ប្រាក់បំណុល៖ អ្នកនយោបាយខិតខំប្រយុទ្ធទប់ទល់នឹងវិបត្តិ ប៉ុន្តែពុំបានធ្វើឲ្យគេមានជំនឿឡើយ
ថ្វីដ្បិតតែទីផ្សារមូលបត្រអន្តរជាតិនៅថ្ងៃពុធទី១០សីហាឆ្នាំ២០១១នេះបានស្គាល់ភាពធូរស្បឿយបន្តិចវិញ ក្រោយពីទីផ្សារមូលបត្រនៅទូទាំងពិភពលោកបានឋិតនៅក្រោមការគំរាមយ៉ាងខ្លាំងនៃព្យុះសង្ឃរាហិរញ្ញវត្ថុ ដោយហេតុតែគេខ្លាចក្រែងសហរដ្ឋអាមេរិកជួបនឹងសេដ្ឋកិច្ចដើរថយក្រោយសាជាថ្មី។ អ្នកនយោបាយខិតខំប្រយុទ្ធទប់ទល់នឹងវិបត្តិ ប៉ុន្តែពុំបានធ្វើឲ្យគេមានជំនឿឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥៧
នៅចំពោះមុខទីផ្សារហិរញ្ញវត្ថុដែលវិវត្តទៅយ៉ាងឆាប់រហ័ស អ្នកវិនិយោគកាន់តែបាត់បង់អំណត់អត់ធន់របស់ខ្លួន ចំណែកឯអ្នកដឹកនាំប្រទេសវិញពុំបានបង្ហាញឲ្យឃើញនូវវិធានការអ្វីឲ្យបានច្បាស់លាស់ឬមធ្យោបាយគ្រប់គ្រាន់សម្រាប់ប្រយុទ្ធដោះស្រាយវិបត្តិហិរញ្ញវត្ថុនិងវិបត្តិសេដ្ឋកិច្ចឡើយ។ ទោះបីជានៅរយៈពេលប៉ុន្មានថ្ងៃចុងក្រោយនេះ អ្នកនយោបាយទាំងនោះបានខិតខំបញ្ចេញសុន្ទរកថាពោរពេញទៅដោយសុឆន្ទៈយ៉ាងណាក្តី។ ទាំងនេះហើយដែលបានធ្វើឲ្យអ្នកវិនិយោគបាត់បង់ទំនុកចិត្តទៅលើអ្នកនយោបាយ។
អនុសាសន៍របស់លោកប្រធានធនាគារកណ្តាលអឺរ៉ុប
លោក Jean–Claude Trichet ប្រធានធនាគារកណ្តាលអឺរ៉ុបបានថ្លែងទៅកាន់បណ្តារដ្ឋាភិបាលនៃប្រទេសសមាជិកតំបន់អឺរ៉ូ ឲ្យចេះធ្វើការប្រយុទ្ធប្រឆាំងតទល់នឹងវិបត្តិប្រាក់បំណុល ហើយនិងឲ្យចេះមានការទទួលខុសត្រូវខ្ពស់។
នៅក្នុងទស្សនៈនេះ លោក Jean–Claude Trichet ប្រធានធនាគារកណ្តាលអឺរ៉ុបជំរុញឲ្យរដ្ឋាភិបាលនៃប្រទេសក្នុងតំបន់អឺរ៉ូ៖
-ចេះធ្វើការកាត់បន្ថយឧនភាពសាធារណៈ។
-ធ្វើការដំឡើងពន្ធដារដោយចៀសពុំផុត។
-ជំរុញឲ្យមានសន្ទុះកំណើនសេដ្ឋកិច្ច។
-ប្រយុទ្ធប្រឆាំងនឹងបញ្ហាឥតការងារធ្វើ។
-ដោះស្រាយបញ្ហាវិបត្តិសង្គមដែលអាចកើតមានជាយថាហេតុ។ វិបត្តិសង្គមដែលអាចបង្កឡើងដោយផែនការត្បិតត្បៀតរបស់រដ្ឋាភិបាល។
វិធានការទាំងប៉ុន្មានខាងលើនេះ បើគេពិនិត្យមើលទៅឃើញថាពិបាកនឹងស៊ីគ្នាណាស់។ ណាមួយចង់ធ្វើការដំឡើងពន្ធដារ ណាមួយចង់ជំរុញឲ្យមានសន្ទុះកំណើនសេដ្ឋកិច្ច ធ្វើម្តេចនឹងទៅរួច។ បើធ្វើការដំឡើងពន្ធដារដើម្បីរកប្រាក់ចំណូលសម្រាប់កាត់បន្ថយឧនភាពសាធារណៈ ធ្វើម្តេចប្រជាជននឹងមានអំណាចទិញខ្ពស់ទៅកើត។ បើប្រជាជនមានអំណាចទិញធ្លាក់ស្រុតចុះ ធ្វើម្តេចនឹងមានប្រាក់យកទៅធ្វើការទិញដូរហូបចុក។ បើការទិញដូរហូបចុកគ្មានសន្ទុះទេ ធ្វើម្តេចនឹងមានកំណើនសេដ្ឋកិច្ច។ មូលហេតុទាំងនេះហើយដែលបានធ្វើឲ្យអ្នកវិនិយោគកើតមានក្តីបារម្ភ។
ចំណែកឯការរក្សាអត្រាការប្រាក់នាំមុខឲ្យឋិតនៅកម្រិតយ៉ាងទាបដោយធនាគារកណ្តាលអាមេរិក ពោលគឺនៅកម្រិត០%និង០,២៥%រហូតដល់ពាក់កណ្តាលឆ្នាំ២០១៣គឺពិតជាសេចក្តីសម្រេចចិត្តមួយជាប្រវត្តិសាស្ត្រ។ នយោបាយរូបិយវត្ថុរបស់ធនាគារកណ្តាលអាមេរិកនេះបានត្រូវវិនិយោគិនមើលឃើញថា ជានយោបាយជួយជំរុញគាំទ្រឲ្យមានសន្ទុះកំណើនសេដ្ឋកិច្ច។
ក៏ប៉ុន្តែ នយោបាយរក្សាអត្រាការប្រាក់នាំមុខឲ្យឋិតនៅកម្រិតយ៉ាងទាបដោយធនាគារកណ្តាលអាមេរិកដូច្នេះប្រៀបបានទៅនឹងនយោបាយកាំបិតមុខពីរ ពីព្រោះថាធ្វើយ៉ាងនេះហាក់ដូចជាធនាគារកណ្តាលអាមេរិកទទួលស្គាល់ថា នៅរយៈកាលពីរឆ្នាំខាងមុខនេះនឹងពុំអាចមានសន្ទុះកំណើនសេដ្ឋកិច្ចមាំទាំឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ