អាល្លឺម៉ង់បណ្តេញប្រធានភ្នាក់ងារចារកិច្ចអាមេរិកចេញពីទឹកដីខ្លូន
នៅថ្ងៃព្រហស្បតិ៍នេះ អាជ្ញាធរអាល្លឺម៉ង់បានស្នើសុំឲ្យប្រធានភ្នាក់ងារចារកិច្ចអាមេរិក ដែលឈរជើងនៅក្រុងប៊ែកឡាំង ចាកចេញពីទឹកដីអាល្លឺម៉ង់។ ការស្នើសុំនេះ ត្រូវបានធ្វើឡើងបន្ទាប់ពីមានការបែកធ្លាយ ជាបន្តបន្ទាប់នូវឯកសារ ក៏ដូចជាការចាប់បានជនសង្ស័យ ដែលគេគិតថា ជាភ្នាក់ងារចារកិច្ចរបស់អាមេរិក មកលបស៊ើបការពត៌មានក្នុងជូររដ្ឋាភិបាលអាល្លឺម៉ង់។
ចុះផ្សាយនៅថ្ងៃ៖
ស្តាប់ - ០២:៤៧
ដើមហេតុដំបូងគឺបណ្តាលមកពី លោក Edward Snowden ដែលបានទម្លាយឯកសារសម្ងាត់បង្ហាញថាភ្នាក់ងារចារកិច្ចអាមេរិក NSA បានលបស្តាប់ទូរស័ព្ទរបស់លោកស្រីអង់ហ្គែឡា ម៉ែរគែល។ ក្រោយហេតុការណ៍នេះ អាជ្ញាធរអាល្លឺម៉ង់បានចាត់ការស៊ើបអង្កេត ដើម្បីឲ្យយល់ច្បាស់អំពីសកម្មភាពពិតប្រាកដរបស់ភ្នាក់ងារចារកិច្ចអាមេរិកដែលមានបេសកកម្មនៅអាល្លឺម៉ង់។ កាលពីថ្ងៃពុធថ្មីៗនេះ អាជ្ញាធរអាល្លឺម៉ង់បានស្រាវជ្រាវដឹងថា មានជនបង្កប់អាមេរិកម្នាក់ធ្វើការនៅក្រសួងការពារជាតិអាល្លឺម៉ង់។ ហើយប៉ុន្មានថ្ងៃមុននេះទៀត គេបានចាប់ភ្នាក់ងារចារកិច្ចអាល្លឺម៉ង់ម្នាក់ទៀតដែលជាជនបង្កប់ បានលួចផ្តល់ពត៌មានឲ្យភ្នាក់ងារ CIA របស់អាមេរិក។
លោកស្រីអង់ហ្គែឡា ម៉ែរគែល បានថ្លែងទាំងមិនសប្បាយចិត្តថា ក្នុងនាមជាប្រទេសដៃគូសម្ព័ន្ធមិត្តនឹងគ្នា បែរជាមិនទុកចិត្តគ្នា ហើយលួចមកស៊ើបការសម្ងាត់បែបនេះទៅវិញ។ លោកស្រីបន្តថា ពិភពលោកបច្ចុប្បន្ន មិនមែនពិភពលោកជំនាន់សង្គ្រាមលោកលើកទីពីរ ឬជំនាន់សង្គ្រាមត្រជាក់ទៀតឡើយ។ មានបញ្ហាសន្ធឹកសន្ធាប់ណាស់ដែលយើងគួរចាប់ដៃគ្នាដោះស្រាយ មិនត្រូវចំណាយពេលវេលាឥតប្រយោជន៍មកស៊ើបការណ៍ សង្ស័យគ្នាទៅវិញទៅមកបែបនេះទេ។
អ្នកនាំពាក្យរដ្ឋាភិបាលអាល្លឺម៉ង់និយាយថា អាល្លឺម៉ង់មិនអាចចាត់ទុករឿងនេះជាការលេងសើចបានទេ ។ រដ្ឋាភិបាលទាំងពីរត្រូវតែរកមធ្យោបាយជម្រះការសង្ស័យនេះឲ្យជ្រះស្រលះ។ លោកបន្តថា យើងមិនអាចធ្វើការជាមួយគ្នាទៀតទេ បើសិនជាយើងមិនទុកចិត្តគ្នា ហើយហ៊ាននិយាយត្រង់ទៅត្រង់មក។
យ៉ាងណាមិញ អ្នកនាំពាក្យក្រុមប្រឹក្សាសន្តិសុខជាតិសហរដ្ឋអាមេរិក បាននិយាយថាអាមេរិកបានទទួលដំណឹងដែលថា អាល្លឺម៉ង់បានបណ្តេញប្រធានភ្នាក់ងារចារកិច្ចខ្លួន ប៉ុន្តែរដ្ឋាភិបាលអាមេរិកសុំមិននិយាយអ្វីទាំងអស់នាពេលនេះ។ អ្នកនាំពាក្យដដែលបន្តថា អាមេរិកនឹងខិតខំធ្វើយ៉ាងណារក្សាទំនាក់ទំនងល្អជាមួយអាល្លឺម៉ង់ជានិច្ច។ តាមសម្តីអ្នកនាំពាក្យរដ្ឋាភិបាលអាល្លឺម៉ង់ អាល្លឺម៉ង់សម្រេចស្នើឲ្យប្រធានភ្នាក់ងារចារកិច្ចអាមេរិកចាកចេញពីទឹកដីខ្លួន ព្រោះថាមន្ត្រីអាមេរិករូបនេះ មិនបានសម្តែងការចូលរួមសហប្រតិបត្តិការឲ្យបានត្រឹមត្រូវ ក្នុងសំណុំរឿងអាស្រូវដែលបែកធ្លាយនាពេលថ្មីៗនេះទេ។ លោកថារដ្ឋាភិបាលអាល្លឺម៉ង់ សង្កេតឃើញថា អាមេរិកហាក់ព្រងើយកន្តើយ មិនអើពើចេញមុខមកបកស្រាយសោះ។ ធ្វើដូចរឿងដែលកើតឡើងមកនេះជារឿងលេងសើច។
យោងតាមការវិភាគ លោកប្រធានាធិបតីBarack Obama គួរណាតែចេញមុខមកដោះស្រាយរឿងនេះ។ តែបើតាមយោបល់របស់អ្នកវិភាគម្នាក់ លោកយល់ថាប្រហែលជាលោក Barack Obama ក៏មិនអាចដោះស្រាយបានដែរមើលទៅ។ បញ្ហានេះ វាគួរតែត្រូវបានដោះស្រាយតាមរយៈសភាតំណាងរាស្រ្តរបស់ប្រទេសទាំងពីរ។ តែបើតាមមើលស្ថានភាពនាពេលនេះ ខាងអាមេរិកគ្មាននរណាម្នាក់កម្រើកសោះ។ ម្លោះហើយរឿងនេះ ប្រហែលជានៅស្អុយរលួយ យូរទៀតមើលទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ