លោកហាសាន រ៉ូហានី៖អ៊ីរ៉ង់នឹងបន្តលក់ប្រេងដោយមិនឈឺក្បាលនឹងទណ្ឌកម្មអាមេរិក
នៅថ្ងៃចន្ទ ទី៥ វិច្ឆិកា ទណ្ឌកម្មអាមេរិកដាក់លើអ៊ីរ៉ង់ក្នុងវិស័យប្រេង និងធនាគារបានចូលជាធរមាន។ ចំណែកលោកប្រធានាធិបតីអ៊ីរ៉ង់ហាសាន រ៉ូហានីក៏បានថ្លែងក្នុងថ្ងៃដែរដោយបញ្ជាក់ច្បាស់ៗតបនឹងអាមេរិកថា អ៊ីរ៉ង់នឹងបន្តនាំប្រេងចេញដោយមិនខ្វាយខ្វល់ពីទណ្ឌកម្មរបស់អាមេរិកទេ។ គួររម្លឹកថា ទណ្ឌកម្មអាមេរិកដាក់លើអ៊ីរ៉ង់ជាថ្មីពេលនេះបានធ្វើឡើង បន្ទាប់ពីលោកប្រធានាធិបតីអាមេរិកដូណាល់ ត្រាំបានប្រកាសដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់កាលពីខែឧសភាកន្លងទៅ។
ចុះផ្សាយនៅថ្ងៃ៖
ស្តាប់ - ០២:១៩
« អាមេរិកចង់កាត់បន្ថយការលក់ប្រេងរបស់អ៊ីរ៉ង់ តែយើងនឹងបន្តលក់ប្រេងរបស់យើង » នេះជាប្រតិកម្មខ្លាំងៗរបស់លោកហាសាន រ៉ូហានីតបនឹងទណ្ឌកម្មរបស់អាមេរិកនៅតាមកញ្ចក់ទូរទស្សន៍ជាតិ។ ចំណែកអ្នកនាំពាក្យក្រសួងការបរទេសអ៊ីរ៉ង់លោកបារ៉ាម កាសេមីក៏បានបញ្ចេញប្រតិកម្មក្នុងថ្ងៃនេះដែរ តែបានលើកឡើងពីកិច្ចព្រមព្រៀងនុយក្លេអ៊ែរដែលអ៊ីរ៉ង់ និងសហគមន៍អន្តរជាតិបានចុះហត្ថលេខាក្នុងខែកក្កដា ឆ្នាំ ២០១៥ ក្នុងនោះក៏មានភាគីអាមេរិកក្នុងជំនាន់លោកបារ៉ាក់ អូបាម៉ាម្នាក់ដែរ។
លោកកាសេមីចង់បញ្ជាក់ថា ទោះបីជាអាមេរិកក្នុងជំនាន់លោកដូណាល់ ត្រាំបានដកខ្លួនចេញពីកិច្ចព្រមព្រៀងនោះក៏ដោយ ក៏នៅសល់ក្រុមប្រទេសហត្ថលេខីផ្សេងទៀត រួមមានអាល្លឺម៉ង់ បារាំង អង់គ្លេស រុស្ស៊ី និងចិនដែលអ៊ីរ៉ង់កំពុងបន្តមានទំនាក់ទំនងជាអចិន្ត្រៃយ៍។ ជាមួយនឹងក្រុមប្រទេសហត្ថលេខីនៅអឺរ៉ុប ទីក្រុងតេហេរ៉ង់ចង់បង្កើតនូវយន្តការណ៍មួយដែលអនុញ្ញាតឲ្យអ៊ីរ៉ង់អាចបន្តធ្វើពាណិជ្ជកម្មជាមួយ។ តែលោកកាសេមីបានទទួលស្គាល់ថា ការបង្កើតឲ្យមានយន្តការណ៍មួយនេះនឹងត្រូវប្រើពេលយូរ។
សូមជម្រាបថា ការដែលអាមេរិករបស់លោកដូណាល់ ត្រាំបានដកខ្លួនចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ និងដាក់ទណ្ឌកម្មជាថ្មីលើអ៊ីរ៉ង់ គឺដើម្បីសង្កត់ ក អ៊ីរ៉ង់ឲ្យឈប់គាំទ្រពួកឈីអ៊ីតនៅក្នុងជម្លោះនៃតំបន់មជ្ឈិមបូព៌ា បញ្ឈប់ការអភិវឌ្ឍលើកម្មវិធីថាមពលនុយក្លេអ៊ែរ និងកម្មវិធីគ្រាប់មីស៊ីលបាលីស្ទិក។ តែបញ្ហានៅត្រង់ថា ក្រុមប្រទេសហត្ថលេខីផ្សេងមិនយល់ឃើញដូចលោកត្រាំ និងបានបញ្ជាក់ពីការមិនដកខ្លួនចេញពីកិច្ចព្រមព្រៀងនោះទេ។
គួររម្លឹកថានៅដើមឆ្នាំ ២០១៦ ពោលក្រោយមានកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ សហគមន៍អន្តរជាតិបានលើកទណ្ឌកម្មសេដ្ឋកិច្ចមួយភាគធំចេញពីអ៊ីរ៉ង់។ ចំណែកអ៊ីរ៉ង់ក៏បានយល់ព្រមកាត់បន្ថយកម្មវីធីចម្រើនធាតុអ៊ុយរ៉ាញ៉ូមរបស់ខ្លួនដែរ។ ជាមួយនឹងការលើកទណ្ឌកម្មកាលណោះបានអនុញ្ញាតឲ្យអ៊ីរ៉ង់ក្នុងនាមជាប្រទេសនាំប្រេងចេញទី៣ ក្នុងលោកអាចបង្កើនផលិតកម្មប្រេងរបស់ខ្លួនមកដល់បច្ចុប្បន្ន។ តែគេនៅមិនទាន់ដឹងថា តើការដែលអាមេរិកបានត្រឡប់ទៅដាក់ទណ្ឌកម្មឡើងវិញលើអ៊ីរ៉ង់ជាលក្ខណៈឯកតោភាគីពេលនេះនឹងអាចជះផលវិបាកអ្វីខ្លះដល់អ៊ីរ៉ង់ និងដល់ពិភពលោកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ