Amnesty International៖ប៉ូលិសចិនបន្តធ្វើទារុណកម្មលើជនសង្ស័យក្នុងពេលឃុំឃាំង
នៅថ្ងៃព្រហស្បតិ៍ ទី១២ វិច្ឆិកានេះ អង្គការការពារសិទ្ធិមនុស្សអន្តរជាតិ Amnesty International បានចេញផ្សាយរបាយការណ៍មួយដោយបញ្ជាក់ថា ការធ្វើទារុណកម្មលើជនសង្ស័យពីសំណាក់ប៉ូលិសចិននៅពេលឃុំឃាំង និងសួរចម្លើយ គឺជាទម្លាប់មួយដែលកំពុងបន្តមានជាប្រចំា។ ការអះអាងយ៉ាងដូចនេះរបស់ Amnesty International ដោយសំអាងលើលទ្ធផលនៃកិច្ចសន្ទនាជាមួយនឹងក្រុមមេធាវីចិនប្រមាណជា ៤០នាក់។ ទន្ទឹមគ្នានេះ មានមេធាវីខ្លះក៏បានសារភាពថា ពួកគេក៏ទទួលរងការធ្វើទុក្ខបុកម្នេញដែរ។
ចុះផ្សាយនៅថ្ងៃ៖
ស្តាប់ - ០១:៥០
នៅក្នុងរបាយការណ៍ដែលបានផ្សព្វផ្សាយជាសាធារណៈក្នុងថ្ងៃនេះ Amnesty International បានប្រាប់ឲ្យដឹងពីវិធានការទារុណកម្មដែលប៉ូលិសចិនបានអនុវត្តន៍លើជនសង្ស័យដែលពួកគេបានចាប់ទៅឃុំ រួមមាន ទាត់ធាក់ វាយនឹងស្បែកជើង វាយនឹងដបទឹក មិនឲ្យដេក ឬមួយក៏ចងនឹងច្រវ៉ាក់ជាប់នឹងកៅអីអស់ជាម៉ោងជាប់ៗគ្នា។ យោងតាមតួលេខផ្លូវការបញ្ជាក់ដោយ Amnesty International ឲ្យដឹងថា នៅចន្លោះឆ្នំា ២០០៨ និងពាក់កណ្តាលឆ្នំា ២០១៥ នេះ តុលាការចិនបានទទួលបណ្តឹងយ៉ាងតិច ១ ៣២១ករណីដែលបរិហារពីការធ្វើទារុណកម្មដើម្បីទទួលបានចម្លើយសារភាពពីជនសង្ស័យ។ តែក្នុងរយៈពេលដូចគ្នានេះ មានមនុស្សតែ ២៧៩នាក់ប៉ុណ្ណោះដែលបានកាត់ទោសពីបទកំហែងយកចម្លើយសារភាពតាមរយៈការធ្វើទារុណកម្ម។
យោងតាមរបាយការណ៍របស់ Amnesty International ដដែល ក្រុមមេធាវីចិនដែលខ្លះជាអ្នកតំណាងឲ្យសកម្មជនប្រឆំាង និងខ្លះទៀតជាសមាជិកក្រុមសាសនាបានថ្លែងឲ្យដឹងថា ពួកគេក៏ទទួលរងការធ្វើទារុណកម្មដែរ។ ក្នុងចំណោមមេធាវីចិន ៣៧នាក់ដែល Amnesty International បានសាកសួរ មាន ១០នាក់បាននិយាយថា ពួកគេបានទទួលរងការធ្វើទារុណកម្មតំាងពីឆ្នំា ២០១០ និងអ្នកខ្លះទៀតបានទទួលរងការដៀលត្មះ។ Amnesty International បានបញ្ជាក់ថា រដ្ឋាភិបាលចិនហាក់ដូចជាបានទើសទាល់ចិត្តខ្លំាងនឹងការកាត់ទោសដែលគ្មានភស្តុតាងត្រឹមត្រូវ ហើយមិនសូវជាចាប់អារម្មណ៍នឹងភាពចំាបាច់ក្នុងការប្រយុទ្ធប្រឆំាងនឹងការអនុវត្តន៍ទារុណកម្មលើជនសង្ស័យក្នុងពេលឃុំឃាំងប៉ុន្មានទេ។
យ៉ាងណាក៏ដោយ របាយការណ៍របស់ Amnesty International បានធ្លាក់មក ១សប្តាហ៍មុននឹងគណៈកម្មការប្រឆំាងទារុណកម្មរបស់អង្គការសហប្រជាជាតិផ្តើមពិនិត្យមើលលើសំណុំរឿងរបស់ប្រទេសចិនទាក់ទងនឹងទារុណកម្មនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ