តាលីបង់វាយប្រហារភេរវកម្ម ក្នុងសង្កាត់ស្ថានទូត កណ្តាលរដ្ឋធានី
កាប៊ូលបានក្លាយជាចំណុចវាយប្រហារភេរវកម្ម កាលពីថ្ងៃសុក្រទី ១៧ មករាម្សិលមិញ បង្កឱ្យមានមនុស្សស្លាប់យ៉ាងហោចណាស់ ២១នាក់។ ក្នុងនោះមានបួននាក់ជាបុគ្គលិករបស់ក្រុមប្រឹក្សាសន្តិសុខអង្គការសហប្រជាជាតិ។ ភេរវកម្មជាស្នាដៃរបស់ពួកតាលីបង់នេះ បានផ្ទុះឡើងនៅមុខភោជ្ជនីយដ្ឋានមួយ ក្នុងសង្កាត់ស្ថានទូត ដែលមានជនបរទេសជាច្រើនចូលចិត្តទៅជួបជុំគ្នា ជាពិសេសក្នុងល្ងាចថ្ងៃសុក្រចុងសប្តាហ៍។
ចុះផ្សាយនៅថ្ងៃ៖
ស្តាប់ - ០១:៥៦
ការវាយប្រហារភេរវកម្មយប់មិញនេះ ត្រូវបានប្រកាសទទួលស្គាល់ ដោយគ្មានបង្អង់ពីសំណាក់ពួកតាលីបង់។ ម៉ោងប្រមាណ៧យប់ (ម៉ោងក្នុងស្រុក) អត្តឃាតជន បានបំផ្ទុះគ្រាប់បែក នៅចំពីមុខភោជ្ជនីដ្ឋាន បន្តដោយការបាញ់រះ មួយប្រាវទៀត។ នេះបើតាមអនុរដ្ឋមន្ត្រីក្រសួងមហាផ្ទៃ Mohammad Ayoub Salangi ដែលបានបញ្ជាក់ថា ក្រោយការបំផ្ទុះ គ្រាប់បែក ដែលលាន់ឮពេញរដ្ឋធានីកាប៊ូល ជនប្រដាប់អាវុធពីរនាក់ផ្សេងទៀត បានឆ្លៀតស្ទុះចូលក្នុងអាហារដ្ឋាន រួចបាញ់រះលើភ្ញៀវ ដោយគ្មានរអា រយៈពេលប្រមាណ២០នាទី។ អត្តឃាតជនមានគ្នាបីនាក់ ប៉ុន្តែពីរនាក់ត្រូវបានប៉ូលិសកម្ចាត់បានទាន់ពេលវេលា មិនអាចបំផ្ទុះគ្រាប់បែកបាន។
ក្នុងចំណោមអ្នកជនរងគ្រោះបាត់បង់ជីវិតទាំង២១នាក់ ១៣នាក់ជាជនបរទេស ម្នាក់ជាជនជាតិដាណឺម៉ាក ម្នាក់អង់គ្លេស កាណាដាពីរនាក់ បួននាក់ជាសមាជិកក្រុមប្រឹក្សាសន្តិសុខអង្គការសហប្រជាជាតិ និងម្នាក់ទៀតជាតំណាងអចិន្ត្រៃយ៍អង្គការមូលនិធិរូបិយវត្ថុអន្តរជាតិ IMF។ អ្នកនាំពាក្យតាលីបង់បានអះអាងថា មានអ្នកទទួលខុសត្រូវជាន់ខ្ពស់អាល្លឺម៉ង់ស្លាប់ដែរ ប៉ុន្តែបែរឡាំងមិនបានបញ្ជាក់ព័ត៌មាននេះទេ។
បើតាមជនជាតិម្នាក់ ស្នាក់នៅក្រុងកាប៊ូលតាំងពីបីឆ្នាំ និងមិនឆ្ងាយប៉ុន្មានពីកន្លែងកើតហេតុ ភោជ្ជនីយដ្ឋាននេះមានការការពារសន្តិសុខខ្លាំងណាស់ ព្រោះជាភោជ្ជនីយដ្ឋានដែលបានទទួលសិទ្ធិអនុញ្ញាតពីស្ថានទូតបារាំងប្រចាំក្រុងកាប៊ូល ជាកន្លែងប្រមូលផ្តុំស្ថានទូតនានា និងអ្នកមានអាហ្វហ្កានិស្ថាន រស់នៅ។
ការវាយប្រហារអត្តឃាតនេះ ផ្ទុះឡើងតែ៥ថ្ងៃប៉ុណ្ណោះក្រោយភេរវកម្មអត្តឃាតប្រឆាំងនឹងរថយន្តប៉ូលិស ដែលកាលណោះបណ្តាលឱ្យស្លាប់កងកម្លាំងប៉ូលិសអាហ្វហ្កានិស្ថានពីរនាក់ នៅទីក្រុងកាប៊ូលដែរ។ សូមរំលឹកជូនថា កងកម្លាំងអន្តរជាតិអូតង់ នឹងត្រូវដកចេញពីអាហ្វហ្កានិស្ថាន នៅចុងឆ្នាំនេះ។ ការដកទ័ពក្នុងបរិបទនយោបាយតានតឹងបំផុត ពីព្រោះការបោះឆ្នោតប្រធានាធិបតីនឹងត្រូវប្រព្រឹត្តទៅថ្ងៃទី ៤មេសាខាងមុខ ឯការវាយប្រហារតាលីបង់ក៏កាន់តែកើនឡើងឥតឈប់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ