អាមេរិក៖លោកប្រធានាធិបតីអូបាម៉ាមិនបានដឹងពីសកម្មភាពចារកិច្ចលើលោកស្រី Merkel ទេ
សំណុំរឿងចារកិច្ចអាមេរិកលើប្រមុខដឹកនាំអាឡឺម៉ង់ Angela Merkel បានកក្រើកឡើងជាថ្មីនៅថ្ងៃអាទិត្យ ទី២៧តុលាម្សិលមិញ។ គឺក្រោយពេលដែលកាសែតដ៏ល្បីល្បាញរបស់អាល្លឺម៉ង់ ឈ្មោះថា The Bild «ដឺ បៀល» បានចុះផ្សាយថា លោកប្រធានាធិបតីអាមេរិក បារ៉ាក់ អូបាម៉ា បានដឹងពីសកម្មភាពចារកិច្ចលើលោកស្រី Merkel ជាច្រើនឆ្នាំមកហើយ។ ប៉ុន្តែទីភ្នាក់ងារសន្តិសុខជាតិអាមេរិក NSA បានបដិសេធព័ត៌មានដែលចុះផ្សាយនោះ ដោយថា វាមិនមែនជាការពិតទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
កាសែតថ្ងៃអាទិត្យរបស់អាល្លឺម៉ង់ដ៏ល្បីល្បាញ ឈ្មោះថា The Bild បានចុះផ្សាយព័ត៌មានសម្ងាត់ដែលថា ប្រមុខទីភ្នាក់ងារសន្តិសុខជាតិអាមេរិក លោក Keith Alexander ធ្លាប់បានពន្យល់ប្រាប់លោកប្រធានាធិបតីអូបាម៉ា ពីប្រតិបត្តិការស៊ើបការសម្ងាត់ លើលោកស្រីប្រមុខដឹកនាំអាល្លឺម៉ង់ Angela Merkel នៅក្នុងឆ្នាំ២០១០។ តាមកាសែតដដែល លោកអូបាម៉ា មិនបានបញ្ឈប់ប្រតិបត្តិការនោះទេ។ ផ្ទុយទៅវិញ លោកហាក់ដូចជាបានបណ្ដោយឲ្យវាប្រព្រឹត្តទៅជាបន្តបន្ទាប់។
កាសែតប្រចាំសប្ដាហ៍របស់អាល្លឺម៉ង់មួយទៀត ឈ្មោះ De Speegal រាយការណ៍ថា ឯកសារសម្ងាត់ដែលបែកធ្លាយ បានបង្ហាញពីបញ្ជីគោលដៅនៃការស៊ើបការសម្ងាត់ ហើយក្នុងនោះ លេខទូរសព្ទរបស់លោកស្រី Merkel ក៏ស្ថិតនៅក្នុងបញ្ជីនោះជាង១០ឆ្នាំមកហើយដែរ។
ទោះជាយ៉ាងនេះក្ដី អ្នកនាំពាក្យទីភ្នាក់ងារសន្តិសុខជាតិអាមេរិក លោកស្រី Vanee’ Vines បានបដិសេធព័ត៌មានដែលចុះផ្សាយនោះ ដោយថា វាមិនមែនជាការពិតទេ។ អ្នកនាំពាក្យរូបនេះឲ្យដឹងថា ប្រមុខទីភ្នាក់ងារសន្តិសុខជាតិអាមេរិក មិនបានជជែកពិភាក្សាជាមួយលោកអូបាម៉ា ទាក់ទងនឹងសកម្មភាពលួចស៊ើបការលើលោកស្រី Merkel ក្នុងឆ្នាំ២០១០ទេ។ និយាយជារួម គឺកន្លងមក មិនធ្លាប់ជជែករឿងនេះតែម្ដង។
ព័ត៌មានដែលថា ទីភ្នាក់ងារសន្តិសុខជាតិអាមេរិក NSA បានធ្វើចារកិច្ចលើលោកស្រី Angela Merkel បានធ្វើឲ្យលោកស្រីមិនអាចទប់កំហឹងបានឡើយ។ លោកស្រីបានទូរស័ព្ទប្រាប់លោកប្រធានាធិបតីអាមេរិកអូបាម៉ាថា គេមិនដែលធ្វើចារកិច្ចរវាងប្រទេសជាមិត្តគ្នាឯងទេ។ ចំពោះប្រជាជនអាល្លឺម៉ង់ ក៏មិនពេញចិត្តនឹងទង្វើនេះដែរ។ ការស្ទង់មតិរបស់កាសែត Der Spiegel រកឃើញថា ៦០ភាគរយនៃប្រជាជនអាល្លឺម៉ង់យល់ថា អំពើចារកិច្ចរបស់អាមេរិកមកលើប្រមុខរដ្ឋាភិបាលអាល្លឺម៉ង់ បានបំផ្លាញចំណងទាក់ទងរវាងប្រទេសទាំងពីរ។
ជាការឆ្លើយតប អាល្លឺម៉ង់បានឲ្យដឹងថា ខ្លួននឹងបញ្ជូនអ្នកស៊ើបការណ៍របស់ខ្លួនទៅទីក្រុងវ៉ាស៊ីនតោន ដើម្បីជួបជជែកជាមួយតំណាងសេតវិមាន និងទីភ្នាក់ងារសន្តិសុខជាតិអាមេរិក ជុំវិញការលួចស៊ើបការសម្ងាត់លើប្រមុខរដ្ឋាភិបាលអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ