រុស្ស៊ីចាប់ខ្លួនក្រុមភេរវជនអ៊ុយក្រែននៅគ្រីមេ អូតង់សង្កេតឃើញការដកថយកងទ័ពរុស្ស៊ីពីព្រំដែនអ៊ុយក្រែន
នៅថ្ងៃសុក្រម្សិលមិញ រុស្ស៊ីបានប្រកាសថា បានចាប់ខ្លួនក្រុមជាតិនិយមជ្រុលអ៊ុយក្រែនមួយក្រុម ដែលបានប៉ុនប៉ងធ្វើអំពើភេរវកម្មបំផ្លាញហេដ្ឋារចនាសម្ព័ន្ធនៅតំបន់គ្រីមេ។ រុស្ស៊ីទើបភ្ជាប់តំបន់គ្រីមេចូលក្នុងទឹកដីខ្លួន កាលពីខែមិនាកន្លងទៅ។ ម្សិលមិញដែរ អង្គការអូតង់បានប្រាប់ថា បានសង្កេតឃើញថា កងទ័ពរុស្ស៊ីបានដកថយពីព្រំដែនអ៊ុយក្រែនហើយ។ ដោយឡែក អ៊ុយក្រែនបានបន្ទន់ឥរិយាបថ ដោយបានសងបំណុលឧស្ម័នអោយរុស្ស៊ីមួយចំណែក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ផ្នែកសន្តិសុខរុស្ស៊ី បានប្រកាសនៅថ្ងៃសុក្រម្សិលមិញ ថាបានចាប់ខ្លួនក្រុមភេរវជនអ៊ុយក្រែនមួយក្រុម ពីបទប៉ុនប៉ងធ្វើភេរវកម្ម បំផ្លាញហេដ្ឋារចនាសម្ព័ន្ធនៅតំបន់គ្រីមេ។ រុស្ស៊ីប្រាប់ថា ក្រុមភេរវជនអ៊ុយក្រែនទាំងនេះ មានគ្នា៤នាក់ ក្នុងនោះ មានផលិតករកុនវ័យក្មេងមួយរូប ជាអ្នកដឹកនាំ។ ភេរវជនទាំង៤រូបនេះ ចេញមកពីក្រុមយោធាជាតិនិយមអ៊ុយក្រែនមួយ ឈ្មោះថា Pravy Sektor។ រុស្ស៊ីចោទពួកគេ ពីបទចង់បង្កភេរវកម្មនៅក្រុងសាំប៉េរ៉ូហ្វូល យ៉ាល់តា និងសេបាស្តូប៉ូល និងចង់បំផ្លាញហេដ្ឋារចនាសម្ព័ន្ធមួយចំនួននៅគ្រីមេ។
ដោយឡែក ម្សិលមិញនេះ អង្គការអូតង់បានប្រកាសថា បានសង្កេតឃើញការដកថយរបស់កងទ័ពរុស្ស៊ីពីរភាគ ចេញពីព្រំដែនអ៊ុយក្រែន។ អូតង់ធ្លាប់រំពឹងថា កងទ័ពរុស្ស៊ីនៅតាមព្រំដែនអ៊ុយក្រែនមានចំនួនប្រមាណ៤ម៉ឺននាក់។ ប្រធានាធិបតីរុស្ស៊ី ធ្លាប់ប្រាប់កាលពីថ្ងៃចន្ទ រួចហើយថា កងទ័ពរុស្ស៊ីនៅជិតព្រំដែនអ៊ុយក្រែននឹងវិលត្រលប់ទៅកាន់បន្ទាយខ្លួនវិញ ក្រោយពេលបញ្ចប់សមយុទ្ធ និទាឃរដូវនេះ។
អង្គការអូតង់បានសុំអោយក្រុងម៉ូស្គូបញ្ឈប់ការគាំទ្រដល់ក្រុមបះបោរផ្តាច់ទឹកដីនិយម នៅភាគខាងកើតអ៊ុយក្រែនទៀត ហើយសុំអោយរុស្ស៊ីបិទព្រំដែនដើម្បីចៀសវាងកុំអោយក្រុមប្រយុទ្ធ អាចចូលទៅកាន់អ៊ុយក្រែនបាន។ នៅថ្ងៃចន្ទខានស្អែកនេះ ជំនួបក្រុមប្រឹក្សាអូតង់-រុស្ស៊ី នឹងបើកធ្វើ នៅក្រុងព្រុចសែល ជាលើកដំបូង គិតក្រោយពេលរុស្ស៊ីភ្ជាប់គ្រីមេចូលក្នុងទឹកដីខ្លួន ក្នុងខែមិនាមក។ ជំនួបនេះនឹងមានការចូលរួមរបស់ប្រទេសសមាជិកអូតង់ទាំង២៨។
ម្សិលមិញនេះ ក្នុងជំនួបរវាងបេសកជនផ្នែកថាមពលអឺរ៉ុប និងរដ្ឋមន្ត្រីថាមពលរុស្ស៊ី នៅក្រុងប៊ែរឡាំង រដ្ឋមន្ត្រីថាមពលអ៊ុយក្រែនបានប្រាប់ថា អ៊ុយក្រែនបានសងថ្លៃជំពាក់ឧស្ម័នជាទឹកប្រាក់៧៨៦លានដុល្លារអោយក្រុមហ៊ុនហ្កាសព្រូមរុស្ស៊ី។ ទឹកប្រាក់នេះ ត្រូវនឹងថ្លៃជំពាក់ឧស្ម័នខែកុម្ភៈ និងមិនា។ ទង្វើអ៊ុយក្រែនជាការជួយសម្រួលភាពតានតឹងក្នុងជម្លោះជាមួយរុស្ស៊ី ព្រោះថា កន្លងមកក្រុមហ៊ុនឧស្ម័នរុស្ស៊ី បានគម្រាមកាត់ផ្តាច់រ៉ូប៊ីណេឧស្ម័ន ចាប់ពីថ្ងៃអង្គារសប្តាហ៍ក្រោយនេះ ប្រសិនបើអ៊ុយក្រែនមិនព្រមចេញសងថ្លៃជំពាក់ខ្លះទេនោះ។
ទាក់ទងវិបត្តិអ៊ុយក្រែននេះដែរ សមាជិកសភាអាមេរិក៣រូបបានសុំអោយបារាំងបញ្ឈប់កិច្ចសន្យាលក់នាវាចំបាំងប្រភេទមីស្ត្រាល់ Mistral ពីរគ្រឿង ទៅអោយរុស្ស៊ី។ សមាជិកសភាអាមេរិកទាំងនេះ លើកឡើងថា ជាជាងលក់អោយរុស្ស៊ី បារាំងគួរតែជួលរឺលក់នាវាចំបាំងទៅអោយអង្គការអូតង់វិញ។ បារាំងប្រាប់ថា ពេលនេះ ទ្វារនៅបើកចំហរដើម្បីពិនិត្យលើកិច្ចសន្យាលក់នាវាចំបាំងអោយរុស្ស៊ីឡើងវិញ។ ជាកិច្ចសន្យាមានតម្លៃ១ពាន់លាន៦សែនដុល្លារ។
ដោយឡែក នៅថ្ងៃ៤មិថុនាខាងមុខ ក្នុងក្របខណ្ឌនៃទស្សនកិច្ចនៅអឺរ៉ុប ប្រធានាធិបតីអាមេរិក អូបាម៉ា នឹងជួបប្រធានាធិបតីអ៊ុយក្រែនថ្មី ប៉ូរ៉ូឆិនកូ ដើម្បីប្រាប់លោកប៉ូរ៉ូឆិនកូផ្ទាល់ ពីការគាំទ្ររបស់អាមេរិកចំពោះអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ