លោកស្រី Clinton ប្តេជ្ញាធ្វើជាប្រធានាធិបតីសម្រាប់ពលរដ្ឋអាមេរិកគ្រប់រូប
លោកស្រី Hillary Clinton នៅថ្ងៃព្រហស្បតិ៍ ទី២៨ ខែកក្កដា បានទទួលយកការតែងតាំងពីគណបក្សប្រជាធិបតេយ្យរបស់លោកស្រី ដោយលោកស្រីចាត់ទុកខ្លួនឯងថាជាជើងឯក ដែលមិនចេះធុញទ្រាន់សម្រាប់ប្រជាពលរដ្ឋអាមេរិក ហើយប្តេជ្ញាធ្វើជាប្រធានាធិបតីសម្រាប់ពលរដ្ឋអាមេរិកគ្រប់រូប។
ចុះផ្សាយនៅថ្ងៃ៖
ស្តាប់ - ០២:០៥
ជាស្ត្រីទីមួយ ដែលទទួលបានការតែងតាំងពីគណបក្សធំមួយនៅអាមេរិក លោកស្រី Clinton សន្យាថានឹងធ្វើជាប្រធានាធិបតីសម្រាប់ពលរដ្ឋអាមេរិកាំងទាំងអស់ បើទោះណាជាពួកគេមិនបានបោះឆ្នោតឲ្យគណបក្សលោកស្រី ឬក៏បោះឆ្នោតឲ្យលោកស្រីក៏ដោយ។ លោកស្រីបានអំពាវនាវថាលោកស្រីនឹងក្លាយជាប្រធានាធិបតី សម្រាប់មនុស្សដែលគាំទ្រ គណបក្សប្រជាធិបតេយ្យ គណបក្សសាធារណៈរដ្ឋ និងក្រុមឯករាជ្យដែលមិនគាំទ្រគណបក្សទាំងពីររបស់អាមេរិក។
ភាគច្រើននៃសុន្ទរកថារបស់លោកស្រី Clinton នៅក្នុងសមាជបក្សប្រជាធិបតេយ្យនៅ Philadelphia ក្នុងសប្តាហ៍នេះ បានផ្តើមជាសំខាន់លើការប្រឈមរបស់លោកស្រី ដែលនឹងឈានមកដល់នៅក្នុងខែវិច្ឆិកាខាងមុខ។ ក្រៅពីនេះលោកស្រី Clinton ក៏បានប្រឡះលោក Donald Trump ដោយចាត់ទុកថាលោក Donald Trump បានបំផ្លាញរូបភាពល្អរបស់អាមេរិក។
លោកស្រីបញ្ជាក់ថា លោក Trump បានពុះជ្រៀកអាមេរិក ពីពិភពលោកទាំងមូល រួមទាំងអ្នករាល់គ្នាផងដែរ។ នេះគឺជាការថ្លែងចំអកគូប្រជែងរបស់លោកស្រី ដែលធ្លាប់និយាយថា គាត់តែម្នាក់ឯងអាចដោះស្រាយបញ្ហារបស់អាមេរិកទាំងមូល។ លោកស្រីបន្ថែមថា លោក Trump កំពុងតែចង់ឲ្យគ្រប់គ្នាខ្លាចអនាគត ហើយខ្លាចគ្នាទៅវិញទៅមកដែរ។
សម្រាប់ជំហ៊ានដំបូងក្នុងបេសកម្មជាប្រធានាធិបតីអាមេរិក លោកស្រីនឹងបង្កើតឱកាសការងារជាមួយនឹងការដំឡើងប្រាក់ខែសម្រាប់ពលរដ្ឋអាមេរិក។ ការងារនេះ លោកស្រីនឹងធ្វើវាចាប់ពេលលោកចូលអង្គុយលើកៅអីប្រធានាធិបតីរហូតដល់ចប់អាណត្តិ។
លោកស្រី Clinton បានចំណាយពេលស្ទើរមួយជីវិតរបស់លោកស្រី ក្នុងកែវភ្នែកសាធារណៈ ជន។ លោកស្រីកើតនៅឆ្នាំ១៩៤៧ នៅក្នុងរដ្ឋ Chicago ក្នុងគ្រួសារ ដែលមានជីវភាពមធ្យម។ នៅឆ្នាំ១៩៦៩លោកស្រីបានចូលរៀននៅសាកលវិទ្យាល័យ Yale Law School ដែលសាលាច្បាប់ដ៏ល្បីមួយរបស់អាមេរិក។ ក្នុងពេលសិក្សានៅសាកលវិទ្យាល័យឆ្នាំ១៩៧១លោកស្រីបានជួបនឹងគូជីវិតរបស់លោកស្រី គឺលោក Bill Clinton អតីតប្រធានាធិបតីអាមេរិក ហើយបានរៀបការជាមួយគ្នានៅឆ្នាំ១៩៧៥។ នៅឆ្នាំ២០០០លោកស្រីបានក្លាយជាសមាជិកព្រឹទ្ធសភាអាមេរិក ពោលគឺរយៈពីរខែមុនពេលស្វាមីរបស់លោកស្រីចាកចេញពីសេតវិមាន។ លោកស្រីក៏ធ្លាប់ជារដ្ឋមន្ត្រីក្រសួងការបរទេសអាមេរិកក្នុងអាណត្តិរបស់លោកអូបាម៉ាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ