដុល្លារ ឲ្យដល់វិស័យកងទ័ព។ ប្រមាណ៤ឆ្នាំមកនេះ ថវិកាកងទ័ពថៃ បានកើនឡើងចំនួន១ពាន់លានដុល្លារ។

ខណៈដែលការបោះឆ្នោតសភានៅខែមីនា កាន់តែខិតជិតមកដល់ ក្រុមអ្នកនយោបាយប្រឆាំង មានជាអាទិ៍ មកពីបក្សភឿថៃដែលស្និទនឹងលោកថាក់ស៊ីន បានចេញមុខរិះគន់ ទៅនឹងកញ្ចប់ថវិកាច្រើនហួសប្រមាណ​នេះ។ វិស័យកងទ័ពកាន់តែមាន ផ្ទុយទៅវិញ​ស្ថាប័នរដ្ឋ ក្នុងវិស័យផ្សេង កំពុង​ខ្វះខាតថវិកា ដើម្បីអភិវឌ្ឍន៍ជីវភាព​របស់​ប្រជាជនថៃ ឲ្យល្អប្រសើរ។ ជាងនេះទៅទៀត អ្នករិះគន់ បានលើកឡើងថា របបយោធារបស់លោកប្រាយុទ្ធ ចាន់អូចា យកថវិការដ្ឋទៅបញ្ចុកបំប៉នមេទ័ពធំៗ ឲ្យស្មោះនឹងខ្លួន។

នៅថ្ងៃអាទិត្យទី១៨កុម្ភៈ លោកប្រាយុទ្ធ ចាន់អូចា បានអះអាងថា កងទ័ពថៃត្រូវការបំពាក់ឲ្យមានគ្រឿងសព្វាវុធ និងសម្ភារៈថ្មីទំនើប ដើម្បីដើរឲ្យទាន់ប្រទេសផ្សេង។ នាយករដ្ឋម​ន្ត្រីអតីតមេទ័ពរូបនេះ បន្ថែមថា សង្រ្គាម គ្មាននរណាអាចស្មានទុកមុនបានទេ ហើយបើទោះគ្មានសង្រ្គាម កងទ័ពថៃ ត្រូវធ្វើការឲ្យមានប្រសិទ្ធិភាពក្នុងការប្រយុទ្ធប្រឆាំងគ្រឿងញៀន និងការពារព្រំដែន។ លោកបានឆ្លៀតបញ្ជាក់ថា បុរសជនជាតិថៃ​ ត្រូវតែមានកាតព្វកិច្ចបំរើកងទ័ព។

សូមរំលឹកថា នៅឆ្នាំកន្លងទៅនេះ របបសិកថៃបានទិញសម្ភារសិកជាច្រើនពីចិន មានដូចជាយានមុជទឹកបាតសមុទ្រ និងរថក្រោះជាច្រើនគ្រឿង។ ជារៀងរាល់ឆ្នាំ យុវជនភេទប្រុសថៃ អាយុក្រោយ២១ឆ្នាំ ប្រមាណ១សែននាក់ ត្រូវតែចូលបំរើកងទ័ព លើកលែងតែនិស្សិត។ ក្រុមអ្នករិះគន់ បានលើកឡើងថា របបសិក ត្រូវការប្រើទាហានច្រើន គឺមិនមែនប្រើដើម្បី​ការពារទឹកដី ឬធ្វើសង្រ្គាមអ្វីទេ តែគឺប្រើដើម្បីយកមកគំរាម និងបង្រ្កាបរាល់បាតុកម្មតវ៉ា របស់ប្រជាជនថៃ៕