គ្រោះថ្នាក់យន្តហោះស្លាប់៤នាក់នៅក្រុងម៉ូស្គូ
នៅប្រទេសរុស្ស៊ី កាលពីថ្ងៃសៅរ៍ម្សិលមិញ មានគ្រោះថ្នាក់យន្តហោះដឹកអ្នកដំណើរមួយគ្រឿង នៅក្រុងម៉ូស្គូ បានបណ្តាលអោយស្លាប់បុគ្គលិកបំរើការក្នុងយន្តហោះ ៤នាក់ និងរបួស ៤នាក់។ យន្តហោះនេះ គ្មានផ្ទុកអ្នកដំណើរទេ មានតែបុគ្គលិកបំរើការងារតែ៨ នាក់ប៉ុណ្ណោះ។ គេមិនទាន់ដឹងពីមូលហេតុនៃគ្រោះថ្នាក់នេះនៅឡើយទេ។ នៅថ្ងៃអាទិត្យនេះ អ្នកជំនាញចាប់ផ្តើមធ្វើកោសល្យវិច័យលើសាកសព ដើម្បីធ្វើការស៊ើបអង្កេត។ ប៉ុន្មានឆ្នាំចុងក្រោយនេះ មានធ្លាក់យន្តហោះច្រើនគ្រឿងក្នុងប្រទេស ដែលឆ្លុះបង្ហាញថា វិស័យសន្តិសុខផ្លូវអាកាសរបស់ប្រទេសរុស្ស៊ី នៅមានភាពទន់ខ្សោយនៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៥
យន្តហោះ Topolev ដែលធ្លាក់កាលពីថ្ងៃសៅរ៍ម្សិលមិញ នៅក្រុងម៉ូស្គូ គ្មានផ្ទុកអ្នកដំណើរម្នាក់ឡើយ លើកលែងតែបុគ្គលិកបំរើការ តែ៨នាក់ ប៉ុណ្ណោះ។ យន្តហោះនេះ អាចផ្ទុកអ្នកដំណើរបាន ២១០នាក់ កំពុងធ្វើដំណើរមកកាន់ប្រទេសរុស្ស៊ីវិញ បន្ទាប់ពីបានធ្វើការហោះហើរទៅសាធារណរដ្ឋឆេក។
មុននឹងផ្ទុះដាច់ចេញជាបីកំណាត់ យន្តហោះបានបន្ទាបខ្លួនចុះចត យ៉ាងបន្ទាន់ក្នុងព្រលាន។ ប៉ុន្តែគេមិនដឹងថាតើមូលហេតុអ្វី ទើបវាមិនអាចឈប់ចតនៅនឹងមួយកន្លែងបាន។ យន្តហោះបានចេញហួសពីផ្លូវចុះចត មកបុកនឹងរបាំងសន្តិសុខ រួចទើបផ្ទុះចេញភ្លើង។ ក្នុងរូបភាពវីដេអូដែលដាក់បង្ហាញលើអាំងទែរណែត គេឃើញកំទេចយន្តហោះ ធ្លាក់ចុះលើផ្លូវចរាចរមួយ ធ្វើអោយអ្នកបើកបររថយន្តជាច្រើន បង្ខំចិត្តបញ្ឈប់ការបើកបរ។
គេមិនទាន់ដឹងពីមូលហេតុនៃគ្រោះថ្នាក់នេះនៅឡើយទេ។ យោងតាមអ្នកស៊ើបអង្កេត លក្ខខណ្ឌអាកាសធាតុ និងកំហុសបើកបរ មិនមែនជាមូលហេតុ នៃគ្រោះថ្នាក់នេះទេ។
អ្នកស៊ើបអង្កេត គិតថាប្រហែលមកពី បញ្ហាបច្ចេកទេសរបស់យន្តហោះច្រើនជាង។
វិស័យសន្តិសុខផ្លូវអាកាសរបស់ប្រទេសរុស្ស៊ី នៅមានភាពទន់ខ្សោយនៅឡើយ។
ប៉ុន្មានឆ្នាំចុងក្រោយនេះ គ្រោះថ្នាក់ធ្លាក់យន្តហោះ មានច្រើនក្នុងប្រទេស ធ្វើអោយអាជ្ញាធររុស្ស៊ីឈប់ប្រើប្រាស់ នូវយន្តហោះចាស់ៗដែលមានសល់តាំងពីសម័យសូវៀត ហើយបានកំណត់អោយមានការត្រួតពិនិត្យលើក្រុមហ៊ុនអាកាសចរណ៍នានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ