ហូលីវូដត្រៀមខ្លួនរួចជាស្រេចសម្រាប់កម្មវិធីពានរង្វាន់អូស្កាឆ្នាំ២០១៥
ក្រុមការងារហូលីវូដ បានត្រៀមខ្លួនរួចស្រេចហើយ សម្រាប់កម្មវិធីចែកពានរង្វាន់អូស្កា ឆ្នាំ២០១៥ ដល់អ្នកមានស្នាដៃក្នុងវិស័យភាពយន្តនៅក្នុងឆ្នាំកន្លងទៅ។ កម្មវិធីអូស្កា នឹងរៀបចំឡើងនៅរោងមហោស្រព Dolby ក្នុងសង្កាត់ហូលីវូដ នាល្ងាចម៉ោង៥កន្លះ ថ្ងៃអាទិត្យនេះតែម្ដង ម៉ោងក្នុងតំបន់ ត្រូវនឹងម៉ោង៨កន្លះ ព្រឹកថ្ងៃចន្ទ ម៉ោងនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
កម្រាលព្រំក្រហមឆ្អិនឆ្អៅទទឹង១០ម៉ែត្រ និងប្រវែងប្រមាណ១៥០ម៉ែត្រ ត្រូវបានគេក្រាលរួចរាល់ហើយ ដើម្បីទទួលដំណើរមកដល់នៃតារាសម្ដែង អ្នកដឹកនាំរឿង និងបុគ្គលសំខាន់ផ្សេងៗទៀត ក្នុងវិស័យឧស្សាហកម្មភាពយន្តហូលីវូដ។ រូបចម្លាក់មនុស្សឈរកាន់ដាវពណ៌មាសធំៗ ដែលជាតំណាងពានរង្វាន់អូស្កា ត្រូវគេដាក់តាំងបង្ហាញហូរហែតាមផ្លូវដើរដែលក្រាលដោយកម្រាលព្រំក្រហម។ ទាំងនេះ គឺជាការរៀបចំដ៏ធំសម្បើម សម្រាប់កម្មវិធីពានរង្វាន់វិស័យភាពយន្តប្រចាំឆ្នាំ ដែលមានឈ្មោះថា អូស្កា។
កម្មវិធីអូស្កាឆ្នាំ២០១៥ដែលនឹងឈានចូលមកដល់នៅពេលប៉ុន្មានម៉ោងខាងមុខនេះ នឹងមានតារាសម្ដែងដ៏មានសមត្ថភាព គឺលោក Neil Patrick Harris មកធ្វើជាពិធីករ។ ក្រៅពីមានអាជីពជាតារាសម្ដែងហើយ លោក Neil Patrick Harris ក៏ជាអ្នកនិពន្ធ អ្នកដឹកនាំភាពយន្ត អ្នកកំប្លែង និងជាអ្នកចម្រៀងផងដែរ។ ដោយសារតែលោក Neil Patrick Harris មានគុណសម្បត្តិច្រើនយ៉ាងដូច្នេះ ទើបគេរំពឹងថា កម្មវិធីប្រគល់ពានរង្វាន់អូស្កាឆ្នាំនេះ នឹងមានភាពរំភើប សប្បាយរីករាយជាក់ជាពុំខាន។
ដោយឡែក ចំពោះពានរង្វាន់អូស្កាក្នុងឆ្នាំនេះវិញ សាធារណជនដែលតាមដានវិស័យខ្សែ ភាពយន្តហូលីវូដ បានទស្សន៍ទាយថា រឿង Birdman និងរឿង Boyhood ទំនងជាអាចទទួលបានពានរង្វាន់អូស្កា សម្រាប់ផ្នែករូបភាពល្អបំផុត។ ចំណែកពានរង្វាន់អូស្កា សម្រាប់អ្នកដឹកនាំល្អបំផុត ទំនងជាធ្លាក់ទៅលើលោក Richard Linklater និងលោក Alexjandro Gonzalez Inarritu។ ពានរង្វាន់ផ្សេងទៀត ដូចជាពានរង្វាន់តារាល្អបំផុតប្រចាំឆ្នាំ ជាដើម គឺនៅមិនទាន់មានការទស្សន៍ទាយជាក់លាក់នៅឡើយទេ។
គួរជម្រាបជូនថា កម្មវិធីអូស្កា គឺជាកម្មវិធីប្រគល់រង្វាន់ធំជាងគេប្រចាំឆ្នាំនៅអាមេរិក សម្រាប់អ្នកដែលមានស្នាដៃក្នុងវិស័យខ្សែភាពយន្ត។ បើគិតត្រឹមឆ្នាំ២០១៤ កម្មវិធីអូស្កា ប្រព្រឹត្តធ្វើបាន៨៦លើកហើយ និងបានប្រគល់ពានរង្វាន់ចំនួន ២ ៨០៩ ពានហើយ ទៅកាន់តារាសម្ដែង អ្នកផលិតភាពយន្ត និងបុគ្គលសំខាន់ផ្សេងៗទៀតក្នុងវិស័យឧស្សាហកម្មភាពយន្តនៅសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ