អាមេរិកពន្លឿនឲ្យដាក់ទណ្ឌកម្មថ្មីទៅលើអៀរ៉ង់
លោកប្រធានាធិបតីអាមេរិកបារ៉ាក់អូបាម៉ា និងលោកប្រធានាធិបតីរុស្ស៊ីឌីម៊ីទ្រីម៉េដវ៉េដេវបានសុំឲ្យអ្នកចរចា របស់ខ្លួននៅអង្គការសហប្រជាជាតិខិតខំធ្វើការពន្លឿនដើម្បីសម្រេច ឲ្យបាននូវសេចក្តីសម្រេចចិត្តសម្រាប់ដាក់ទណ្ឌកម្មថ្មីទៅលើប្រទេស អៀរ៉ង់។ នេះជាសេចក្តីប្រកាសឲ្យដឹងដោយសេតវិមាននៅថ្ងៃទី១៤ឧសភានេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
ការប្រកាសដោយសហរដ្ឋអាមេរិកពន្លឿនឲ្យមានការដាក់ទណ្ឌកម្មថ្មីទៅលើប្រទេសអៀរ៉ង់នេះធ្លាក់ចំពេលដែលជំនួបកំពូលនៃក្រុមប្រទេសG15 ត្រូវជួបប្រជុំគ្នានៅថ្ងៃទី១៧ឧសភាខាងមុខនេះនៅទីក្រុងតេហេរ៉ង់ដែលក្នុងនោះមានក្រុមប្រទេសពុំចូលបក្សសម្ពន្ធផងដែរ។ នាឱកាសជំនួបកំពូលនេះ លោកប្រធានាធិបតីនៃប្រទេសប្រេស៊ីល Lula ដែលប្រឆាំងនឹងការដាក់ទណ្ឌកម្មទៅលើអៀរ៉ង់ដោយក្រុមប្រទេសទាំង៦ ត្រូវមានតួនាទីជាអ្នកជួយសម្រុះសម្រួលរិះរកដំណោះស្រាយឲ្យបញ្ហានុយក្លេអ៊ែរអៀរ៉ង់។
ក្រុមប្រទេសទាំង៦នោះមាន៖ សហរដ្ឋអាមេរិក ប្រទេសចិន ប្រទេសបារាំង ប្រទេសអង់គ្លេស ប្រទេសរុស្ស៊ី និងប្រទេសអាល្លឺម៉ង់ ដែលសង្ស័យថាប្រទេសអៀរ៉ង់មានបំណងផលិតអាវុធនុយក្លេអ៊ែរ ដោយយកកម្មវិធីនុយក្លេអ៊ែរស៊ីវិលមកធ្វើជាលេសសម្រាប់បិទបាំងគោលបំណងពិតរបស់ខ្លួន។ នាឱកាសកិច្ចសន្ទនាតាមទូរស័ព្ទ លោកប្រធានាធិបតីអាមេរិកនិងរុស្ស៊ីបានព្រមព្រៀងគ្នាថានឹងសម្រេចឲ្យបាននូវសេចក្តីសម្រេចចិត្តមួយនៅអ ស ប ដើម្បីពង្រឹងការដាក់ទណ្ឌកម្មទៅលើប្រទេសអៀរ៉ង់។
សូមគូសបញ្ជាក់ថា ការព្រមានទៅលើអៀរ៉ង់ដែលធ្វើឡើងតែប៉ុន្មានម៉ោងប៉ុណ្ណោះមុនការអញ្ជើញទៅដល់ទីក្រុងតេហេរ៉ង់របស់លោកប្រធានាធិបតីប្រេស៊ីលគឺពិតជាឱកាសចុងក្រោយសម្រាប់ប្រទេសអៀរ៉ង់ធ្វើកិច្ចចរចាជាមួយសហគមន៍អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ