អង្គការAmnesty៖ ការធ្វើទារុណកម្មកើតមានជាទម្លាប់ នៅហ្វីលីពីន
ការធ្វើទារុណកម្មរបស់ប៉ូលិស ទៅជនសង្ស័យប្រព្រឹត្តបទល្មើសកើតមានជាទៀងទាត់ នៅក្នុងប្រទេសហ្វីលីពីន ដែលដឹកនាំដោយរដ្ឋាភិបាលរបស់លោកប្រធានាធិបតីអាគីណូ។ នេះបើតាមប្រធានអង្គការការពារសិទ្ធិមនុស្ស Amnesty International ដែលបាននិយាយប្រាប់អ្នកកាសែត កាលពីថ្ងៃព្រហស្បតិ៍ ទី ៤ធ្នូ។
ចុះផ្សាយនៅថ្ងៃ៖
ស្តាប់ - ០១:៥៨
ការធ្វើទារុណកម្មពីសំណាក់ប៉ូលិសមានកាន់តែច្រើន និងសឹងជាទម្លាប់នៅហ្វីលីពីន។ នេះជាការលើកឡើងរបស់លោកSalil Shetty អគ្គលេខាធិការអង្គការការពារសិទ្ធិមនុស្ស Amnesty International ដោយពឹងផ្អែកទៅលើរបាយការណ៍ប្រចាំឆ្នាំរបស់អង្គការការពារសិទ្ធិមនុស្សហ្វីលីពីន។ ជារៀងរាល់ឆ្នាំ អង្គការក្នុងស្រុកហ្វីលីពីនរកឃើញករណីធ្វើទារុណកម្មដោយឆក់ខ្សែភ្លើង ការរំលោភផ្លូវភេទ និងការវាយធ្វើបាបទៅលើជនសង្ស័យពីសំណាក់ប៉ូលិសហ្វីលីពីន។
យោងតាមអង្គការ Amnesty International ចាប់តាំងពីឆ្នាំ ២០០១ គេរកឃើញករណីធ្វើទារុណកម្មរបស់ប៉ូលិសទៅលើជនសង្ស័យ ចំនួន ៤៥៧ករណី។ ឆ្នាំ ២០១៣ តែមួយត្រូវកត់សំគាល់ដោយការកើនឡើងខ្ពស់នៃការធ្វើទារុណកម្មក្រៅផ្លូវច្បាប់របស់អាជ្ញាធរ។ តាមអគ្គលេខាធិការរបស់អង្គការ អន្តរជាតិមួយនេះ នៅក្នុងប្រទេសរីកចម្រើនដូចជាហ្វីលីពីន ការបិទបញ្ចប់ការធ្វើទារុណកម្មរបស់អាជ្ញាធរ អាចជាស្នាដៃ មរតកដ៏សំខាន់ដែលលោកប្រធានាធិបតីអាគីណូ អាចបន្សល់ទុក មុននឹងបញ្ចប់អាណត្តិរដ្ឋាភិបាលនៅឆ្នាំ ២០១៦។ ប៉ុន្តែ គួរឲ្យសោកស្តាយ លោកប្រមុខដឹកនាំហ្វីលីពីនបច្ចុប្បន្នមិនទាន់ធ្វើការបានគ្រប់គ្រាន់ ដើម្បីធ្វើកំណែទម្រង់ស្ថាប័នប៉ូលិស ដែលជាប់ពាក់ព័ន្ធក្នុងការធ្វើទារុណកម្មនោះទេ។
កាលពីឆ្នាំ ២០០៩ ហ្វីលីពីនបានធ្វើច្បាប់ហាមមិនឲ្យមានការធ្វើទារុណកម្មទៅលើអ្នកទោស ឬជនសង្ស័យ ប៉ុន្តែតាមលោកប្រធានអង្គការ Amnesty International ប៉ូលិសនៅតែបន្តវិធីសាស្រ្តធ្វើទារុណកម្ម និងតែងរួចខ្លួនពីសំណាញ់ច្បាប់។ ប៉ូលិសដែលបានទទួលនិទណ្ឌភាពរឹតតែបានចិត្ត ធ្វើទារុណកម្មកាន់តែច្រើន។ ម្យ៉ាងទៀត ដោយសារតែប្រាក់ខែរបស់ប៉ូលិសនៅខ្សត់ខ្សោយ គេមើលឃើញថា ប៉ូលិសបានធ្វើទារុណកម្មទៅលើជនសង្ស័យ ដើម្បីឈ្លេចសួរឲ្យបានចម្លើយផង និងដើម្បីគាបយកលុយពីជនសង្ស័យផង។
ប៉ូលិសហ្វីលីពីនវិញ បានរុញច្រានចោលការចោទប្រកាន់របស់អង្គការការពារសិទ្ធិមនុស្សអន្តរជាតិ និងបានអះអាងថា ស្ថាប័នប៉ូលិសបានចាត់វិធានការតឹងរ៉ឹងដើម្បីដាក់ពិន័យប៉ូលិសដែលបានធ្វើទារុណកម្មទៅលើជនសង្ស័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ