ជំនួបប្រចាំឆ្នាំស្តីពីតំបន់ត្រីកោណអភិវឌ្ឍន៍បង្ហាញពីការកើនឡើងនៃលំហូរទុនវិនិយោគ
ទំហំពាណិជ្ជកម្មដែលហូរចូលក្នុងតំបន់ត្រីកោណអភិវឌ្ឍន៍នៃប្រទេសកម្ពុជា វៀតណាម និងឡាវ មានការកើនឡើងជាលំដាប់។នៅក្នុងសន្និសីទរយៈពេល ៤ថ្ងៃនៅខេត្តសៀមរាប។មន្ត្រីជាន់ខ្ពស់នៃគណៈកម្មការវិនិយោគកម្ពុជា បានបង្ហាញនូវតួលេខប្រកបដោយសុទិដ្ឋិនិយមដែលនេះជាបច្ច័យដែលទទួលបានពីការអភិវឌ្ឍន៍តំបន់ត្រីកោណសេដ្ឋកិច្ច ដោយកម្ពុជាទទួលបានផលប្រយោជន៍ពីការវិនិយោគលើវិស័យកសិកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
អស់រយៈពេល ២០ កន្លងទៅនេះ គឺចាប់ពីឆ្នាំ១៩៩៤ ដល់ឆ្នាំ២០១៤នេះ ទឹកប្រាក់ដែលជាទុនវិនិយោគ ហើយត្រូវហូរចូលមកក្នុងប្រទេសកម្ពុជា តាមបណ្តាខេត្តនៃត្រីកោណអភិវឌ្ឍន៍ មានខេត្តរតនៈគីរី មណ្ឌលគីរី ក្រចេះនិងស្ទឹងត្រែង មានចំនួនជាង ៣ពាន់លានដុល្លារ ជាពិសេសលើវិស័យកសិកម្ម ដំណាំកៅស៊ូ។
តួរលេខនេះបានបង្ហាញចេញតាមរយៈសុន្ទរកថាមួយដែលថ្លែងដោយលោក ជា វុទ្ធី អគ្គលេខាធិការរងគណៈកម្មការវិនិយោគកម្ពុជា នៅក្នុងឱកាសនៃកិច្ចប្រជុំលើកទី៨ ស្តីពីការជម្រុញពាណិជ្ជកម្ម វិនិយោគ និងទេសចរណ៍ក្នុងតំបន់ត្រីកោណអភិវឌ្ឍន៍ ចាប់ពីថ្ងៃទី៩ដល់ថ្ងៃទី១២ ខែកញ្ញានៅទីក្រុងសៀមរាប។
សន្និសីទដែលមានការចូលរួមពីប្រទេសត្រីកោណអភិវឌ្ឍន៍ មានកម្ពុជា វៀតណាម និងឡាវដែលគេធ្វើឡើងជារៀងរាល់ឆ្នាំនោះ បានផ្តោតសំខាន់ទៅលើដំណោះស្រាយនានារាល់ឧបសក្គ ដែលជាការប្រឈម ក្នុងតំបន់ដែលមានខេត្តជាប់ព្រំដែនគ្នាចំនួន១៣ ហើយជាការប្រើប្រាស់នូវសក្តានុពលក្នុងតំបន់ដើម្បីបំរើប្រយោជន៍ប្រទេសរៀងៗខ្លួន។
សម្រាប់ប្រទេសកម្ពុជាលោក ជា វុទ្ធី ថ្លែងថាប្រមុខរដ្ឋាភិបាលកម្ពុជាបានប្រើប្រាស់ការយកចិត្តទុកដាក់ខ្ពស់ក្នុងការជម្រុញការវិនិយោគ ពាណិជ្ជកម្ម និងទេសចរណ៍ក្នុងតំបន់ត្រីកោណ កម្ពុជា វៀតណាម ឡាវ ដែលមានលក្ខណៈជាចំណងមិត្តភាពស៊ីជម្រៅ និងមានលក្ខណៈជាប្រវត្តិសាស្ត្រ។
ក្នុងចំណោមទុនវិនិយោគដែលហូរចូលខេត្តនៃត្រីកោណអភិវឌ្ឍរបស់ប្រទេសកម្ពុជា ស្ទឹងត្រែងទទួលបានច្រើនជាងគេគឺ ជាង១១០០លានដុល្លារ ដោយហេតុថាខេត្តស្ទឹងត្រែងមានលំហូរវិនិយោគផ្សេងទៀតក្រៅពីដំណាំកៅស៊ូ គឺគម្រោងសាងសង់វារីអគ្គីសនីដែលមានទឹកប្រាក់រហូតដល់ ៧៨១ដុល្លារ។
តាមលោក ជា វុទ្ធី ទំហំពាណិជ្ជកម្មរវាងប្រទេសទាំងបីមានការកើនឡើងជាលំដាប់។សម្រាប់តួលេខបីឆ្នាំចុងក្រោយនេះ ទំហំពាណិជ្ជកម្មសរុបរវាងកម្ពុជានិងឡាវគឺមាន១៩លានដុល្លារ រីឯទំហំពាណិជ្ជកម្មរវាងកម្ពុជានិងវៀតណាមវិញមានសរុបរហូតដល់ ជិត៣ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ