តៃវ៉ាន់ទាមទារឲ្យជប៉ុនសុំទោស និងសងជម្ងឺចិត្តស្រី្តកំដរតៃវ៉ាន់ កាលពីជំនាន់សង្រ្គាមដែរ
មួយថ្ងៃបន្ទាប់ពីជប៉ុន និងកូរ៉េខាងត្បូង បានត្រូវរូវគ្នាសម្រេចកិច្ចព្រមព្រៀង ស្តីពីការសងជម្ងឺចិត្ត ដល់ស្ត្រីជនជាតិកូរ៉េ ដែលធ្លាប់ត្រូវគេចាប់បង្ខំឲ្យធ្វើជាស្រី្តបំរើផ្លូវភេទ របស់ទាហានជប៉ុន កាលពីជំនាន់សង្រ្គាម នៅថ្ងៃអង្គារនេះ គឺតៃវ៉ាន់ បានមានប្រតិកម្មភ្លាមៗដែរ ថាជប៉ុនក៏ត្រូវតែសងជម្ងឺចិត្ត ដល់ស្រ្តីជនជាតិតៃវ៉ាន់ដែរ។ ជាការពិត ស្ត្រីកំដរផ្លូវភេទ ដែលត្រូវកងទ័ពជប៉ុនចាប់បង្ខំ ក្នុងជំនាន់អាណានិគមចក្រព័ត្រជប៉ុន គឺមិនមែនមានតែជនជាតិកូរ៉េទេ គឺមានស្រ្តីតៃវ៉ាន់ ចិន និងហ្វីលីពីនជាដើម។
ចុះផ្សាយនៅថ្ងៃ៖
ស្តាប់ - ០២:៣០
ជប៉ុនសងជម្ងឺចិត្ត ស្ត្រីជនជាតិកូរ៉េ អញ្ចឹងមានរឿងអី ដែលស្ត្រីជនជាតិតៃវ៉ាន់ មិនត្រូវបានទទួលសំណងដែរ? នេះគឺជាប្រសាសន៍របស់លោក ម៉ា យីងជើ ប្រធានាធិបតីកោះតៃវ៉ាន់ ដែលបានមានប្រតិកម្ម ក្រោយពេលដែលជប៉ុន និងកូរ៉េខាងត្បូង បានសម្រេចចុះកិច្ចព្រមព្រៀង ស្តីពីការសងជម្ងឺចិត្ត ទៅដល់ស្រ្តីទាសករផ្លូវភេទកូរ៉េ ក្នុងជំនាន់អាណានិគមជប៉ុន។ លោកប្រធានាធិបតីតៃវ៉ាន់ ក៏បានទាមទារ ឲ្យជប៉ុនធ្វើការសុំទោស ជាសាធារណៈ នូវទង្វើរព្រៃផ្សៃ អនុស្សធម៌កន្លងមក ដែលខ្លួនធ្លាប់បានប្រព្រិត្តិ ក្នុងសម័យសង្រ្គាមចក្រព័ត្រ ទៅលើប្រជាជនតៃវ៉ាន់។
នៅចន្លោះពីឆ្នាំ ១៨៩៥ ដល់ឆ្នាំ១៩៤៥ កោះតៃវ៉ាន់ ត្រូវស្ថិតនៅក្រោមការគ្រប់គ្រង របស់ទាហ៊ានចក្រព័ត្រជប៉ុន ហើយកាលជំនាន់នោះ មានស្ត្រីតៃវ៉ាន់ជាច្រើន ត្រូវបានគេ កៀងគរចាប់បង្ខំ ឲ្យធ្វើជាស្ត្រីកំដរ បំរើការសប្បាយរបស់ទាហានជប៉ុន។ គ្រប់ប្រទេស ដែលធ្លាប់ស្ថិតក្រោមអំណាចជប៉ុនកាលជំនាន់នោះ គឺមានករណីចាប់បង្ខំស្ត្រី ឲ្យធ្វើជាទាសករផ្លូវភេទនេះ នៅគ្រប់ទីកន្លែង ឲ្យតែមានទាហានជប៉ុន ដូចជានៅចិន កូរ៉េ ហ្វីលីពីន និងឥណ្ឌូណេស៊ីជាដើម។
នៅកោះតៃវ៉ាន់ មានស្ត្រីចំនួន ប្រមាណជា៥៨នាក់ ប៉ុណ្ណោះ ដែលត្រូវជប៉ុនទទួលស្គាល់ជាផ្លូវការថា ពិតជាស្ត្រីដែលធ្លាប់រងគ្រោះ ដោយការចាប់បង្ខំឲ្យធ្វើស្រីកំដរ។ ហើយបច្ចុប្បន្នអ្នកដែលនៅរស់មានជីវិត នៅតៃវ៉ាន់ គឺសល់តែ៤នាក់ប៉ុណ្ណោះ ដែលភាគច្រើន មានអាយុជាង៩០ឆ្នាំទៅហើយ។ ប៉ុន្តែសម្រាប់អ្នកជំនាញប្រវត្តិសាស្ត្រជាច្រើន យល់ថា ចំនួនស្ត្រីដែលធ្លាប់ធ្វើជាទាសករផ្លូវភេទឲ្យជប៉ុន នៅលើកោះតៃវ៉ាន់ គឺមានចំនួនប្រមាណជា ២០០០នាក់ មិនមែន ៥៨នាក់ទេ។
យ៉ាងណាក៏ដោយ ប្រមុខរដ្ឋាភិបាលតៃវ៉ាន់ បានទាមទារឲ្យជប៉ុន ទំនុកបំរុងស្រ្តី៤នាក់ ដែលនៅរស់ ហើយនឹងធ្វើការទទួលស្គាល់ជាសាធារណៈ។ ជប៉ុនមិនអាច សងជម្ងឺចិត្តស្ត្រីជនជាតិកូរ៉េហើយ ចាត់ទុកថាបានធ្វើចប់សព្វគ្រប់នោះទេ។ ជប៉ុនត្រូវតែធ្វើវាទៅគ្រប់កន្លែងទាំងអស់ ហើយនេះគឺជាវិធីតែមួយគត់ ដើម្បីធ្វើការសុំខមាលទោស ព្រមទាំងផ្តល់យុត្តិធម៌ ដល់ជនរងគ្រោះទាំងអស។
សូមបញ្ជាក់ផងដែរថា កាលពីថ្ងៃ ២៨ ធ្នូរដ្ឋាភិបាលជប៉ុនសុខចិត្តសុំទោសស្ត្រីជនជាតិកូរ៉េ ហើយបានផ្តល់ប្រាក់ជាង៧លានយ៉េន ដើម្បីសងជម្ងឺចិត្ត។ ប៉ុន្តែសម្រាប់អ្នករិះគន់កិច្ចព្រមព្រៀងនេះ គេយល់ថា វានៅតែអយុត្តិធម៌ ព្រោះការសងជម្ងឺចិត្តនេះ ជប៉ុនមិនបានបញ្ជាក់ថាជាសំណង ដែលមានតម្លៃគតិយុត្តិ ស្តែងចេញពីការទទួលស្គាល់ពីឧក្រិដ្ឋកម្មរបស់ជប៉ុន ជាផ្លូវការទេ។ ដោយឡែកនៅក្រុងតូក្យ៉ូឯណោះវិញ អ្នកជាតិនិយមជប៉ុនជាង២០០នាក់ បាននាំគ្នាធ្វើបាតុកម្ម នៅមុខវិមានរដ្ឋាភិបាល ដោយបានស្រែកបន្ទោសលោក ស៊ិន ហ្ស៊ូអាបេ ថាបានបន្ថោកបន្ទាបកិត្តិយសជប៉ុន ហើយមិនគោរពវិញ្ញាណខ័ន របស់កងទ័ពជប៉ុន ដែលបានពលីជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ