អ៊ីស្រាអែល-ប៉ាឡេស្ទីន ៖ លោក ត្រាំ គាំទ្រដំណោះស្រាយបង្កើតរដ្ឋពីរ ជាលើកទីមួយ
នាឱកាសជួបពិភាក្សាជាមួយនាយករដ្ឋមន្ត្រីអ៊ីស្រាអែល ក្នុងអំឡុងមហាសន្និបាតអង្គការសហប្រជាជាតិ លោក ដូណាល់ ត្រាំ បានលើកឡើង ជាលើកទីមួយ ជំហរគាំទ្រដំណោះស្រាយជម្លោះរវាងអ៊ីស្រាអែល និងប៉ាឡេស្ទីន តាមរយៈការបង្កើតរដ្ឋពីរ រស់ក្បែរគ្នា។ លោកប្រធានាធិបតីអាមេរិកបានសន្យាបង្ហាញផែនការសន្តិភាព “ប្រកបដោយលំនឹង” នៅរវាងបួនខែទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
“ខ្ញុំគិតថានឹងមានអ្វីកើតឡើងជាជាក់ស្តែង ! នេះជាក្តីស្រមៃដែលត្រូវសម្រេចឱ្យបាន នៅមុនចង់អាណត្តិទីមួយរបស់ខ្ញុំ !” នេះជាប្រសាសន៍របស់លោក ដូណាល់ ត្រាំ ទៅកាន់លោកនាយករដ្ឋមន្ត្រីអ៊ីស្រាអែល នេតាន់យ៉ាហ៊ូ (Benjamin Netanyahu )ដោយបន្ថែមទៀតថា លោកពេញចិត្តដំណោះស្រាយជម្លោះអ៊ីស្រាអែលប៉ាឡេស្ទីនតាមរយៈការបង្កើតរដ្ឋពីរ។ ដំណោះស្រាយនេះអាចលំបាកបន្តិច ប៉ុន្តែជាផ្លូវដ៏ប្រសើរជាងគេ ព្រោះម្ខាងៗត្រូវគ្រប់គ្រងរដ្ឋាភិបាលរបស់ខ្លួន។ នេះបើតាមការពន្យល់លម្អិតបន្ថែមរបស់លោកត្រាំ។
ពីមហាសន្និបាតអង្គការសហប្រជាជាតិ លោកដូណាល់ ត្រាំ បានបង្ហាញជំនឿជាក់១០០%ថា ប៉ាឡេស្ទីនដែលបានបង្កកទំនាក់ទំនងជាមួយរដ្ឋបាលអាមេរិក ក្រោយវ៉ាស៊ីនតោនប្រកាសទទួលស្គាល់ក្រុងហ្សេរុយសាឡិមជារដ្ឋធានីអ៊ីស្រាអែល នឹងព្រមវិលត្រលប់មកចូលតុចរចាវិញ ។
តាំងខ្លួនជាអ្នកសម្រួលការ និងនៅចំពោះមុខអ្នកកាសែត លោកប្រធានាធិបតីអាមេរិក មិនបានបញ្ជាក់អំពីផែនការសន្តិភាព ដែលទំនងរៀបចំដោយសម្ងាត់ដោយលោក ហ្សារ៉េត គូស្នែរ (Jared Kushner) កូនប្រសាររបស់លោកទេ។ ប៉ុន្តែលោកត្រាំបានសន្យាថា ផែនការនោះនឹងលំនឹងល្អ ព្រោះថ្វីបើលោកគូស្នែរ ស្រលាញ់អ៊ីស្រាអែលខ្លាំងមែន តែក៏ចេះបំពេញចិត្តអ្នកផ្សេងដែរ។
នេះគឺជាលើកទីមួយហើយ ដែលប្រមុខដឹកនាំអាមេរិក បានផ្តល់កាលបរិច្ឆេទច្បាស់លាស់ ស្តីអំពីការបង្ហាញផែនការសន្តិភាពដោះស្រាយជម្លោះរវាងអ៊ីស្រាអែលនិងប៉ាឡេស្ទីន។ នៅរវាងពីរឬបី ឬបួនខែទៀតខាងមុខយ៉ាងយូរ ផែនការនឹងចេញជារូបរាងពិត ! នេះបើតាមការធានាអះអាងរបស់លោក ត្រាំ ដែលស្រមៃចង់សម្រេចកិច្ចព្រមព្រៀងសន្តិភាពអ៊ីស្រាអែលឱ្យខាងតែបាន ខុសពីមេដឹកនាំមុនៗ ដែលដោះស្រាយវិបត្តិដើមបូព៌ាមិនចេញ។
នេះក៏ជារបត់ថ្មីនៃដំណើរការស្វែងរកសន្តិភាពដែរ ព្រោះថ្វីបើជាផ្លូវការ រដ្ឋបាលអាមេរិកគាំទ្រដំណោះស្រាយបង្កើតរដ្ឋពីរមែន តែតាំងពីលោកត្រាំជាប់ឆ្នោតមក អាមេរិកមិនដែលបង្ហាញកាយវិការអ្វីក្នុងន័យនេះទេ។ សម្រាប់ប៉ាឡេស្ទីន មានតែសំដី តែគ្មានសកម្មភាព មិនគ្រប់គ្រាន់នឹងចងភ្ជាប់ចំណងចរចាឡើងវិញឡើយ។ នេះបើតាមប្រតិកម្មរបស់លោកប្រមុខបេសកកម្មការទូតប៉ាឡេស្ទីនប្រចាំទីក្រុងវ៉ាស៊ីនតោន ដែលអាមេរិកទើបបិទទ្វារ កាលពីប៉ុន្មានសប្តាហ៍មុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ