លោកប្រធានាធិបតីចិនស៊ី ជីនពីងទៅជួបមេដឹកនាំក្រុមហ៊ុនអាមេរិកមុនជួបលោកអូបាម៉ា
លោកប្រធានាធិបតីចិន ស៊ី ជីនពីង បានធ្វើដំណើរទៅដល់សហរដ្ឋអាមេរិក នៅថ្ងៃអង្គារនេះ ដើម្បីបំពេញទស្សនកិច្ចជាផ្លូវរដ្ឋ ដែលនឹងចាប់ផ្តើមធ្វើនៅថ្ងៃព្រហស្បតិ៍។ មុននឹងធ្វើដំណើរទៅជួបលោកអូបាម៉ា នៅសេតវិមាន លោកស៊ី ជីនពីង បានឈប់សំចតនៅរដ្ឋវ៉ាស៊ីងតោន ដើម្បីជួបជាមួយមេដឹកនាំក្រុមហ៊ុនធំៗរបស់អាមេរិក ព្រមទាំងអ្នកនយោបាយមួយចំនួន ដែលនិយមអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
វាមិនមែនជារឿងចៃដន្យទេ ដែលលោកស៊ី ជីនពីង ចាប់ផ្តើមដំណើរទស្សនកិច្ចនៅសហរដ្ឋអាមេរិក ដោយធ្វើដំណើរទៅកាន់រដ្ឋវ៉ាស៊ីងតោន ដែលមានប្រវត្តិជាទឹកដីអ្នកនិយមចិន ឬយ៉ាងហោចណាស់មិនសូវប្រឆាំងចិន។
គេនៅចាំបានថា រដ្ឋវ៉ាស៊ីងតោននេះធ្លាប់ទទួលស្វាគមន៍មេដឹកនាំជាន់ខ្ពស់ចិន៣រូបរួចមកហើយ គឺលោកតេង ស៊ាវពីង លោកចាង ហ្សេមីន និងលោកហ៊ូ ជិនតាវ ហើយអតីតអភិបាលរដ្ឋវ៉ាស៊ីងតោន និងជាអតីតឯកអគ្គរដ្ឋទូតអាមេរិកប្រចាំប្រទេសចិនបានប្រាប់ទីភ្នាក់ងារព័ត៌មាន AFP នៅថ្ងៃអង្គារនេះថា រដ្ឋវ៉ាស៊ីងតោន និងចិន ធ្លាប់មានប្រវត្តិទំនាក់ទំនងជិតស្និទ្ធនឹងគ្នាអស់រយៈពេលជាយូរមកហើយ។
ម្យ៉ាងទៀត ក្រុមហ៊ុនធំៗរបស់អាមេរិក ដែលមានទំនាក់ទំនងរកស៊ីយ៉ាងច្រើនជាមួយចិន រួមមានដូចជា ក្រុមហ៊ុនផលិតយន្តហោះប៊ូអ៊ីង និងក្រុមហ៊ុនកុំព្យូទ័រ Microsoft ជាដើម សុទ្ធតែមានទីស្នាក់ការធំ នៅក្នុងរដ្ឋវ៉ាស៊ីងតោន។
នៅក្នុងអំឡុងដំណើរទស្សនកិច្ចរយៈពេល ៣ថ្ងៃ នៅទីក្រុង Seattle លោកស៊ី ជីនពីង មានគម្រោងជួបជាមួយមេដឹកនាំក្រុមហ៊ុនធំៗរបស់អាមេរិក ព្រមទាំងអភិបាលរដ្ឋមកពី California, Michigan, Iowa, Oregon និង Washington។ ជំនួបដែលនឹងផ្តោតទៅលើបញ្ហាសេដ្ឋកិច្ច និងជំនួញ ក៏ប៉ុន្តែ ក៏អាចមានលើកឡើងអំពីបញ្ហាភូមិសាស្រ្តនយោបាយផងដែរ។
សម្រាប់លោកស៊ី ជីនពីង ដំណើរទស្សនកិច្ចទៅកាន់រដ្ឋវ៉ាស៊ីងតោន ដើម្បីជួបជាមួយនឹងអ្នកជំនួញ និងអ្នកនយោបាយដែលនិយមចិននៅពេលនេះ គឺជាយុទ្ធសាស្រ្តដ៏សំខាន់មួយ នៅក្នុងពេលដែលការបោះឆ្នោតប្រធានាធិបតីអាមេរិកជិតឈានចូលមកដល់ នៅឆ្នាំ២០១៦ ហើយដែលគេរំពឹងថា យុទ្ធនាការឃោសនាបោះឆ្នោតនេះអាចនឹងនាំឲ្យមានការរីកដុះដាលនៃការប្រើពាក្យសម្តីប្រឆាំងចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ