លោកបាន គីមូន៖ស្ថានការណ៍នៅស៊ីរីសព្វថ្ងៃ ជាបរាជ័យរួមរបស់សហគមន៍អន្តរជាតិ
លោកអគ្គលេខាធិការអង្គការសហប្រជាជាតិបាន គីមូនបានធ្វើសន្និសីទកាសែតលើកចុងក្រោយនាថ្ងៃសុក្រ ទី១៦ ធ្នូ មុននឹងផ្ទេរតំណែងទៅឲ្យលោកអគ្គលេខាធិការថ្មីអាន់តូនីញ៉ូ ហ្គូទែរ៉េនៅថ្ងៃទី១ មករាខាងមុខ។ នៅក្នុងសន្និសីទកាសែតនោះ លោកបាន គីមូនបាននិយាយច្រើនពីបញ្ហាស៊ីរី ពិសេសស្ថានការណ៍នៅក្នុងទីក្រុងអាឡិប។ លោកបាន គីមូនបានទទួលស្គាល់ពីអសត្ថភាពរបស់អ.ស.ប.ក្នុងការដោះស្រាយវិបត្តិស៊ីរី តែបញ្ជាក់ថា អង្គការសហប្រជាជាតិនឹងបន្តប្រឹងប្រែងជាបន្តទៀត។
ចុះផ្សាយនៅថ្ងៃ៖
ស្តាប់ - ០១:២៣
« ទង្វើសម្លាប់ឥតត្រាប្រណីនៅក្នុងប្រទេសស៊ីរីជាសក្ខីកម្មមួយដែលបញ្ជាក់ពីកង្វះមនសិការពិភពលោក។ សព្វថ្ងៃនេះ ទីក្រុងអាឡិបនៅស៊ីរីប្រៀបបាននឹងវាលពិឃាត។ គឺជាបរាជ័យរបស់ពិភពលោកនៅចំពោះមុខប្រជាជនស៊ីរី។ បើគ្មានចិត្តមេត្តាករុណាទេ នោះក៏គេមិនអាចរកបានសន្តិភាពដែរ។ យើងទាំងអស់គ្នាជាសាក្សីនៅចំពោះបទឧក្រិដ្ឋកម្មដ៏គួរឲ្យស្អប់ខ្ពើម ហើយជនដែលបានប្រព្រឹត្តទង្វើនេះនឹងត្រូវទទួលការកាត់ទោសនៅតុលាការ។
អង្គការសហប្រជាជាតិបានខ្នះខ្នែងជួយតាមគ្រប់រូបភាពដែលអាចធ្វើទៅបាន តាំងពីកម្លាំងមនុស្ស និងសម្ភារៈ។ អង្គការសហប្រជាជាតិស្នើឲ្យភាគីពាក់ព័ន្ធទាំងអស់ចូលរួមចាត់វិធានការគ្រប់បែបយ៉ាងដែលអាចធ្វើទៅបានដើម្បីអនុញ្ញាតឲ្យមានការជម្លៀសជនស៊ីវិលជាថ្មីប្រកបដោយសុវត្ថិភាពចេញពីទីក្រុងអាឡិប។ ខ្ញុំសូមរម្លឹកជាថ្មីថា អង្គការសហប្រជាជាតិត្រៀមខ្លួនជានិច្ច ២៤ម៉ោងលើ២៤ម៉ោងដើម្បីធ្វើអ្វីៗគ្រប់យ៉ាងដែលចាំបាច់ក្នុងការជួយសង្រ្គោះជនស៊ីវិលឲ្យបានច្រើនបំផុត »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ