ចិនថា ការស្ថាបនាមូលដ្ឋានទ័ពក្នុងសមុទ្រចិនខាងត្បូង គឺជាការការពារខ្លួន
ពីរថ្ងៃបន្ទាប់ពីមានការផ្សាយរូបភាពផ្កាយរណប ដែលបង្ហញពីសកម្មភាពរបស់ចិន ដែលកំពុងសាងសង់ទីតាំងដាក់តាំងប្រព័ន្ធបាញ់គ្រាប់មីស៊ីល នៅក្នុងសមុទ្រចិនខាងត្បូង ហើយក្រោយពេលដែលសហរដ្ឋអាមេរិក បានមានប្រតិកម្មថ្កោលទោសចំពោះទង្វើបំពានរបស់ចិននេះ ក្រសួងការពារជាតិចិន បានចេញមុខមកអះអាងថា ចិនពិតជាកំពុងកសាងមូលដ្ឋានទ័ពក្នុងសមុទ្រចិនខាងត្បូងមែន ហើយនេះគឺជាសិទ្ធិស្របច្បាប់របស់ចិន ក្នុងការការពារខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ពីមុនរដ្ឋាភិបាលចិន តែងតែប្រកែកថា កោះសិប្បនិម្មិតដែលគេកំពុងតែសាងសង់ នៅក្នុងប្រជុំកោះSpratleys នោះ គឺជាមណ្ឌលស្រាវជ្រាវធនធានសមុទ្រ និងជាកន្លែងសង្រ្គោះអ្នកនេសាទតែប៉ុណ្ណោះ។ ក៏ប៉ុន្តែកាលពីថ្ងៃពុធកន្លងទៅ រូបភាពផ្សាយរណបបានបង្ហាញយ៉ាងច្បាស់ ពីអ្វីដែលចិនកំពុងតែកសាងនៅក្នុងដែនទឹក ដែលកំពុងជាប់ជម្លោះជាមួយប្រទេសជិតខាងនៅឡើយ នោះ។
ក្រុមការងាររបស់ Asia Maritimes Transparency Initiative បានអះអាងថា ដោយយោងលើរូបភាពផ្កាយរណប គឺអ្វីដែលចិនកំពុងសាងសង់នៅលើកោះសិប្បនិម្មិតជាច្រើនកន្លែងនោះ គឺទំនងជាទីតាំងដាក់បញ្ឈរប្រព័ន្ធរ៉ាដាបំផ្លាញគ្រាប់មីស៊ីល និងទីលានចុះចតយន្តហោះចម្បាំងទៀតផង។ សំណង់ទាំងអស់នេះ នឹងអាចជាបណ្តុំមូលដ្ឋានទ័ពដ៏ធំ របស់ចិន ក្នុងសមុទ្រចិនខាងត្បូង។
នៅថ្ងៃព្រហស្បតិ៍ ទី១៥ ធ្នូ ក្រសួងការពារចិន បានចេញមុខទទួលស្គាល់ ដោយបានសរសេរនៅលើគេហទំព័ររបស់ខ្លួនថា ចិនពិតជាកំពុងកសាងប្រព័ន្ធមូលដ្ឋានកងទ័ព ដ៏ធំមួយមែន នៅក្នុងសមុទ្រចិនខាងត្បូង។ ទោះយ៉ាងណា ក្រសួងការពារជាតិចិនបន្ថែមថា សំណង់នៅលើកោះសិប្បនិម្មិតទាំងអស់ គឺភាគច្រើនជាសំណង់ ដែលមានទិសដៅបំរើឲ្យកិច្ចការស៊ីវីល។ ចំណែកឯសំណង់ដែលមានលក្ខណៈផ្នែកកងទ័ពវិញ គឺវាជាការសាងសង់ដ៏ស្របច្បាប់ ដែលមានទិសដៅការពារខ្លួនតែប៉ុណ្ណោះ មិនមែនដើម្បីទៅវាយអ្នកណាមុននោះទេ។ ក្រសួងការពារជាតិចិន បន្តថា បើនរណាម្នាក់ មកអួតក្អេងក្អាង សំញ៉ែញអាវុធ នៅខាងមុខរបងផ្ទះរបស់អ្នក តើអ្នកត្រូវត្រៀមកំលាំងដើម្បីការពារ ផ្ទះអ្នកដែររឺទេ?
សូមបញ្ជាក់ថា អ្វីដែលខាងរដ្ឋាភិបាលចិន ហៅថាជាការការពារខ្លួននេះ តែសម្រាប់សហរដ្ឋអាមេរិក វាគឺជាការគំរាមដល់ស្ថិរភាពតំបន់ទាំងមូល ព្រោះសមុទ្រចិនខាងត្បូង គឺជាច្រកចេញចូលឆ្លងកាត់ នៃនាវាដឹកទំនិញអន្តរជាតិ។ គឺស្ថិតក្នុងកម្មវត្ថុនៃការការពារសន្តិសុខ តំបន់ចរាចរណ៍ដែនទឹកអន្តរជាតិនេះហើយ ទើបអាមេរិក បានបញ្ជូននាវាល្បាតជាច្រើនគ្រឿង ទៅតំបន់នោះ ដើម្បីរក្សាសន្តិសុខ។ តែការនេះ ត្រូវបានចិនយល់ថា ជាការគម្រាមដល់អធិបតេយ្យរបស់ចិន។
ជាងនេះទៅទៀត ការស្ថាបនាកោះសិប្បនិម្មិត ដើម្បីដាក់តាំងមូលដ្ឋានទ័ពរបស់ចិននេះ គឺចិនធ្វើនៅក្នុងតំបន់ដែលកំពុងជាប់ជម្លោះនៅឡើយ។ បើនិយាយពីក្រមខណ្ឌច្បាប់អន្តរជាតិ គឺចិន បានបំពានទាំងស្រុង។ តែបើយើងក្រលេកមកមើលប្រទេសដែលជាប់ជម្លោះជាមួយចិន ក្នុងសំណុំរឿងដែនសមុទ្រនេះវិញ គឺគេឃើញថាប្រទេសមួយចំនួន ដូចជាហ្វីលីពីន និង ម៉ាឡេស៊ី ហាក់បានបន្ថយការតទល់ជាមួយចិន ហើយសុខចិត្តចរចាដោយចាញ់ប្រៀប ជាថ្នូរជាមួយជំនួយសេដ្ឋកិច្ច ដែលចិនបានសន្យា។ មានតែវៀតណាម និងឥណ្ឌូណេស៊ីតែប៉ុណ្ណោះ ដែលបន្តប្រកាន់ជំហររឹងមាំ ទាមទារឲ្យចិនគោរពច្បាប់សមុទ្រអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ