អាស៊ានជំរុញឱ្យកម្ពុជាដោះស្រាយបញ្ហាប្រាក់ខែគ្រូបង្រៀន
សមាគមន៍អាស៊ានស្តីពីប្រព័ន្ធអប់រំ កាលពីពេលថ្មីៗនេះ បានបញ្ចេញរបាយការណ៍ស្តីពីបញ្ហាអប់រំរបស់បណ្តាប្រទេសក្នុងតំបន់អាស៊ីអាគ្នេយ៍ ក្នុងនោះក៏មានដែរបញ្ហាអប់រំរបស់ប្រទេសកម្ពុជា។ របាយការណ៍នោះបានបញ្ជាក់ថា ប្រាក់ខែគ្រូបង្រៀននៅទាបគឺជាចំណុច ធ្វើឲ្យវិស័យអប់រំនៅកម្ពុជានៅទន់ខ្សោយ។
ចុះផ្សាយនៅថ្ងៃ៖
ស្តាប់ - ០២:០៧
បញ្ហាប្រាក់បៀរវត្សគ្រូបង្រៀននៅទាប តម្រូវឲ្យរដ្ឋាភិបាលកម្ពុជាត្រូវដោះស្រាយបញ្ហានេះជាបន្ទាន់។ នេះជារបាយការណ៍របស់សមាគមន៍អាស៊ានស្តីពីបញ្ហាអប់រំដែលបណ្តាញសារព័ត៌មានទើបតែទទួលបាន។ ក្នុងរបាយការណ៍កំរាស់ជាង១០០ទំព័ររបស់ខ្លួនដែលបានចុះហត្ថលេខាដោយអគ្គលេខាធិកាលោក ឡេ ឡុងមីង។ អាស៊ាន បានសំឡឹងមើលពីបញ្ហាច្បាប់ និងរដ្ឋបាល ប្រព្ធ័នអប់រំជាទូទៅទាំងបីកម្រិត ការបណ្តុះបណ្តាលបច្ចេកទេស ការបណ្តុះបណ្តាលក្រៅប្រព៍័ន្ធ បញ្ហាប្រឈមដូចជាហិរញ្ញវត្ថុ ការគ្រប់គ្រង និងអភិបាលកិច្ច វិសមភាពនៃការសិក្សា រួមទាំងគុណភាពនៃការអប់រំផងដែរ។
ក្នុងរបាយការណ៍ដដែលនោះ ក្រៅពីបញ្ហាប្រាក់នៅទៀបដែលគ្រូបង្រៀននៅកម្ពុជាកំពុងតែប្រឈមនោះ របាយការណ៍នេះ បានបង្ហាញពីពីវិសមភាពនៃការសិក្សារបស់ក្មេងនៅតំបន់ប្រជុំជន និងអ្នកនៅតំបន់ដាច់ស្រយាលផងដែរ។ ពោលគឺក្មេងនៅតំបន់ប្រជុំជនដាច់ស្រយ៉ាលតែ១០ភាគរយតែប៉ុណ្ណោះដែលបានបញ្ចប់ថ្នាក់អនុវិទ្យាល័យ និងចំនួនក្មេងនៅតំបន់ជនបទដាច់ស្រយាលចំនួន១៨ភាគរយ បានទទួលការអប់រំស្រដៀងគ្នានេះ។ ខណៈដែលកូនអ្នកមានជីវភាពធូធារនៅតំបន់ប្រជុំជន៦៩ភាគរយទទួលបានការសិក្សានៅថ្នាក់អនុវិទ្យាល័យ។ ទន្ទឹមនឹងនេះ អាស៊ានជំរុញឱ្យរដ្ឋាភិបាលកម្ពុជាបន្តលើកទឹកចិត្តដល់លោកគ្រូអ្នកគ្រូឱ្យចូលទៅបម្រើការនៅតំបន់ដាច់ស្រយាល និងតំបន់ជនជាតិភាគតិច។
ក្រសួងអប់រំនៅមិនទាន់អាចទាក់ទងដើម្បីឆ្លើយតបនឹងការលើកឡើងរបស់អាស៊ានស្តីពីបញ្ហាប្រាក់ខែគ្រូបង្រៀននៅទៀបនេះនៅឡើយទេ។ យ៉ាងណាក៏ដោយក្នុងអាណត្តិទី៥នេះ ក្រសួងអប់រំបានសម្រេចផ្តល់ប្រាក់បំណាច់ទៅដល់គ្រូបង្រៀនគ្រប់កម្រិតដើម្បីបំពេញទៅនឹងប្រាក់ខែដែលមានកំរិតទាបនោះ។ ប្រធានសមាគមន៍គ្រូបង្រៀនកម្ពុជាឯករាជ្យ លោក រ៉ុងឈុន បានគាំទ្រចំពោះការលើកឡើងរបស់អាស៊ានដែលជំរុញឱ្យរដ្ឋាភិបាលដោះស្រាយការតំឡើងប្រាក់ខែនេះ។ លោកបានបញ្ជាក់ថា ប្រាក់ខែតិចតួចរបស់គ្រួបង្រៀននេះ បានបណ្តាលឱ្យគ្រូបង្រៀនស្វែងរកមុខរបរទី២ ដែលនេះគឺបានប៉ះពាល់គុណភាពនៃវិស័យអប់រំ។ លោកបានសង្កត់ធ្ងន់ថា៖ «ការកែប្រែប្រព័ន្ធអប់រំតែម្ខាងមិនអាចទៅរួចទេ ល្គឹកណាប្រាក់ខែគ្រូបង្រៀនមិនបានដំឡើង»។
សូមបញ្ជាក់ថា នាពេលបច្ចុប្បន្នគ្រូបង្រៀនពីថ្នាក់បឋមទៅដល់ថ្នាក់វិទ្យាល័យទទួលបានប្រាក់បៀរវត្សជាមធ្យមពី៤០ទៅ ៦០ម៉ឺនរៀលក្នុងរយៈមួយខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ