Amnesty៖ កងទ័ពអាមេរិកសម្លាប់ជនស៊ីវិលរាប់ពាន់នាក់នៅអាហ្វហ្កានីស្ថាន តែតុលាការបែរមិនដាក់ទោស
នៅថ្ងៃចន្ទនេះ អង្គការសិទ្ធិមនុស្ស Amnesty International បានបរិហារក្នុងរបាយការណ៍របស់ខ្លួនថា កងទ័ពអាមេរិកបានសម្លាប់ជនស៊ីវិលរាប់ពាន់នាក់ នៅអាហ្វហ្កានីស្ថាន តែបែរជាគ្មានសវនាការកាត់ទោសពួកគេ រឺក៏ការចេញសងជំងឺចិត្តដល់គ្រួសារជនរងគ្រោះទៅវិញ។ របាយការណ៍អង្គការ Amnesty បានចុះផ្សាយតែប៉ុន្មានខែប៉ុណ្ណោះ មុនពេលអង្គការអូតង់ដកទ័ពចេញពីអាហ្វហ្កានីស្ថាន។ នៅអាហ្វហ្កានីស្ថាន មានកងទ័ពបរទេស ៤ម៉ឺន៥ពាន់នាក់ ក្នុងនោះមានទាហានអាមេរិក៣ម៉ឺននាក់។ អាមេរិកចង់រក្សាវត្តមានកងទ័ពខ្លួន១ម៉ឺននាក់ ក្រោយអូតង់ដកទ័ព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
របាយការណ៍អង្គការសិទ្ធិមនុស្ស Amnesty International បានបរិហារពីបរាជ័យធ្ងន់ធ្ងររបស់តុលាការអាមេរិក ដែលពង្រឹងវប្បធម៌នៃការមិនដាក់ទោស គឺមិនដាក់ទោសកងទ័ពអាមេរិកដែលបានសម្លាប់ជនស៊ីវិលរាប់ពាន់នាក់ តាំងពីឆ្នាំ២០០១មក នៅអាហ្វហ្កានីស្ថាន។ លើសពីនេះទៀត គ្រួសារជនរងគ្រោះស្លាប់ក្នុងការវាយប្រហាររបស់កងទ័ពអាមេរិក ក៏មិនបានទទួលប្រាក់សងជំងឺចិត្តអ្វីដែរ។
អង្គការ Amnesty បានលើកពីឧទាហរណ៍ជាក់ស្តែង នៃការទំលាក់គ្រាប់បែករបស់អាមេរិក ក្នុងឆ្នាំ២០១២ នៅខេត្តឡាក់ម៉ាន ភាគខាងកើតអាហ្វហ្កានីស្ថាន ដែលកាលណោះ បានសម្លាប់ក្មេងស្រី និងស្ត្រី៧នាក់ ហើយបង្ករបួសដល់មនុស្ស៧នាក់ផ្សេងទៀត។ អ្នកភូមិបាននាំគ្នាប្តឹងអាជ្ញាធរក្នុងស្រុក តែបណ្តឹងនោះគ្មានប្រយោជន៍ ព្រោះថា តុលាការក្នុងស្រុកអាហ្វហ្កានីស្ថាន គ្មានសិទ្ធិកាត់ទោសកងកម្លាំងបរទេស ដែលមានវត្តមាននៅអាហ្វហ្កានីស្ថានទេ។
ក្នុងភស្តុតាងនៃការចោទប្រកាន់កងទ័ពអាមេរិក អង្គការ Amnesty ប្រាប់ថា បានសួរទៅជនជាតិអាហ្វហ្កានីស្ថាន១២៥នាក់ ជាអ្នកមានព័ត៌មានច្បាស់លាស់ដំបូងទាក់ទងនឹងការទំលាក់គ្រាប់បែក សម្លាប់ជនស៊ីវិលក្នុងស្រុក។ របាយការណ៍របស់អង្គការសិទ្ធិមនុស្ស Amnesty ក៏ស្រង់យកទិន្នន័យចេញពីរបាយការណ៍អង្គការសហប្រជាជាតិផងដែរ។
ដោយឡែក អង្គការនេះបានគូសបញ្ជាក់ថា ជនស៊ីវិលរងគ្រោះក្នុងជម្លោះនៅអាហ្វហ្កានីស្ថាន ភាគច្រើនរងគ្រោះដោយការវាយប្រហាររបស់ក្រុមប្រដាប់អាវុធក្នុងស្រុក ក្រុមតាលីបង់ រឺក៏ក្រុមផ្សេងទៀត។
ប្រធានាធិបតីផុតអាណត្តិហាមីឌ កាហ្សៃ បានស្វាគមន៍របាយការណ៍អង្គការ Amnesty International ដោយលើកឡើងថា លោកសប្បាយចិត្តដោយអង្គការយកចិត្តទុកដាក់លើបញ្ហាដែលបង្កអោយអាមេរិកនិងអាហ្វហ្កានីស្ថានទាស់ទែងគ្នា។ ប្រធានាធិបតីកាហ្សៃតែងបិរហារការទំលាក់គ្រាប់បែករបស់អង្គការអូតង់ ជាអង្គការសំបូរវត្តមានកងទ័ពអាមេរិក។ អង្គការអូតង់វិញ ក៏តែងឆ្លើយថា នឹងស៊ើបអង្កេតលើហេតុការណ៍អស់នេះ។
យោងតាមអង្គការសិទ្ធិមនុស្ស Amnesty ៥ឆ្នាំចុងក្រោយនេះ តុលាការបានកាត់ទោសទាហានអាមេរិកច្រើនរូប ដែលបានសម្លាប់ជនស៊ីវិលអាហ្វហ្កានីស្ថាន។ ក្នុងនោះ គេឃើញទាហានរ៉ូប៊ែរ បេល បានទទួលទោសធ្ងន់រហូតជាប់គុកមួយជីវិត ដោយសារបានសម្លាប់ជនស៊ីវិល១៦នាក់ ក្នុងឆ្នាំ២០១២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ