រោងចក្រយោធាដែលគេបោះបង់ចោល កំពុងគំរាមជាមហន្តរាយដល់ខេត្ត ៤នៅរុស្ស៊ី
សហគ្រាសរោងចក្រ ដែលសម័យសូវៀត ធ្លាប់បានផលិតអាវុធគីមី និងធាតុផ្ទុះ ហើយត្រូវប្រទេសរុស្ស៊ីសម័យថ្មី បញ្ឈប់ឲ្យលែងដំណើរការ ស្របនឹង “សន្ធិសញ្ញាអន្តរជាតិឆ្ពោះទៅ កំទេចអាវុធគីមី” បច្ចុប្បន្ន ក្លាយជាគ្រោះថ្នាក់ធំមែនទែន ដល់បរិស្ថាន និងជីវិតបណ្តាជន ខេត្ត៤ ក្នុងប្រទេសរុស្ស៊ី។ តាមទិន្នន័យកាសែតរុស្ស៊ីដ៏ចំណាស់វ័យ ឈ្មោះ Izvestia លេខថ្ងៃនេះ គឺ ខេត្ត២ នៅតំបន់ស៊ីបេរី និង ២ទៀត នៅប៉ែកខាងត្បូងរដ្ឋធានីម៉ូស្គូ។
ចុះផ្សាយនៅថ្ងៃ៖
ស្តាប់ - ០២:៣១
ទី១-គឺ”រោងចក្រគីមី”នៅខេត្ត Volgograd ប្រមាណ៩០០គីឡូម៉ែត្រខាងត្បូងពីម៉ូស្គូ ដែល សម័យសូវៀត មុនឆ្នាំ១៩៨៧ បានផលិតអាវុធគីមី ដោយប្រើធាតុ Chlore ជាមូលដ្ឋាន។ ទឹក បង្ហូរចេញពីការផលិតនេះ ព្រមទាំងកាកសំណល់គោករបស់វា អស់ជាច្រើនឆ្នាំ បានត្រូវគេយកទៅ គរ ទុក នៅក្នុងបឹងមួយដែលត្រូវគេឲ្យឈ្មោះថា “សមុទ្រស”។ ធាតុពុលទាំងនេះ សព្វថ្ងៃ មានទំហំ ១លាន៥សែនតោន។ តាមកាសែត Izvestia ក្រសួងឧស្សាហកម្មបានសុំរដ្ឋាភិបាលឲ្យបញ្ចូលទៅក្នុងថវិកា សម្រាប់ឆ្នាំ២០១២ នូវខ្ទង់ចំណាយ ប្រមាណ៣៧០លានដុល្លារអាមេរិក ដើម្បីយកទៅជំនះលើផលវិបាកនេះ ប៉ុន្តែ មកទល់ឥឡូវ បញ្ហានេះនៅមិនទាន់គេដោះស្រាយច្បាស់លាស់ នៅឡើយ។
ទី២-គឺ ”រោងចក្រគីមី” នៅខេត្ត Toula ចម្ងាយ២០០គីឡូម៉ែត្រ.ខាងត្បូងពីម៉ូស្គូដែរ ដែលតែងបានផលិតធាតុ Nitrocellulose។ ប៉ុន្តែ ចាប់ពីឆ្នាំ១៩៩៥មក គឺឈប់ដំណើរការទៅ មកពីលែងមាន បទបញ្ជាទិញផលិតផលនេះ ពីខាងក្រសួងការពារជាតិ។ រួចសព្វថ្ងៃ នៅទីនោះ មានគរទុកក្នុង បរិមាណដល់ជាង២សែនតោន គឺ កាកសំណល់ Nitrate Cellulose និងវត្ថុធាតុដើមសម្រាប់ផលិតរំសេវផ្ទុះ។ កាកសំណល់ទាំងនេះ ត្រូវគេរក្សាទុកក្រោមស្រទាប់ទឹក ហើយក្នុងករណី បើ ទឹកនោះ រីងស្ងួត ឬ ក៏បែរទៅជាត្រជាក់ជ្រុលដល់កក នោះគឺអាចផ្ទុះគ្ឌាំងតែម្តង។
មិនតែប៉ុណ្ណោះ វត្ថុធាតុជា”ភ្នាក់ងារគីមី”បែបយ៉ាង ធាតុAzote លាយជាមួយ Acide sulfurique បរិមាណ២.១៥០តោន ទោះបីត្រូវគេទុកក្នុងធុងក្តី ក៏ ចំហាយវា ភាយទៅក្នុងអាកាស ក្នុង មួយឆ្នាំៗ នូវធាតុ Acide sulfurique ដល់ទៅ១២តោន និងធាតុAzote ដល់ទៅ៨តោន។ ក្នុងករណីនេះ ក្រសួងឧស្សាហកម្ម បានសុំពីរដ្ឋាភិបាល គឺទឹកប្រាក់ ៨២លានដុល្លារ។
ទី៣-គឺ”រោងចក្រគីមី” នៅខេត្ត Krasnoyarsk ៣.៦០០គ.ម. ខាងកើតម៉ូស្គូ ដែលបើកាលណា ស្រាប់តែផ្ទុះទៅ ធាតុគីមីសល់ពីការផលិតជំនាន់សូវៀត នោះ តាមមតិពួកអ្នកជំនាញការ គឺអាចផ្តាច់ជីវិតមនុស្ស រហូតដល់១២.០០០នាក់។ ក្រសួងឧស្សាហកម្មបានសុំប្រាក់ ៧០លានដុល្លារ សម្រាប់បំពេញការរងារ ខាងជំនះលើគ្រោះថ្នាក់ជា យថាហេតុនោះ។
ទី៤-គឺ”រោងចក្រគីមី” នៅខេត្ត Sverdlovsk ១.៤០០គ.ម.ខាងកើតពីម៉ូស្គូ ដែលកាលមុន ស្ថិតក្រោមបញ្ជារបស់ក្រសួងការពារជាតិ តែងផលិតធាតុផ្ទុះ TNT។ បើធាតុផ្ទុះដែលនៅសល់ទីនោះ ស្រាប់តែផ្ទុះទៅ គឺវានឹងបង្កជាការខូចខាត ក្នុងទឹកប្រាក់ ដល់២.០០០លានដុល្លារ ប៉ុន្តែ ក្រសួងឧស្សាហកម្មសុំតែ ២៣លានដុល្លារប៉ុណ្ណោះ សម្រាប់បញ្ចៀសឲ្យផុតពីមហន្តរាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ