ឆ្មាំសមុទ្រ​ជប៉ុន ​ប្រទះ​ឃើញ​សាកសព​មនុស្ស​១០​នាក់ ​សង្ស័យ​ជា​ជនជាតិ​កូរ៉េ​ខាង​ជើង

សាកសពមនុស្ស២នាក់ ត្រូវបានគេប្រទះឃើញ នៅតាមឆ្នេរ លើកោះមួយ នៅខាងមុខទីក្រុង Niigata កាលពីចុងសប្តាហ៍កន្លងទៅនេះ។ ឆ្មាំសមុទ្រជប៉ុន បានប្រទះឃើញ មានបំណែកទូកឈើ ដែលអណ្តែតមកទើរ នៅតាមឆ្នេរ បើតាមការសង្ស័យ អាចជាទូកនេសាទ មកពីកូរ៉េខាងជើង។

មន្ត្រីនរគបាលជប៉ុន បានអះអាងថា ដោយសារតែសាកសព មានលក្ខណៈហើមរលួយទៅហើយ ដូចនេះ គេមិនអាចធ្វើកោសល្យវិច័យបានទេ។ តែយ៉ាងណា គេសង្ស័យថា សាកសពនោះ អាចជាប្រជាជនកូរ៉េខាងជើង ព្រោះគេបានប្រទះឃើញ មានប្រអប់ដាក់ថ្នាំជក់កូរ៉េខាងជើង នៅក្បែរសាកសព ហើយសាកសព ទាំងពីរ មានពាក់អាវពោង ដែលមានសរសេរអក្សរកូរ៉េនៅពីលើ។

ជាមួយគ្នានេះដែរ នៅភាគខាងជើងបន្តិច ក្នុងខេត្ត Akita ឆ្មាំសមុទ្រ​ជប៉ុន ក៏បានប្រទះឃើញ សាកសពមនុស្ស៨នាក់ផ្សេងទៀត អណ្តែតនៅក្នុងទូកឈើបាក់បែកមួយ កាលពីថ្ងៃសុក្រកន្លងទៅ ប៉ុន្តែទើបតែសណ្តោងយកមកលើឆ្នេរបាន នៅថ្ងៃចន្ទ ទី២៧វិច្ឆិកានេះ។ ដោយឡែក សមត្ថកិច្ចជប៉ុន បានអះអាងថា គេមិនអាចសន្មត់ឲ្យជាក់ប្រាដកបានទេថា មនុស្សទាំង៨នាក់ ដែលស្លាប់ក្នុងទូកនេះ គឺជាអ្នកនេសាទ ជនជាតិកូរ៉េខាងជើង ដោយសារតែនៅក្នុងទូក ពុំវត្ថុ ឬសម្ភារៈអ្វី អាចជួយឲ្យកំណត់បានទេ។

គួរកត់សម្គាល់ថា យូរៗម្តង ឆ្មាំសមុទ្រជប៉ុន តែងបានប្រទះឃើញទូកឈើនេសាទ និងសាកសពមនុស្ស ដែលអាចជាជនជាតិកូរ៉េខាងជើង ហើយពេលខ្លះ គេបានប្រទះអ្នកនៅរស់មានជីវិតទៀតផង។ យ៉ាងណាមិញ កាលពីថ្ងៃសុក្រ កន្លងទៅនេះ សមត្ថកិច្ចជប៉ុន បានបញ្ជាក់ថា គេបានប្រទះទូកនេសាទ ដែលមានផ្ទុកមនុស្ស៨នាក់ ដែលពួកគេសុទ្ធតែអះអាងថា គេជាអ្នកនេសាទកូរ៉េខាងជើង បានអណ្តែតមកដល់ខាងជប៉ុន​ ដោយសារតែទូកមានបញ្ហាម៉ាស៊ីន។

យោងតាមអ្នកជំ​នាញជប៉ុន គេជឿថា អាជ្ញាធរកូរ៉េខាងជើង បានបញ្ជាឲ្យអ្នកនេសាទខ្លួន បើកទូកមកឆ្ងាយៗ ចូលជ្រៅក្នុងសមុទ្រ ដើម្បីប្រមូលបានផលនេសាទច្រើន ដោយផ្សងនឹងគ្រោះថ្នាក់ ព្រោះជាទូទៅ ទូកនេសាទកូរ៉េខាងជើង គឺជាទូកឈើតូចៗតែប៉ុណ្ណោះ។ ជាទូទៅ មនុស្សដែលគេសង្រ្គោះបាន ភាគច្រើន បានសម្រេចត្រលប់ទៅកូរ៉េខាងជើងវិញ តែមានអ្នកខ្លះ បានស្ម័គ្រចិត្ត ទៅរស់នៅកូរ៉េខាងត្បូង៕