អ៊ីរ៉ង់បានដាក់ទ័ណ្ឌកម្មលើក្រុមហ៊ុនអាមេរិកចំនួន ១៥ក្រុមហ៊ុនដោយចោទពីបទគាំទ្រប្រទេសអ៊ីស្រាអែល
នៅអាទិត្យ ទី២៦ មីនា ទីភ្នាក់ងារព័ត៌មានផ្លូវការអ៊ីរ៉ង់ Irna បានផ្សព្វផ្សាយព័ត៌មានមួយដោយដកស្រង់សេចក្តីជូនដំណឹងរបស់ក្រសួងការបរទេសដែលថា រដ្ឋាភិបាលទីក្រុងតេហេរ៉ង់បានសម្រេចចិត្តដាក់ទ័ណ្ឌកម្មលើក្រុមហ៊ុនអាមេរិកចំនួន ១៥ក្រុមហ៊ុន។ មូលហេតុ មកពីក្រុមហ៊ុនអាមេរិកទាំងនេះបានគាំទ្រប្រទេសអ៊ីស្រាអែល និងសកម្មភាពភេរវនិយមរបស់ប្រទេសជ្វីហ្វមួយនេះ។ គួរជម្រាបជូនថា តាំងពីលោកដូណាល់ ត្រាំកាន់តំណែងប្រធានាធិបតីអាមេរិកមក ទំនាក់ទំនងរវាងទីក្រុងតេហេរ៉ង់ និងវ៉ាស៊ីនតោនបានឡើងតានតឹងជាលំដាប់។
ចុះផ្សាយនៅថ្ងៃ៖
ស្តាប់ - ០១:៥១
បើតាមសេចក្តីជូនដំណឹងរបស់ក្រសួងការបរទេសអ៊ីរ៉ង់ រាល់ការបញ្ជូន និងការផ្ទេរប្រាក់ជាមួយក្រុមហ៊ុនអាមេរិកទាំង ១៥ក្រុមហ៊ុនជាប់ទ័ណ្ឌកម្មនឹងត្រូវហាមឃាត់ ហើយថ្នាក់ដឹកនាំរបស់ក្រុមហ៊ុននឹងមិនអាចទទួលបានទិដ្ឋាការចូលទឹកដីអ៊ីរ៉ង់ដែរ។ ជាទូទៅ ការសម្រេចចិត្តរបស់អ៊ីរ៉ង់ដូចនេះបានបង្កប់ដោយនិមិត្តរូប ព្រោះថា ក្រុមហ៊ុនអាមេរិកទាំងនេះមិនបានរកស៊ីអ្វីជាមួយអ៊ីរ៉ង់ទេ។ តែសម្រាប់រដ្ឋាភិបាលអ៊ីរ៉ង់ វិធានការរបស់ខ្លួនគឺដើម្បីឆ្លើយបកនឹងរដ្ឋបាលអាមេរិកដែលកាលពី ២ថ្ងៃមុន បានដាក់ទ័ណ្ឌកម្មលើក្រុមហ៊ុនបរទេសចំនួន ៣០ និងមនុស្សមួយចំនួនពីបានរួមសហការណ៍ជាមួយកម្មវិធីអាវុធរបស់អ៊ីរ៉ង់។
ទន្ទឹមគ្នានេះ ការសម្រេចចិត្តរបស់អ៊ីរ៉ង់ក៏ជាប្រតិកម្មតបនឹងអាមេរិកដែលកាលពីខែកុម្ភៈកន្លងទៅថ្មីៗនេះ បានដាក់ទ័ណ្ឌកម្មលើអ៊ីរ៉ង់ក្នុងរឿងដែលអ៊ីរ៉ង់បាញ់សាកល្បងគ្រាប់មីស៊ីល។ ម្យ៉ាងទៀត វិធានការរបស់អ៊ីរ៉ង់ប្រឆាំងនឹងក្រុមហ៊ុនអាមេរិកក៏ជាការបញ្ជូនសារទៅកាន់រដ្ឋបាលអាមេរិករបស់លោកដូណាល់ ត្រាំដែលកំពុងព្រាងច្បាប់ថ្មីប្រឆាំងនឹងឆ្មាំបដិវត្តន៍អ៊ីរ៉ង់ក្រោមបទចោទប្រកាន់ជាក្រុមភេរវជន។ នៅក្នុងបញ្ហានេះ ប្រធានគណៈកម្មការកិច្ចការបរទេសក្នុងសភាអ៊ីរ៉ង់បានប្រកាសឲ្យដឹងនាថ្ងៃសៅរ៍ ទី២៥ មីនាថា ច្បាប់ថ្មីមួយនឹងដាក់ជូនសភានៅដើមខែមេសាខាងមុខដើម្បីចាត់ទុកទាហានអាមេរិក និងទីភ្នាក់ងារស៊ើបការណ៍សម្ងាត់ទៅក្នុងចង្កោមភេរវជន។
សូមជម្រាបជូនថា តាំងពីលោកដូណាល់ ត្រាំកាន់តំណែងប្រធានាធិបតីអាមេរិកមក ទំនាក់ទំនងរវាងទីក្រុងតេហេរ៉ង់ និងវ៉ាស៊ីនតោនបានឡើងតានតឹងជាលំដាប់។ លោកត្រាំថែមទាំងបានសន្យាក្នុងសម័យឃោសនាបោះឆ្នោតថា លោកនឹងហែកចោលកិច្ចព្រមព្រៀងនុយក្លេអ៊ែរជាប្រវត្តិសាស្រ្តដែលអ៊ីរ៉ង់បានចុះហត្ថលេខាជាមួយសហគមន៍អន្តរជាតិកាលពីពាក់កណ្តាលខែកក្កដា ឆ្នាំ ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ