អង្គភាពប្រឆាំងអំពើពុករលួយនៅមិនទាន់ឈានដល់ការចាប់ខ្លួនមន្ត្រីជាន់ខ្ពស់
អង្គភាពប្រឆាំងអំពើពុករលួយបានបង្កើនការចាប់ខ្លួនមន្ត្រី និងអតីតមន្ត្រី យ៉ាងសកម្មនៅដើមឆ្នាំ ២០១៤នេះ។ កាលពីម្សិលមិញ អង្គភាពនេះបានចាប់ខ្លួនចុងក្រោយ អតីតអធិការប៉ូលីសស្រុក បន្ទាយមាស ខេត្តកំពត។ ក៏ប៉ុន្តែ នៅតែរងការរិះគន់ថា គ្រាន់តែជាការចាប់ខ្លួនមន្ត្រីថ្នាក់ទាប និងថ្នាក់មធ្យមប៉ុណ្ណោះ។
ចុះផ្សាយនៅថ្ងៃ៖
អង្គភាពប្រឆាំងអំពើពុករលួយត្រូវគេមើលឃើញថា បានបង្កើនការចាប់ខ្លួនទៅលើមន្ត្រីពុករលួយដែលកំពុងនៅក្នុងតំណែង និងឈប់ពីតំណែងរាជការ នៅគ្រប់ទីកន្លែងនៃប្រទេសកម្ពុជា។
តាមរយៈការចាប់ខ្លួនលោក ស្រុន ឡាំ អតីតអធិការប៉ូលីសសស្រុកបន្ទាយមាស ខេត្តកំពត កាលពីម្សិលមិញ ទាក់ទងទៅនឹងសំណុំរឿងពុករលួយមួយចំនួន គឺជាករណីដែលគេមើលឃើញថា អង្គភាពប្រឆាំងអំពើពុករលួយបានចាប់ខ្លួន មន្ត្រីថ្នាក់ទាបម្នាក់ទៀតហើយ។
លោក ព្រាប កុល នាយកប្រតិបត្តិអង្គការតម្លាភាពកម្ពុជាបានកត់សម្គាល់ថា អង្គភាពប្រឆាំងអំពើពុករលួយមានឆន្ទៈ ធ្វើការដោយមួយរយៈចុងក្រោយនេះ អង្គភាពនេះបានធ្វើការចាប់ខ្លួនមនុស្សប្រហែលពី៦ ទៅនាក់ សុទ្ធសឹងជាមន្ត្រីថ្នាក់មធ្យមនិង មន្ត្រីថ្នាក់ទាប។ លោកព្រាប កុល បន្តថាជាការលើកទឹកចិត្តមួយដល់ការងារនេះ ក៏ប៉ុន្តែ មន្ត្រីថ្នាក់ខ្ពស់ និងមន្ត្រីនយោបាយដែលបានពាក់ព័ន្ធនឹងអំពើពុករលួយនៅមិនទាន់មានការចាប់ខ្លួននៅឡើយ។ នេះមិនរ៉ាប់ពីករណី ធំមួយនៅឆ្នាំ ២០១២ ដែលកាលណោះមានការចាប់ខ្លួន ឧត្តមសេនីយ៍ផ្កាយបីមួយរូប គឺលោក ម៉ឹក តារា អតីត អគ្គលេខាធិការអាជ្ញាធរជាតិប្រឆាំងគ្រឿងញៀន និងជាអតីតប្រធានមន្ទីរប៉ូលិសប្រឆាំងគ្រឿងញៀន របស់ក្រសួងមហាផ្ទៃ។
លោក ទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយមិនមានការពន្យល់អំពីការចាប់ខ្លួនមន្ត្រីថ្មី ដែលគួរឲ្យកត់សម្គាល់នោះឡើយ។ ក៏ប៉ុន្តែលោក ឱម យិនទៀងធ្លាប់បានប្រាប់វិទ្យុបារាំងអន្តរជាតិ RFI ថា អង្គភាពរបស់លោកនឹងចាត់វិធានការស្មើភាពគ្នា នៅពេលមានបណ្តឹងត្រឹមត្រូវ និងមានភស្តុតាងច្បាស់លាស់។
ទោះយ៉ាងនេះក្តី លោក ព្រាប កុល នាយកអង្គការតម្លាភាពកម្ពុជា ឲ្យដឹងបន្ថែមថា មហាជនក៏ដូចជាអង្គការសង្គមស៊ីវិលចង់ឃើញការចាប់ខ្លួនណាមួយទៅលើមន្ត្រីថ្នាក់លើ នៅពេលដែលមានភស្តុតាងច្បាស់លាស់ ដោយលោក ចង់ចង្អុលបង្ហាញពីចំណាត់ការរបស់ប្រទេសចិន ដែលមានការបោសសំអាតមន្ត្រីកំពូលៗ ទាក់ទង់ទៅនឹងបទស៊ីសំណូក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ