Amnesty International អំពាវនាវឲ្យតុលាការខ្មែរក្រហមធ្វើការដោយតម្លាភាព
អង្គការ Amnesty International បានចេញសេចក្តីថ្លែងការណ៍ ដោយសម្តែងក្តីបារម្ភយ៉ាងខ្លាំង ចំពោះសាលាក្តីខ្មែរក្រហម។ តាមសេចក្តីថ្លែងការណ៍នេះ សាលាក្តីចម្រុះ ដែលបង្កើតឡើងដោយអង្គការសហប្រជាជាតិ និងរដ្ឋាភិបាលកម្ពុជា កំពុងឈានទៅរកការបំភ្លេចចោលសំណុំរឿង ដែលអាចចោទប្រកាន់មនុស្សផ្សេងទៀត ដោយសារតែការងារខ្វះតម្លាភាព និងភាពសម្ងាត់ហួសហេតុ ក្រោមការជ្រៀតជ្រែកនយោបាយ។
ចុះផ្សាយនៅថ្ងៃ៖
ស្តាប់ - ០២:៣៨
ក្នុងសេចក្តីថ្លែងការណ៍ ចេញផ្សាយកាលពីថ្ងៃ៨មិថុនា អង្គការ Amnesty International បានអំពាវនាវឲ្យតុលាការខ្មែរក្រហមអនុម័តវិធាន និងគោលការណ៍ ដែលធានាតម្លាភាព និងការទទួលបានព័ត៌មានទូលំទូលាយ ជាពិសេស តុលាការចម្រុះនេះត្រូវធានាដំណើរការស៊ើបអង្កេតប្រកបដោយតម្លាភាព និងត្រូវចៀសវាងការជ្រៀតជ្រែកផ្នែកនយោបាយ។
អង្គការ Amnesty ក៏បានរិះគន់ចំពោះសហចៅក្រមស៊ើបអង្កេត ដែលបានផ្សព្វផ្សាយសេចក្តីសន្និដ្ឋាន ស្តីពីលទ្ធផលបិទបញ្ចប់ការស៊ើបអង្កេត ក្នុងសំណុំរឿង០០៣ កាលពីថ្ងៃទី២៩ មេសា ២០១១។ នោះគឺចៅក្រមមិនបានធ្វើការស៊ើបអង្កេតហ្មត់ចត់ និងត្រឹមត្រូវ ស្របតាមនិយាមរបស់តុលាការខ្នាតអន្តរជាតិឡើយ។
Amnesty International បានអំពាវនាវឲ្យតុលាការកូនកាត់នេះ ធ្វើការប្រកបដោយតម្លាភាព តាមរយៈការស៊ើបអង្កេតឲ្យបានច្បាស់លាស់ និងហ្មត់ចត់ ជាពិសេស លើសំណុំរឿង ០០៣ និង ០០៤ ដើម្បីផ្តល់យុត្តិធម៌ជូនជនរងគ្រោះក្នុងរបបខ្មែរក្រហម ស្របតាមស្តង់ដារអន្តរជាតិ។
យ៉ាងណាក៏ដោយ លោក ឌឹម សុវណ្ណារុំ មន្ត្រីទទួលបន្ទុកផ្នែកកិច្ចការសាធារណៈ របស់សាលាក្តីខ្មែរក្រហម បានមានប្រសាសន៍ថា សហចៅក្រមស៊ើបអង្កេតកំពុងតែបំពេញកិច្ចការរបស់ខ្លួន ស្របតាមនីតិវិធីច្បាប់។ រយៈពេលនេះ សហចៅក្រមស៊ើបអង្កេតត្រូវធ្វើកិច្ចការរបស់ខ្លួនបន្ត។
តាមលោក ឌឹម សុវណ្ណារុំ សហចៅក្រហមស៊ើបអង្កេត បានបញ្ជាក់រួចហើយទៅកាន់សាធារណៈជនថា ការងារស៊ើបអង្កេតនៅក្នុងសំណុំរឿង០០៣ គឺសហចៅក្រមបានបំពេញកិច្ចការរបស់ខ្លួន ដោយឯករាជ្យ ហើយសហចៅក្រហមស៊ើបអង្កេតប្រឆាំងដាច់ខាតនូវរាល់ការជ្រៀតជ្រែកពីមជ្ឈដ្ឋានខាងក្រៅណាក៏ដោយ។
សំណុំរឿង ០០៣ ត្រូវបានគេរាយការណ៍ថា មានមេដឹកនាំខ្មែរក្រហម ២ រូប ត្រូវប្រឈមមុខ ជាប់ចោទក្នុងរឿងកាប់សម្លាប់មនុស្សសម័យខ្មែរក្រហម។ ក្នុងនោះ រួមមាន លោក មាស មុត អតីតមេបញ្ជាការកងទ័ពជើងទឹក និងលោក ស៊ូ ម៉េត ដែលជាអតីតមេបញ្ជាការកងទ័ពជើងអាកាសរបស់ខ្មែរក្រហម។ ក៏ប៉ុន្តែមកដល់ពេលនេះ ជនត្រូវចោទក្នុងសំណុំរឿង០០៣ មិនត្រូវបានសាលាក្តីបង្ហាញអត្តសញ្ញាណច្បាស់លាស់ជាសាធារណៈឡើយ។
ទោះជាយ៉ាងណាក៏ដោយ សំណុំរឿងថ្មីដ៏ចម្រូងចម្រាស់នេះ ត្រូវបានជំរុញឲ្យដំណើរការទៅមុខ ដោយភាគីអន្តរជាតិ។ ចំណែកភាគីកម្ពុជា រួមទាំងរដ្ឋាភិបាល មិនចង់ឲ្យមានសំណុំរឿងថ្មី ក្រៅតែសំណុំរឿង០០២ ដែលនឹងត្រូវផ្តើមសវនាការនាថ្ងៃ២៧មិថុនាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ