លោកនាយករដ្ឋមន្រ្តីចិនលី ខឺជំាងផ្តើមបំពេញទស្សនកិច្ចមួយជុំទ្វីបអាមេរិកឡាទីន
នៅថ្ងៃអង្គារ ទី១៩ ឧសភានេះ លោកនាយករដ្ឋមន្រ្តីចិនលី ខឺជំាងបានផ្តើមបំពេញទស្សនកិច្ចមួយជុំទ្វីបអាមេរិកឡាទីន។ ប្រេស៊ីលជាប្រទេសដែលលោកលី ខឺជំាងបានចាប់ផ្តើមមុនគេនៅថ្ងៃនេះ និងបន្តដំណើរទៅកាន់ប្រទេសកូឡុំប៊ីនៅថ្ងៃពុធ ទី២០ ឧសភា រួចនឹងធ្វើដំណើរបន្តទៅកាន់ប្រទេសឈីលី និងប៉េរូ។ ទស្សនកិច្ចរបស់លោកនាយរដ្ឋមន្រ្តីចិននៅទ្វីបអាមេរិកឡាទីនពេលនេះបានធ្វើឡើង ជិតមួយឆ្នំាក្រោយដំណើរទស្សនកិច្ចរបស់លោកប្រធានាធីបតីចិនស៊ី ជីនពីង។ គួរជម្រាបជូនថា ជាប្រពៃណី ដែនដីអាមេរិកឡាទីនត្រូវបានសហរដ្ឋអាមេរិកចាត់ទុកជាដែនដីដែលស្ថិតក្រោមឥទ្ធិពលរបស់ខ្លួន។
ចុះផ្សាយនៅថ្ងៃ៖
ស្តាប់ - ០៥:១០
វាមិនមែនជារឿងចៃដន្យទេដែលចិនបានព្យាយាមបង្កើនឥទ្ធិពលរបស់ខ្លួននៅក្នុងទ្វីបអាមេរិកឡាទីន និយាយជារួម និងនៅក្នុងប្រទេសប្រេស៊ីល និយាយដោយឡែក។ ចូរកុំភ្លេចថា គឺទើបតែនៅដើមសតវត្សទី២១ នេះទេដែលចិនបានបង្កើនទំនាក់ទំនងទ្វេដងជាមួយបណ្តាប្រទេសនៅក្នុងទ្វីប អាមេរិកឡាទីនដែលសហរដ្ឋអាមេរិកបានចាត់ទុកជាដែនដីស្ថិតក្រោមឥទ្ធិពលរបស់ខ្លួន។ ជាក់ស្តែងក្នុងឆ្នំា ២០១៤ ទំហំនៃការដោះដូរពាណិជ្ជកម្មរវាងចិន និងអាមេរិកឡាទីនមានទឹកប្រាក់ដល់ទៅជាង ២៦៣ពាន់លានដុល្លារ ពោលបានកើនឡើង ២០ដង បើធៀបនឹងឆ្នំា ២០០០។ រីឯទឹកប្រាក់វិនិយោគរបស់ចិននៅក្នុងតំបន់ក៏បានកើនឡើងខ្លំាងដែរ ពោលមានជាង ៨០ ០០០លានដុល្លារនៅក្នុងឆ្នំា ២០១៣។
នាឱកាសដំណើរទស្សនកិច្ចរបស់លោកប្រធានាធិបតីចិនស៊ី ជីនពីងក្នុងឆ្នំា ២០១៤ កន្លងទៅ លោកស៊ី ជីនពីងបានប្តេជ្ញានឹងបង្កើនការដោះដូរពាណិជ្ជកម្មរវាងចិន និងទ្វីបអាមេរិកទីនឲ្យបាន ៥០០ពាន់លានដុល្លារនៅ ១០ឆ្នំាខាងមុខ។ ដូច្នេះឃើញថា ចិនកំពុងសម្លឹងឃើញប្រយោជន៍សំខាន់ចំនួនពីរនៅក្នុងទ្វីបអាមេរិកឡាទីន គឺប្រយោជន៍សេដ្ឋកិច្ច និងប្រយោជន៍ភូមិសាស្រ្តនយោបាយ។ ប្រយោជន៍សេដ្ឋកិច្ច ព្រោះទី១ ទ្វីបអាមេរិកឡាទីន ជាទីផ្សារប្រកបសក្តានុពលសម្រាប់ជួយទ្រទ្រង់កំណើនសេដ្ឋកិច្ចចិន ពិសេសនៅក្នុងវិស័យនំាចេញរបស់ចិន និងទី២ ទ្វីបអាមេរិឡាទីន ជាប្រភពថាមពលដែលចិនកំពុងត្រូវការមិនអាចខ្វះបានសម្រាប់យកទៅចិញ្ចឹមបំប៉នសេដ្ឋកិច្ចរបស់ខ្លួន។
ចំណែកប្រយោជន៍ភូមិសាស្រ្តនយោបាយវិញ ក្រៅពីចង់ពង្រីកឥទ្ធិពលរបស់ខ្លួនឲ្យឆ្ងាយពីតំបន់អាស៊ីដែលចិនកំពុងដើរតួយក្សហើយនោះ ចិន ក៏ចង់ចាប់ដៃជាមួយទ្វីបអាមេរិកឡាទីនដើម្បីស្ថាបនាពិភពលោកមួយឲ្យមានសមភាព និងភាពសម្បូររុងរឿងដែរ។ ទីក្រុងប៉េកំាងបានដឹងច្បាស់ណាស់ថា ទ្វីបអាមេរិកឡាទីនត្រូវបានអាមេរិកចាត់ទុកជាដែនដីឥទ្ធិពលរបស់ខ្លួន តែចិនបានចោទជាសំណួរថា អាមេរិកបាន និងកំពុងបង្កើនឥទ្ធិពលរបស់ខ្លួននៅតំបន់អាស៊ី ចុះរឿងអីបានជាចិនមិនអាចបង្កើនឥទ្ធិពលរបស់ខ្លួននៅក្នុងតំបន់អាមេរិកឡាទីននោះ។
ចិនជាដៃគូពាណិជ្ជកម្មទី១ របស់ប្រេស៊ីល
មានហេតុផលសំខាន់ពីរដែលលោកលី ខឺជំាងបានជ្រើសយកប្រេស៊ីលជាប្រទេសដែលត្រូវបំពេញទស្សនកិច្ចមុនគេ ទី១ ប្រេស៊ីលក៏ជាសមាជិកនៃក្រុមប្រទេសដែលកំពុងមានសេដ្ឋកិច្ចរីកលូតលាស់ខ្លំាងហៅកាត់ថា BRICS គឺប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង និងទី២ ប្រេស៊ីលជាទីផ្សារប្រកបដោយសក្តានុពលសម្រាប់សេដ្ឋកិច្ចចិន និងក៏ជាប្រទេសយុទ្ធសាស្រ្តមួយសម្រាប់ចិននៅអាមេរិកឡាទីន។ ក្នុងឆ្នំា ២០០៩ ចិនបានក្លាយជាដៃគូពាណិជ្ជកម្មទី១ របស់ប្រេស៊ីលនៅពីមុខសហរដ្ឋអាមេរិក។ តែបើនិយាយពីរឿងវិនិយោគចិននៅប្រេស៊ីលវិញ ចិនបានស្ថិតចំណាត់ទី១២។ ជាទូទៅ ប្រេស៊ីលបានលក់ឲ្យចិនសឹងតែផ្តាច់មុខនូវធនធានធម្មជាតិរបស់ខ្លួន មានដូចជាធនធានរ៉ែ ប្រេងឆៅ និងសណ្តែកសៀង ហើយចិនបានលក់ទៅឲ្យប្រេស៊ីលវិញនូវផលិតផលស្រាប់ៗ។
ទីក្រុងប្រាស៊ីលីយ៉ាបានហៅនយោបាយដោះដូរពាណិជ្ជកម្មរបៀបនេះថា ជាការដោះដូរមិនស្មើភាព និងអំពាវនាវឲ្យចិនបង្កើនវិនិយោគដោយផ្ទាល់នៅក្នុងទឹកដីប្រេស៊ីល តាមរយៈការបង្កើតក្រុមហ៊ុន និងរោងចក្រ សហគ្រាសគ្រប់ប្រភេទ។ ប្រេស៊ីលបានយល់ឃើញថា ការបង្កើនបន្ថែមវិនិយោគចិននៅប្រេស៊ីល ជាការរួមចំណែកក្នុងការកាត់បន្ថយចំនួនប្រជាជនប្រេស៊ីលអត់ការងារធ្វើ និងការផ្តល់សន្ទុះសេដ្ឋកិច្ចប្រេស៊ីលដែលបានធ្លាក់ចុះក្នុងរយៈពេលប៉ុន្មានឆ្នំាចុងក្រោយនេះ។ ទន្ទឹមគ្នានេះ ប្រេស៊ីលក៏បានទាមទារឲ្យចិនយកប្រេស៊ីលធ្វើជាមូលដ្ឋានផលិតកម្មរបស់ចិនសម្រាប់បំពេញតម្រូវការនៅក្នុងតំបន់ និងសម្រាប់នំាចេញទៅកាន់ពិភពលោក។
គួរជម្រាបជូនថា ទោះបីជាការដោះដូរពាណិជ្ជកម្មរវាងចិន និងប្រេស៊ីលត្រូវបានប្រេស៊ីលចាត់ទុកថា មិនស្មើភាពក៏ដោយ ក៏ទឹកប្រាក់នៃការដោះដូររវាងប្រទេសទំាងពីរបានកើនពី ៣ ២០០លានដុល្លារក្នុងឆ្នំា ២០០១ ដល់ទៅ ៨៣ ០០០លានដុល្លារក្នុងឆ្នំា ២០១៣។ នៅក្នុងដំណើរទស្សនកិច្ចរបស់លោកលី ខឺជំាងថ្ងៃនេះ ចិនមានគម្រោងដាក់បោះទុនវិនិយោគបន្ថែមនៅប្រេស៊ីលចំនួន ៥០ ០០០លានដុល្លារ ដោយផ្តោតសំខាន់នៅក្នុងបណ្តាញដឹកជញ្ចូន មានផ្លូវដែក ផ្លូវថ្នល់ កំពុងផែ និងអាកាសយានដ្ឋាន។ ទន្ទឹមគ្នានេះ ចិន និងប្រេស៊ីលក៏ផ្តើមសិក្សាលើគម្រោងសាងសង់ផ្លូវដែក និងផ្លូវសមុទ្រដែលត្រូវចំណាយប្រាក់ប្រមាណជា ៣០ ០០០លានដុល្លារ និងរយៈពេលសាងសង់ពី ៣ ទៅ ៤ឆ្នំា។
អនាគតផ្លូវដែក និងផ្លូវសមុទ្រនោះ គឺទុកសម្រាប់ដឹកវត្ថុធាតុដើមពីប្រេស៊ីលទៅចិនតាមមហាសមុទ្រប៉ាស៊ីហ្វីក ដោយឆ្លងតាមកាត់តំបន់អាម៉ាហ្សូន និងប្រទេសប៉េរូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ